1Bulya okuderhwa kubî n’olubaga lwoshi, ziri nshonyi bwenêne, kw’ali ntyo omunya-byâha w’enderha-kubirhi.2Orhacîrekêreraga ebwa murhima gw’amagene, gwakanakuyâgaza nka mpanzi nkali,3erhi gukuyône, gukunînibuze gurhakusigire ehishulo, obone wamacibêra karhî-kumu.4Murhima guli magene, lushilmyo oku muntu, gunarhume abashombanyi bâwe bakushekera.
Obwîra
5Akanwa kinjà kanalêrhere omuntu bîra banji, oluderho lw’obutûdu lunarhume omuntu ashuzibwa bwinjà.6Okômere bantu banji, ci nka muhanûzi walonza, orhôle muguma omu cihumbi.7Nka walonza omwîra, orhangimurhangula, orhayirukiraga wâmubwîra amahwe gâwe.8Bulya omwîra w’ebijingo, anakurhibemwo sêzi ehibanja hikujakwo.9Mwîra-ngwêrhe anahinduke mushombanyi-ngwêrhe, akubere enda, enshonyi zikugwârhe.10Mwîra-ngwêrhe, analire oku mêza gâwe, hano ohanyagala, akuyâke.11Amango ogwêrhe, we ye aha mwâwe erhi aha mwâge,12lindag’okene, obè mubisha omu babisha, akuyâke wakanamulola omu masù.13Ocîzibuke abashombanyi bâwe, ci omanye n’abîra bâwe.14Burhabâle bunene, omwîra nkana, okumubona kuli kuhirhira.15Omwîra nkana arhagulwa, ntâye wankabona ebi amugula.16Mavurha ga buzîne, omwîra mwinjà, abarhînya Nyamuzinda bône bamubona.17Omuntu orhînya Nyamuzinda, alonza abîra binjà, bulya oku omuntu ali kw’anayinjibana.Okuyiga oburhimanya
18Mwâna wâni, kurhenga eburhò bwâwe, osîme okucîyigîriza, kuhika obè wa mvi, wabona oburhimanya.19Kul’omuhinzi n’omurhwêzi banajira, nâwe oshîbirire oburhimanya, olingûze oku bwayêra, warhama nsiku nsungunu z’okuhinga, ci amango g’okusârûla, wâyumva osîmire.20Kurhamya barhamya abahwinja, ecingolongolo cirhabukwirirwa.21Kuzidoha buzidohera nk’ibuye lizirho, arhimangibukabulira.22Bulya nêci ihano likwânîne izîno lyâlyo, lirhabona ngasi ye.23Yumva, mwâna wâni, enkengêro zâni, orhalahiraga ihano lyâni,24Oyêmêre emigozi y’oburhimanya ekushwêke amagulu, n’empogo yabwo ekuje omu igosi.25Oburhege ecirhugo buzidoherekwo, orhacîdirhibulaga mpu bwakushwêka.26Obujè hôfi n’omurhima gwoshi, ojè omu njira yabwo n’emisî yoshi.27Okulikire amashando gâbwo, obulongereze, wâbona oku bwacimanyîsa, orhacihulikaga hano obuhikakwo.28Bulya aha buzinda wâburhamukiramwo, gubè mwishingo gwâwe.29Eyàli migozi eshube mpenzi, n’ezàli mpogo gabè magerha ga mulimbo.30Ogwali muzigo gw’obujà gubè mwambalo gw’irenge, eyàli migozi ya kushweka zibè nnigi za mulimbo.31Okubundi oburhimanya obuyambale nka mwambalo gwa lusiku lukulu, ohwinje bwinjà, obuyambale buny’ishungwè ly’ebwâmi.32Mwâna wâni, erhi wankalonza wanacîyîgîriza, n’obutûdu bwâwe bwakuhisa oku bukengêre.33Wâyiga akabà osîma okuyumvîrhiza, akabà oyishirhega amarhwîri, wâbà murhimanya.34Osîme okujà ah’abashosi bali, n’okabona omurhimanya, omukomekwo obwîra.35Oyumvîrhize ngasi kanwa karhengako Nyamuzinda, emigani mizibu erhakufumaga.36Mang’okabona omuntu murhimanya, onalamukire aha burhambi bwâge, amagulu gâwe gamutwire ec’olusò.37Amarhegeko ga Nyamuzinda okazigagerêreza, okazigashîbirira bwaca bwayira. Ye wakuzibuhya omurhima, n’oburhimanya odwîrhe wacîfinja wâbushobôla.