1Eini taksônna taka râtngei hin eini râisânna rang rok loiin, râtloi ngei râtloina han ei san ngei rang ani.2Manêkin taksônna ei phun mindet theina rangin iempu dangei râiminsânin anni ranga neinun sa hah ei tho rang ani.3Asikchu Khrista khom ama râisânna rok maka. Pathien lekhabu'n, “Nang êro ngei êrona hah ku chunga achul zoi,” ati anghan ani.4Pathien lekhabu'n apêk ngâi sabeina renga tuongdierna le mohôkna ei nei theina rangin Pathien lekhabua lei inziek ngei murdi hah ei inchu rang ani.5Khrista Jisua nin jûi anghan nin lâia inngêina ratha han tuongdierna le mohôkna hah Pathien'n nangni min dôn senla.6Hanchu, nin rêngin rôl-ûm khatin ei Pumapa Jisua Khrista Pa le Pathien hah nin minpâk thei rang ani.
Jentailngei ranga Thurchisa
7Pathien roiinpuina rangin Khrista'n nangni a pom angin inpom inlôm chit roi.8Nangni ki ril, Pathien taksônomna minlangnân an richibulngei kôma a chonginkhâm tuontungin Khrista hah Judangei ruthûlin sinthopu'n a juong oma,9Jentailngei khomin a moroina sika Pathien an minpâk theina rangin. Pathien lekhabu'n:“Masikin Jentailngei lâia nang minpâk ka ta,Ni riming minpâkin uoi ki tih,” ati anghan.10Ati nôka,“Jentailngei Pathien mingei leh râiminsân roi,” ati sa.11Male,“Nangni Jentailngei murdi, Pumapa minpâk roi;Mingei murdi khomin minpâk rese ngei!” ati nôka.12Male avêlin, Isaiah khomin,“Jesse jâisuon la hong inlang a ta;Jentailngei chunga inlal rangin la hong om a ta,Ama chunga han an sabeina minngam an tih,” a tia.13Ratha Inthieng sinthotheina jâra sabeina nin sip theina rangin sabeina nâr Pathien han ama nin taksônna sikin, râisânna le inngêinangei nangni minsôn pe bang rese.
Paul'n hâitaka lekha a miziekna abi
14Ku sûngsuokngei, nangni hih satna akip, rietna murdi dônna, inril inlôm thei rang nin ni tiin tak ko sônchêt ani.15Nikhomsenla, neinun senkhat nangni min riet nôk rangin hâitakin ma lekha hih ki miziek ania, Pathien'n mi pêk moroina sikin16Jentailngei sinthopu rangin Khrista Jisua tîrlâm ki ni. Jentailngei hah Ratha Inthiengin minthienga Pathien inbôlna ringa khôktheiruo min ni ranga Thurchi Sa misîrna hin ochai angin ki sin ani.17Masikin Khrista Jisua leh inzomin hima Pathien sinthona hin insongna ke dôn thei ani.18Jentailngei ruoia Pathien chong min jômna rangin Khrista'n sintho le chongrilin keima mi manga, a sinthongei pêna chu ite dang ril ngam no ninga,19sininkhêlngei le sin kamâmruoingei, Pathien Ratha sinthotheina han mi manga, masika han Jerusalem le akôl revêla ram renga Illyricum dênin Khrista Thurchi Sa chu ku phuong let zoia.20Midang lungphûm chunga sinminding ki ni loina rangin Khrista la riet loina muntina Thurchi Sa phuong hi ku lungdo ani.21Pathien lekhabu'n:“A thurchi la rilna ngâi loina mingei han mûng an ta,A koura la riet ngâi loingei han riet an tih,” tia ânziek anghan.
Paul'n Rom khopuilien vapan rang a bôk
22Masika hah kêng ani, nin kôma hong rang ki minchâi titna ngâi.23Aniatachu, atûn hin hi ram revêla hin chu ki sintho ko zoia, kum tamtak nangni hong mu rang ke lei nuom ngâi anghan.24Spain rama se malamin nangni hong mu rang ko bôk ani. Chomola nangni le inlopkhôm zoiin, nangni sanna renga ka panna rang mun tieng se thei rangin ka sabei ani.25Atûn tak hin chu Pathien mingei sintho rangin Jerusalema la sêng ki tih.26Macedonia le Achaia rama koiindang mingei han phaltakin Jerusalema Pathien mingei kâra inriengngei rangin chôiruol an tho sikin.27Inphaltaka an tho ani, aniatachu an kôma an intâng sa piel khom ani. Asikchu, Jentailngei ratha satvurnangei Judangei an insempuiin chu rammuol neinun satvurna tieng khomin Jentailngei Judangei san rang anâng ani.28Ma hah ko tho zoiin, an sum ngei an kôm ka bâng let zoiin Spain rama se rangin nangni la hong lût ki tih.29Nin kôm ko hong tika chu Khrista satvurna akipin hong ki tih ti ki riet.30Sûngsuokngei, ei Pumapa Jisua Khrista le Ratha pêk lungkhamnân Pathien makunga chubai mi nin thopui tatak ngâi rangin nangni ki ngên.31Judea rama iemloingei kut renga ko jôk theina rang le Jerusalema ki sintho hih Pathien mingei khôktheiruo ani theina rangin chubai mi thope roi.32Pathien'n asa a tiin chu râisânna sipmata nin kôm ko honga ei har inruol theina rangin.33Atûn inngêina Pathien hah nin rênga nin chunga om rese, Amen.