1Beia oni 'eva abiveni komolona umauna bovaikabasita dala kanaua'i bemauli.2Kau namata bovaikabasita bevapasisi, eta koakoai kau ia 'olata be'aku, lalovai komoloai bemauli mai eta abiveni bekula'ila kave'i, lalo'auai mai vapasisiai.3Dala vitaitanaimo 'a'ate namata bovaikabasita Dilava ena ula maulinai bemimia, vaida kevatai sia be'ou keinikeini, 'o sia beinu ba, ia vinaula nama'ina dalata vaida bevaikabasi vaita.4Inoku ia betata'u 'a'ate 'alu'aluta bevamaleleta sibota adata mai nakuta belalo'au venita,5belalovai komolo mai benama'ina kave'i, eta luma vinaulatamo bevavai, koakoa nama'ita bevavai, mai adata daitai bedadai, inoku kau ka Dilava ena luva sia bevasi'avanala.6Dala vitaitanaimo, kau 'alu'aluta bovakula'ilata nua komoloai bemauli.7Oni 'eva dava boutai laloatai ikaika nama'ina bovaikata emu koa nama'itai. Emu vaikabasi laloatai 'eva koakoa komolonai mai nuamu umaunai bovaikabasi.8Luva komolona umaunai boluvaluva inoku sia kau ka emu luva bevavaia si'asi'a. Inoku oni devaivivimu kauta kataua bemalalai 'olana etai luva si'avana vaika beluvala 'abuna asi'i.9Da'alabi kauta bovaikabasita dava boutai laloatai eta 'ola kauta leleta be'ika, nuata bevanama'inata mai eta luva tavata sia bevamueta.10Eta 'ola kauta kevatai sia bevinao beia dala boutai laloatai 'eva eta nama'ina mai lele ika koana bevala'asia, kanaua'i kau Dilava ita ivamaulita Dilavana ikabasina beula venia kula'ila.
Keliso Ena Mue 'Udai MelalanaKa'imala Laloanai.
11Koakoa kataua boitai ekamia, 'olana Dilava ena iulaveni koana kanaua kau boutai bevamaulita iulavenina koana 'ani evala'asia.12Iulaveni koana kanaua ita evaikabasita Dilava ivasi'avanana maulinai sia ekamauli mai kanobata iula venina vinaulata si'avata vaika sia ekavavai, beia vapasisiai mai komoloai ekamia, mai Dilava ena ula maulina ekamauli vaia kanobata kanania laloanai.13Ita kanaua ekamia koma mai eta nuabata namana 'eva eta Dilava namana mai ivamaulita kauna Iesu Keliso ena mue 'udai melalana nuavina ka'imala laloanai.14Keliso sibona ena mauli eveni ita daitai inoku tavata eveni koa si'avata boutai laloatai eluvuta mai si'avana asi'i kautai evaota ia sibona ena umauta, kau ita nuata umautai ka'ula melala boutai nama'ina vinaulata mo ekavavai.15Luva katania bovaikabasivai mai kau bovakula'ilata, maivaka eta mauliai dava desi'avana davatai maikula'ilamu bounai bovakomolota. Kau ka sia boikala vadai melo kikimuai beva aomu.