Okuhulika n’okuderha
1Hali ebinwa by’obukali birhalusire, hali n’okuhulika kuyêrekana omuntu w’obukengêre.2Okukaliha kwo kukulu aha kubîka obukunizi.3Omuntu ocîshobeka yêne erhi buhane afumire.4Kw’ali nk’enshahu yashimba okugwârha omunyere, omuntu wacîhambira okutwa olubanja n’akadali.5Lebè acîhulikire, abonekana murhimanya, oku lebè w’engamîzi acîshombanya n’omuvovo gwâge.6Lebè ahulisire kubula eci aderha, na lebè ahulisire kulinda agâge mango g’okuderha.7Omurhimanya mango agera g’okuhulika, ci kadegende n’omusirhe barhishigera mango.8Kadesi acîshombanya, n’omanya mpu yêne oyishiderha, nshombo acîzûkiza.Ebisômeza biluga
9Lebè ânacirira omu buhanya; hali oyu obuhanya buciza, haligi n’amango obucire bulêrha nyamanjà.10Hali okuhâna kurhayunguka, haligi n’okuhâna kuyunguka kabiri,11Hali amango irenge lirhohya omuntu, haligi n’abantu balengerera omu buligo bwâbo.12Hali ogula birugu binji n’ensaranga nsungunu, n’obwo bamukanzire kali nda kulusha.13Omurhimanya anasîmirwe ebinwa byâge, n’okuhâna kw’omuhwinja kuhere busha.14Ebi omusirhe ahâna birhaciza, bulya abikonolîre amasù mpu omugalulire kali kangana halya.15Oku arhahanyiri bici, abulihûna kulusha, anahâne nk’owahamagaza, ene akuhoze, irhondo ayishikulyûza: aba wa kukobwa.16Omusirhe anaderhe, erhi: «Ntajira mwîra, mbona mpâna ci ntabona cavuga omunkwa,17abalya ebyâni bajira akalimi kabî». Owa bene oyo barhahwa barhamushekera.Akanwa kabî
18Okusârhala n’amagulu kwo kukulu aha kusârhala n’olulimi; isârhala lya bene eryo lirhahumba mubî.19Omuhwinja kw’ali nka lulibi, ebinganyi bilujire lwimbo.20Ecihwinja cirhatwa mugani gwâkungwa, cihabe amango abandi bagutwa.21Hali oyu obukenyi bubêra mpenzi ya kurhanga ecâha, amango g’okurhamûka, omurhima gurhamulya.22Hali ocîheza erhi nshonyi zirhuma, acîheze mpu akenga omusirhe.23Hali olaganyiza omwîra wâge omu bwôba, hayishizûka enshombo y’obumâma.Obunywesi
24Okunywerha kubà kucîshûbula bwenêne, kurhahwa ekanwa k’ebinganyi.25Ecishambo co cikulu aha munywesi mukulu, cikwône bombi kuhera banahera.26Enkômedu y’okunywerha bubà buhanya, n’omunywesi nshonyi zirhahwa zirhamubumbiri.Obukulu n’embaka z’omurhimanya
27Omurhimanya acîkengêsa n’ebinwa byâge, n’omuntu mwenge ye abakulu basîma.28Omuhinzi kusârûla asârûla, n’osîmwa n’abakulu, anatumule anabuli babalirwa.29Okushegulwa n’okurhûlwa binarhume abagula bahûrha amasù, kubè kubashwêka akanwa mpu bakanaderha.30Oburhimanya bufulike n’obuhirhi bubishe, bunguke buci bijira?31Omuntu wafulika isirhe lyâge, ye mukulu oku wafulika oburhimanya bwâge.