Rom15mvn_jlb

Vavaneika Kavo‑vi‑dewa‑haiawi, Eha Itoka Aka Heta

1Vavaneiu, ekalesia nihenina yoko ainua imamaei. Tupwaka yaka vitumahana bagibagina, ka tupwaka yai vitumahana ihanuana. Itoka yaka vitumahana bagibagina yaka paisewa mamaei, vivane nau‑wawanika katoha‑vi‑anai taui yai vitumahana ihanuana wayahi. Aituhu itoka bagibagika kadewa‑haiawa, ka aituhu taui kanua‑paniei, dewana eha ahiahina.2Nau‑wawanika tuta tuta mani tomotau kavo‑vi‑dewa‑haiawi, e taui yai vitumahana yaka Kauvea wayahina natanata deina.3Iuna tutana Iesu omo tanopia, tauna eha aviani ya nuanua ta‑dedewe. Eha. Iginuma nihenina Iesu yana ipupu Yaubada wayahina apa‑taputapuei, ivona,
“Naona tomotau imana‑giboem.Ka ataina yauke aomo wayahia,ka kadu imana‑giboeu deina.”
4Yaubada ya tau apa‑taputapu aitamoata aitamoata yai iginuma mamaei. Ka Yaubada ya nuanua iginuma‑naia wayahi iviwaveneka, kadu aka pata nua‑vaniaha kavaniahei wayahia. Ka itoka nau‑wawanika kagwagwaheyei a itoava aviani Yaubada vona‑dabedabei kavaniahei wayahina.5Ka gwahea kadu ate‑vatu ainua kavaniahei Yaubada wayahina, ka tauna ya nuanua veneveneka deina. Ka yau viama itomi me Rom wayahimi Yaubada na‑ivaitemi Tau Ito‑yavuha Iesu uvi‑muni‑waiwaiei, e uvi‑putu unuanua aitamoata.6Wayahina, apaina itomi habuhabumi ami ayaunena aitamoata, ka kadu yami ipupu aitamoata. Ka aituhu uvi‑yoko aitamoata deina, ami pata Yaubada didigana uvo‑vi‑natei. Tauna yaka Kauvea Iesu Tau Ito‑yavuha Amana.

Vaneana Ahiahina Yoko Ainua Wayahi

7Nonova aitamoata aitamoata wayahimia tau goyogoyomi, kate Tau Ito‑yavuha awaehemi uvi‑niana tauna wayahina. Ka dewana wayahina Yaubada didigana nata. Wayahina, tuta ataina nau‑wawanimi unau‑kaiwemi kadu habuhabumi uvi‑yaiana aitamoata deina.8Unononi avonemi. Nonova Yaubada me Iudea ya vona‑dabadaba venei. Ka munia Tau Ito‑yavuha vinꞌ‑omo tanopia, ka vona ahiahina, tauna vona‑dabadaba‑naia ai nau‑itava. Ka kadu tauna vi‑tau paisewa itoai me Iudea wayahiai, ka viwaveneai Yaubada ya vona‑dabadaba yama tupua‑nenenehi wayahia vivane vona tunutunuhina.9Ka Yaubada ya nuanua kadu taui eha me Iudea ate‑nuanuai ivaniahei tauna wayahina, e munia taui tauna didigana ivo‑vi‑natei. Ka mataina habuhabuna Iginuma nihenina Yaubada ya nuanuana iapa‑taputapuei. Aitam mataina ivona,
“Yau nuanua awa‑davemtaui eha me Iudea mataia inononi,ka kadu yau ahe niheninaam wava asi‑nai inononi.”
10Ka kadu aitam mataina ivona,
“Itomi eha me Iudea nau‑wawanimitauna ya tomotau me Iudea nuiudewa‑haiawa.”
11Ka kadu aitam ivona,
“Itomi eha me Iudea habuhabuminau‑wawanimiKauvea uawa‑davedavei.Ika, itomi habuhabumipapani aitamoata aitamoata wayahinanau‑wawanimiuaheahe kadu uawa‑davedavei.”
12Ka kadu aitam mataina nihenina Isaia ginumi deina,
“Iese aitam abaniana, ka tauna wayahinaaitam dumna na‑tabo, na‑vane,ka dumnana taui eha me Iudea veimeyei.Ka taui yai nua‑vaniaha nuitauna ipotepotei, na‑ito‑yavuhi‑neiei.”
13Yaka nua‑vaniaha ahiahina vinꞌ‑omo Yaubada wayahina. Ka yauke yau viama Yaubada wayahina tauna na‑ivaitemi uvitumahanei, ka kadu yau viama tauna dewa‑haiawa wayahina kadu nua gomagomanina wayahina ainua vi‑nau‑vi‑anaimi. Iuna yau nuanua Nuana Ahihinata ya bagibagi uvaniahei, e munia yami nua‑vaniaha natanata, e na‑ito‑iwaiwahi.

