Ebilôrho
1Okulangâlira obusha n’ebirhaboneke, kuli kwa musirhe, n’ebingolongolo byo birhambira ebilôrho.2Kuli kugwârha ecizunguzungu na kushimba empûsi, okulegerera oku bilôrho.3Ecilolero n’ebilôrho bishushîne, ocîloleremwo, wabona obusù bwâwe.4Cinjà cici cirhenga omu izinga? K’okuli kunarhenge omu bunywesi?5Okulagula, okukera engoko, ebilôrho, byoshi busha, kahalalo ka mukazi oli izîmi.6Akabà arhali Nyamuzinda obirhumire, orhabishîbiriraga.7Ebilôrho byarhebire banji, banji balibilangâlîre bahona.8Amarhegeko garhanywerha, Irhegeko lyôhe linakulikirwe buzira kurhebana, oburhimanya nabo bubà bwimâna burhabêsha.Okubalama
9Okubalama kuyigîriza binji, owagezire omu bihugo binji anamanye na binji, n’omuntu wabwîne binji yenayishiganîra.10Omuntu orhasâgijà omu malibuko, arhishi binji, ci owagenzire ayishi orhunjirhunji.11Nabwîne binji ebwa kubalama, ebi nayumvîrhe byo binji kulusha ebi nakamanyiderha.12Olufù lwampushire kanji kanji, nanatwa oku isî, alagi kurhi:13Abarhînya Nyamuzinda balama, bulya bamulangalîre, bulya bacîkubagîre owakanabaciza.14Orhînya Nyamuzinda arhayôboha cici, arhajuguma, Nyamuzinda ye abà acîkubagîre.15Iragi ly’omuntu orhînya Nyamuzinda, ndi ayimangîrekwo? Ndi ayegemîre?16Amasù ga Nyakasane, gayêrekîre balya bamusîma, ye mulîkûza, mutuga muzibu, ye mâkiro, omu mpûsi y’omu irungu, ye mbohôlolo oku idûrhu ly’akasirahinga, ye mucîka-ntambala, ye na mukoma-afungira-abâli-bahirima.17Kulengereza alengereza emirhima, azibûle amasù, ahûne amagala, akalamo n’omugisho.Enterekêro
18Okurhûla Nyamuzinda ebizimbano kuli kumushekera, entûlo z’ababî zirhamusîmîsa.19Ow’Enyanya arhabona oku ntûlo z’ababî, arhali bunji bwa mbâgwa burhuma ababalira ebyâha.20Kuli kuniga omwâna n’îshe asinza, okurhûla Nyamuzinda ebi wanyagaga abakenyi.21Ehitya hy’omukenyi ko kalamo kâge, okumunyagahyo kuli kumuyîrha.22Kuli kuniga owinyu okumunyaga ehi alamirakwo, oyîma omukozi oluhembo lwâge erhi mwîsi wa bantu.23Muguma ayûbake, owundi ashâbe, bunguke buci barhenzamwo aha nyuma ly’oburhè.24Muguma agishe, owundi ahehêrere: muguma ohi Nyakasane ayumva?25Owacîshuka kulya kubà anahumire omurhumba akanashubiguhumako, erhi cici acîshukirage?26Kw’ali ntyo omuntu ocîshalisa oku byâha byâge, buzinda kandi abishubîrire! ndi okolaga ayumva omusengero gwâge? Bunguke buci burhenzirage muli okwo kucîrhohya?