SIRAGA32hui_png

1Í̠na tomo nolene ogoni mo tiga bialu haru habelo dabo helayagua nde í̠na mine halu í̠ninaga mini yaraga holeni nahabe. Í̠ wali agali tomo nole ibiraru ti dombeneha ti tomo nelo baya hangu haru howa ti tomo nalu birai kagola í̠nibi nde ti haru mandagi birabe.2Í̠naga biabe bulene ngago biai howa ti heba mandagi turu ho biralimu. Anidagua beregola í̠naga biabe bayale birigonaga te dewa lalu birulebirago berelo ani bibe.3Agali wahe-o í̠na mbirale bibahende manda biai kego ainde í̠na te maru lolene bayaleda. Anigo í̠na iba gana mo ko holigo hendore mini wiadai buwa dege labe.4Wali agali tingini maru bialu kago í̠na bi hendore dege labe. Horo ogoni í̠naga mine howa manda ngego mo walia holenengi ndo.5Waini iba dendebi ngago heba ibagana lalu iba bayale heba mandagi birabe. Ogoni baya gibiore ngolome wabini ege pume mo yari bia hene ale wialu ege to̱le̱ bayale tara yolo dewaoreme miaga ngarume mo yaribia hene ngaligobi nga.7Igiri daliahe kego í̠na bi mbira lole heya layagua ogoni bayalego ainde tigua í̠hondo bi lole heya lalu halu kira olelo birabe.8Bi dewa nale howa bi kuni dunini lolene ngago dege labe. Manda timbuni bi hariyaguabi bi dewa nale ne hariga ndibulo habe.9Í̠ agali haguane bedaru baba mandagi birariyagua nde í̠bi agali haguane ti bedagobi dege kobe toba nahabe. Ani biruwa wali agali mbirago ibu bi laragola í̠ bi nale ne hariga ndibulo birabe.10Hari kulu nale wene dege lole ngelowa hari daba ala waga larane handaga. Anidagua dege wali agali mbirago ibu wali agali bu kagoria ibu ha nabi ngaore ti mini bayale mini lene ka lalu hale ho bamba haga nga.11Dawe halu tomo nalu birarimigo nai halu í̠ni andaga abale pobe. Maru ti piai kagola í̠ hangu biru waholigo abale pobe.12Í̠ni andagaha biruwa biradagua birulene karulape dege. Anigo mine howa kudaga bi dewa lalu bedegome í̠ha ko wuligo ala manda buwa bi labe.13Mbira ngago ladege bero. Anduane Homogohanda í̠ wabu helalu ibugua í̠hondo mbirale dewaore yu habelo nginigo í̠na ibuhondo ka̱i̱ lalu holene nga.

Anduane Homogonaga maname wali agali baya hangu lawai haga ngago ogo

14Wali agali Anduane Homogo gi halu ibu andaneha haga karu tigua ibunaga bi lawai harago hale halu talialu haga ka. Ani kagola Anduane Homogohanda wali agali ibu gubalini ho haga karu mo bayale haga ka.15Wali agali Anduane Homogonaga bi mana lo wini ngago baya hangu lo manda biaga karu tigua mana ngago manda timbuniore bulebira. Anigo wali agali ke̱ howa mana talialu haga tingi haga bu karu ti pi lalu pu ereba holebira.16Wali agali Anduane Homogo andaneha haga karu tigua mana tigabi ogoda lalu handa walia holebira. Ani bialu tigua biabe bayale biragome arumaha ngago mo wá haga.17Wali agali mana ko biaga kagome maru karume ti mo tiga bule bi lalu karia tigua uruni hale nahe bi larago mo wahaga ka. Ani bialu tigua mana mo beregedalu tinime hame ledago mo ngelaga ka.18Wali agali manda bayalebi kagome wali agalinaga mini ngaru bibahende mo tale biaga ka. Anigo wali agali mine haga bu karu tigua mbirale mbira gi nahaga ka.19Í̠na mbirale mbira bule manda bu hariyagua wali agali maru karu tinaga miniha ngago ala hale habe. Anidagua beregola biabe berego biai howa í̠ha mini burugu lolene mani nawualebira.20Í̠ pi loligo hariga ege tole̱ dewa uliwi ngagohabi napobe.21Hariga bayale wiagua nde mo ko holene nawulebirabe toba nahabe.22Anigo deme mamage baya hangu habe. Í̠ni waneigini karu tigua genda mo yu anda ibulene nga ndobe.23Í̠ni kegoha baya hangu mamage halu mbirale í̠na berego damene mamage howa bialu habe. Wali agali mana ogonidagua biaga kago ibugua Anduane Homogonaga bi mana lo wini ngago talialu hagane ka.24Wali agali Anduane Homogonaga bi mana hale halu taluwa bialu haga kago ibu baya holebira. Wali agali Anduane Homogohondo mini mbiraore wu kago ibuha mo ko holene naibulebira.
expand_more
Search