Paulo Ya Paisewa Taui Eha Me Iudea Wayahi

14Vavaneiu, avaha anamane‑yehai itomi me Rom yami nua‑uya mamaei. Ka kadu anamanemi dewa tunutunuhina udedewei, ka anamanemi itomi ami pata vavaneimi kadu novunovumi uviwavenei.15Kate itomi unuani. Yaubada am‑venena awawaehina veneu. Yauke eha dewa ahiahina ata‑dewe, e Yaubada nau‑patau deina. Eha. Tauna veneu awawaehina. Ka kadu tauna awaeheu avi‑tau nau‑wahe Tau Ito‑yavuha Iesu wayahina, ka taui eha me Iudea anaunau‑wahei. Yaubada veimeyeu paisewana ananina adedewei. Wayahina, yami leta taina aginumi omomo wayahimia. Habuhabuka nuaka ni‑panipani. Wayahina, yauke eha ata‑ini‑yauyau pai mini ananina yaka vitumahana wayahina avona‑havinemi unuani. Iuna yau nuanua adune‑vivinimi ahiahina. Ka yau paisewa Yaubada wayahina aitam tau vi‑nomu deina. Iuna tau vi‑nomu yai dewa am‑venena‑kavovo iam‑veneneyei, e Yaubada ivo‑vi‑dewa‑haiawi wayahia deina. Ka yau nuanua taui eha me Iudea habuhabui aomanei Yaubada wayahina, aitam am‑venena‑kavovo deina, e taui Yaubada ivo‑vi‑dewa‑haiawi, ka Yaubada am‑venena‑kavovo‑nana nꞌ‑awaehei vivane tunuhina matana. Ka kadu yau nuanua Nuana Ahihinata bou‑keyemi, Yaubada ya nuanua tunuhina ana heta udedewei.17Yaubada paisewana ananina veneu, ka yauke Tau Ito‑yavuha Iesu wayahina apaipaisewa, ka didigau avaniahei paisewana wayahina.18Ataina eha kadu aitam paisewa wayahina aipuipupu. Paisewa aitamoata ana heta wayahina aipuipupu, vivane paisewana Tau Ito‑yavuha ivaiteu adedewei taui eha me Iudea wayahi. Yau vona kadu yau dewa wayahia taui eha me Iudea aeta‑naoei Yaubada ivi‑ateteyei.19Yauke anaunau‑wahei ka Nuana Ahihinata awaeheu iaiaya kadu dewa‑bagibagi adedewei idudueyei. Ka avi‑putu meagai Ierusalem wayahina, e Vaneana Ahiahina anaunau‑wahei taui eha me Iudea tenoke imamaei wayahia. Ka paisewana adedewei a itoava papani Ilirikum avaniahei wayahina.20Tuta tuta yauke yau nuanua ananina Yaubada nꞌ‑awaeheu yauke anaunau‑wahe taui eha Vaneana Ahiahina ita‑nononi wayahia. Nonova, tutana avi‑putu anau‑wahe, a itoava tuta ataina wayahina, yau nuanua ananina aeta‑naoi deina. Eha yau nuanua mani onotona ya nau‑wahe hetana ayoneyone.21Iginuma nihenina ivona deina,
“Tupwai tomotau eha aitam tutatauna vaneana ita‑nononi.Kate avi tuta mataedana inononi,akanai taui ianamanei.Ka kadu avi tuta taui mwagemwageivaneana inononi,akanai inua‑haui.”

