Kwikari5hch_wb2
1Neharaweritari nekaninuani,'uka ne'iwa nemɨmatsi naki'erie,muwa nepikaxei mixaxi waritsamu meta,muwa xiete kwaiyarikɨ ne'iyari paye'axe.Muwa nepikaxexeiya waɨkawa winu meta retsi,naitɨ 'ikɨ pɨtinehetsiemieme.WahamikumaHamikutsixi, xeketenekwaka xeketene'ieka,xekeneutitarɨwai naki'eriyakɨ.2Ne nepukutsukai, matsi ne'iyari payenierekai.Hikɨ xeime niuki nekaniu'enieni.'Uki neminaki'erie kitenie kanatawekaitɨni.«Ne'iwa 'uka nemɨmatsi naki'erie,witsipemɨti'ɨimari nekukuru,keneneupitɨa nemeutahanikɨ.Nemu'utsie haɨtsikɨ nepumu'uhawi,tɨkarikɨ mieme hawiriya nekɨpatetsie panakaxɨrɨwe».3Nematsi nekaniyutikemaripieni,nekapɨyɨwe tawari nemɨranakatɨni.Nematsi ne'ɨkatetsie nekaneuyuhauxixɨaniri,titayari tawari nereuyukwiemawani.4'Uki neminaki'erie mɨreukukekatsie hewakuxawakaku,muwa kaneukumeni,netaɨta nemeiyehɨakaikɨ waɨkawa nepɨnekatemawi.5Ne'anukukeka 'uki nemɨnaki'eirie nekatineuyepirieni,mixaxi nemamatetsie kanikakukekaitɨni.Ne'itɨwametetsie paitɨ kananuyetsukekaitɨnimɨreuyepieriketsie paitɨ kanikaxɨrɨwekaitɨni.6Kepauka nemɨreiyepiriri 'uki neminaki'erie,'ari kaniukumawekaitɨniri.Neyakaitɨniri,hikɨ 'utɨmana nekaneyani.Nekanitiwauni peru nepɨka'itaxei.Kepauka nemitahiwi pɨkanetsiheta'ei.7Mekaneniutaxeiya tehɨwemetekiekaritsie meye'uwatɨ,kiekari kuraruyari memɨ'ɨwiyamekaneteniukwinitɨani mekaneneutiwaxɨani,nexikuri mekananutihurieni.8Ne mɨpaɨ nepɨtixewawirie 'ukari Kerutsareme kiekatari,xɨka 'uki neminaki'erie hawaikɨ xehekaxeiya,mɨpaɨ xeketenetahɨawi kename netikuye ne'inaki'erietɨ.9'Uka kwinie yemekɨ witsipemɨti'ɨimari, ketatineutaxatɨa,¿kehepaɨ timatsiɨkɨ 'uki peminaki'erie hipame 'ukitsi watsata?¿Kehepaɨ timatsiɨkɨ 'uki peminaki'erie hipame 'ukitsi watsata,mɨkɨ pemɨtatsiwawirie?10'Uki neminaki'erie kwinie yemekɨ pɨtitemaikɨ, xetamekɨ 'utimerɨkatɨ,tsepa tamamata miriyari wahamatɨa muyeika kanimatsiɨkɨni.11Mu'uya kanihurutɨni xeikɨa,kɨpateya 'etsiwa kanitutuniniyɨyɨwitɨ kwatsa kemeu'ane hepaɨ.12Hɨxiteya kukuruxi wahepaɨ kani'aneneni'aki'utɨa memɨyeteiretsikɨ me'ɨwatɨkaitɨ,tetexi witsimɨ'anene hepaɨ metehekutetɨ.13'Auriteya waritsamu 'etsiyari hepaɨ pɨ'anene,tupiriya witsimu'ɨatɨka 'etsiyari.Teniteya tuturite 'atsutsena kanihɨkɨtɨnimuwa matineika mixaxi.14Mamateya huru tepɨayari kanihɨkɨtɨnitupatsiyukɨ ti'utɨkaitɨ.Hukaya putimerɨka witsimɨtiharuani hepaɨti'utɨ yuyuawimekɨ.15Teuriteya huta 'ikitsaraɨyari pɨhɨkɨ 'anuyexawawatɨtɨhuru mɨhɨkɨakɨ yuwetɨkaitɨ.Hɨxiena xɨka 'uyeikani pumariwekare,Riwanu muyeikani hepaɨ kariuxa tsata.16Tenieya kanakakani,mɨkɨ witsikani'aneni 'uki.Mɨpaɨ kani'aneni 'uki neminaki'erie, nehamiku,'ukarawetsixi Kerutsareme kiekatari.