Paulo Ya Nuanua Tauna Me Rom Na‑nau‑vi‑taui

22Paisewa ananina taina wayahina yauke yau nae bana mamanaina habuhabui akanai. Wayahina, tuta nonova a itoava tuta ataina wayahina, eha au pata ata‑omo yami meagai Rom wayahina. Kate ponimana habuhabui nihenia yau nuanua ananina anꞌ‑omo Rom wayahina, e anau‑vi‑taumi.23Ka avaha yau paisewa anau‑yehai papani habuhabui nihenia, vivane papani hawana taina awaniana imamaei. Baina eha kadu aitam papani ta‑mamae. Ka avaha yau vi‑nua‑hauhau aboui munia hawana aubo‑tamana aomomo papani Sipaini papanimia. Ka yau nae dobwana wayahina yau nuanua ana‑nu Rom wayahina, e kanau‑basekwa. Ka nui kamamaei tuta tupwana wayahina, e munia itomi tau ekalesia Rom ami pata una‑ivaiteu yau nae papani Sipaini wayahina.25Taina yau nuanua tuta tepakaia wayahina. Kate ataina paisewa tunina mamaei, kadu yauke nau‑wawaniu naona paisewana anau‑yehai. Tau ekalesia me Iudea Ierusalem wayahina am inavovo. Wayahina, nonova avi‑putu kina akwakwei ekalesia eha me Iudea wayahia, ka yau nuanua kina‑naia anꞌ‑epei avane Ierusalem wayahina, e tau ekalesia tenoke anꞌ‑am‑veneneyei, e aniani ivi‑maiei.26Paisewana vi‑putu deina. Tau ekalesia eha me Iudea imamaei papani Masedonia nihenina kadu imamaei papani Akaia nihenina. Ka yauke avaha amataedai tau ekalesia Ierusalem wayahia am inavovo. Ka tutana inononi, taui yai nuanua ananina am‑venena ivo‑vi‑aiaia ina‑ivaitei.27Ka taui idewa‑haiawa avaha am‑venena awawaehina iveneu. Kate udu! Taui nau‑wawani inau‑patai deina. Iuna dewa ahiahina nuai wayahi omoi wayahia me Iudea wayahikaia. Yauke dewa ahiahina nuaka wayahi aepei, anꞌ‑omo papani Masedonia wayahina kadu anꞌ‑omo papani Akaia wayahina, e dewa‑naia avo‑patai taui eha me Iudea wayahia. Wayahina, ataina taui nau‑wawani inau‑patai dewa ahiahina inini wayahi.28Akaka am‑venenana akwakwei na‑iakwa, e yau nuanua yaiau nui anꞌ‑omo Ierusalem wayahina. Ka aituhu nimaua kina‑naia avenei, anꞌ‑anamanei avaha ivaniahai. Na‑iakwa, yau nae papani Sipaini wayahina avi‑putu. Ka dobwana ana‑nu Rom wayahina, e itomi tau ekalesia anau‑vi‑taumi, kanau‑basekwa.29Tau Ito‑yavuha avaha nau‑iaiava habuhabuna nuaka wayahi veneu, ka avaha anamanei tauna ya nuanua nau‑iaiava‑naia avo‑patami uvaniahei.

Paulo Me Rom Viamei Taui Iviama Tauna Wayahina

30Vavaneiu, ataina yauke avo‑vi‑vatumi yau paisewana ananina wayahina una‑ivaiteu yami viama wayahina. Ka kadu avitumahanei yaka Kauvea Iesu Tau Ito‑yavuha ya nuanua una‑ivaiteu deina. Ka aituhu avaha dune‑nuanuai uvaniahei Nuana Ahihinata wayahina, akanai nau‑wawanimi uviama Yaubada wayahina, e una‑ivaiteu deina.31Wayahina, aviamemi Yaubada uviamei avi tuta papani Iudea avaniahei, akanai tauna dune‑viviniu ahiahina. Iuna tupwai tomotau tenoke imamaei eha Iesu ita‑vitumahane, ka taui manimanini. Ka yau nuanua Yaubada uviamei tauna tomotaui nimaia na‑ito‑yavuhiu. Ka kadu nau‑wawanimi uviama tau ekalesia me Iudea meagai Ierusalem imamaei iawaehei yau paisewa taui wayahi vivane dewa ahiahina.32Ka paisewa tanoi habuhabuna na‑iakwa, e aituhu Yaubada ya nuanua, kadu aituhu tauna nꞌ‑awaeheu, e yauke avenau‑haihaiawa wayahimia, e nui kavi‑yawai.33Ka yau viama wayahimi Yaubada nui umamaei. Nua gomagomani‑hoina vinꞌ‑omo tauna ana heta wayahina. Ana pata deina.
expand_more
Search