Irumaniyyen11rif_lti
Min iqqimen n Israil d řefruɛ iřeqqmen
1Maca necc ad iniɣ: Ma yugi AREBBI xenni řgens nnes? Ɛemmarṣ! Aqa necc simant inu ɛawed d ijj n weryaz zi Israil, zi zzariɛet n Ibrahim, zi teqbič n Binyamin.2AREBBI war ineṭṭar ca řgens nnes i tuɣa issen zeg umezwaru. Niɣ war tessinem ca min iqqar Wedlis Iqeddsen x Iliya, am mammec tuɣa iksi tanfuč x Israil ɣar AREBBI, inna:3“A Sidi, nɣin inabiyyen nnec, areddǧen iɛalṭaren nnec. Qqimeɣ necc waha, uca nitni arezzun řeɛmar inu.”4Ittwanna as s ijj n řewḥiy:“Aqa jjiɣ i yixef inu sebɛa-ařaf n yeryazen, inni war ḍrin ca ɣar iḍaren zzat i Baɛal, war ɛebden i Baɛal.”5Ammu di řweqt n yiḍa ɛawed, aqa iqqim yijj n řbaqi am t ixḍar Netta x řeḥsab n arḍa.6Mařa teǧa s arḍa, aqa war tᵉttiři ɛad s řexdayem, niɣ xenni arḍa war iǧi ɛad d arḍa. Maca mařa s řexdayem, war teǧi ɛad d arḍa. Mařa lla, aqa řxedmet war teǧi ɛad d řxedmet.7Min ɣa nini xenni? Min tuɣa tarezzu Israil war t tᵉṭṭif, maca inni ittwafarzen ṭṭfen t uca inneɣni dewřen d idarɣařen deg wuřawen nsen,8am mammec tura:
“Aqa AREBBI iwca asen arruḥ iḍbaren d tiṭṭawin i war ittwiřin, d imezzuɣen i war ittesřin, ař ass n yiḍa.”9Dawud inna ɛawed:
“Ad tedweř tazewḍa n tiɣarṣin nsen d řfex i nitni, uca ad tedweř řmunet nsen d tɛenkrift.10Ejj ad darɣřent tiṭṭawin nsen ḥima war ttwiřin nitni, uca ejj ad qewsen iɛurar nsen i řebda.”11Maca necc ad iniɣ xenni: Ma nderfen, maɣar ittxeṣṣa ad wḍan? Ɛemmarṣ! Maca s uweṭṭu nsen tiweḍ-dd Tudart i řegnus, ḥima ad dewřen ttasmen.12Mařa idweř unedref nsen d agřa d ameqqran i ddunect uca řḥukm xasen d agřa i řegnus, mecḥař qaɛ i ɣa yiweḍ uɛemmar nsen d afeyyeḍ.13Aqa ssawařeɣ akidwem, a řegnus, necc d wenni d rrasul i řegnus, aqa ttssemɣareɣ di řxedmet n tsexxart inu:14Ad taɣ ad zemmareɣ ad ssekkareɣ tusmi deg ayt n řgens inu uca ad ssnejmeɣ ca zzaysen.15Iwa, mařa amenḍar nsen aqa-t d aṣřaḥ i ddunect, mammec ɣa yiři wedwař nsen mɣir d Tudart zi taddart n imettinen!16Mařa tuɣa tamezwarut n ṣṣabet tqeddes, amenni uřa d řɛejnet n arecti tqeddes! Mařa tuɣa aẓwar iqeddes, amenni uřa d řefruɛ.17Uca mařa ttwaqessen ca n řefruɛ u xenni cek, am yijj n uzemmur n řexřa, tᵉttwařeqqmed deg wemcan nsen, tdewřed tnefɛed zeg iẓewran d zzect n tzitunt,18war tuff ca x řefruɛ. Mařa tuffed, ssen, aqa cek war teksid ca aẓwar, maca aẓwar iksi cek.19Ad taɣ ad tinid: “Aqa ttwaqessen řefruɛ, ḥima necc ad ttwařeqqmeɣ.”20Iwa, nitni ttwaqessen zi ssibbet n břa l’iman nsen, uca cek s l’iman tᵉttwařeqqmed uca teksid amcan nsen. War tuff ca, maca ggʷed.21Minzi mařa tuɣa AREBBI war ittceṭṭar ca x řefruɛ n ṭṭbiɛet, war xak ittceṭṭar ca ɛawed.22Aqa da d řeḍrafet n AREBBI d řewɛaret nnes: řewɛaret x yinni iwḍan, maca řeḍrafet xak mařa tᵉṭṭfed di řeḍrafet nnes, niɣ uřa d cek ad tᵉttwaqessed.23Uřa d nitni ad ttwařeqqmen, mařa war qqimen di tikkest n l’iman nsen, minzi ɣar AREBBI tizemmar, ḥima ad ten iřeqqem ɛawed.24Minzi mařa cek, wenni iǧan s ṭṭbiɛet d ijj n uzemmur n řexřa, tᵉttwaqessed uca tᵉttwařeqqmed di tzitunt taṣebḥant, mecḥař ihewnen ktar ad ttwařeqqmen nitni di tzitunt nni dd-ittasen ak-d ṭṭbiɛet nsen!25Minzi ttexseɣ ad tessnem ssirr-a, a aytma, ḥima war ttiřim d imiɣisen ak-d yixef nwem, aqa temsar ict n usdaɣeř n wuř x Israil i drus n řweqt ař dd ɣa yadef uɛemmar n řegnus,26uca xenni marra Israil ad tedweř ɣar Tudart am mammec tura:
“Amsenjem ad dd-iffeɣ zi Ṣihyun uca ad issbeɛɛed řmuɛṣiyyet x Yaɛqub.”27”Xenni ad ṭṭfen di Řɛahd i dd-yusin Zzayi, x minni i ɣa ɣfareɣ i ddnub nsen.”28Zi jjihet n L’Injil nitni aqa d řɛedyan di ṭṭweɛ nwem, maca zi jjihet n řixḍaret i zi ttwaxḍaren nitni, aqa nitni d imɛizzen x ssibbet n řejdud.29Minzi AREBBI war ittbeddař tawhibt nnes n arḍa uřa d třaɣit nnes.30Minzi am mammec tuɣa kenniw zic war tᵉṭṭiɛem ca AREBBI, maca řexxu aqa teksim arreḥmet s řmuɛṣiyyet nsen,31ammu nitni ɛawed war ṭṭiɛen ca řexxu i arreḥmet tenni xawem dd-yusin, ḥima ad xasen dd-tas arreḥmet.32Minzi AREBBI iḥebbes i-ten marra sadu řmuɛṣiyyet, ḥima ad ten yarḥem marra.33A, raǧaɣ n wagřa d tiɣit d tussna n AREBBI, mammec ɣa yegg bnadem ad iqeǧeb řeḥkamat nnes, mammec ɣa yegg ad yaf ibriden nnes.34“Minzi wi ɣa issnen nneyyet n SIDI?” niɣ: “Wi d as iǧan d amcawar?”35niɣ: “Wi d as izzaren iwca as ca, umi d as ittxeṣṣa ad ittwaxeǧeṣ zzayes?”36Minzi marra zzayes i iǧa, u marra dayes, u marra aqa-t s ufus nnes. I Netta i ɣa yiři marra asemɣar d marra lbaraka i řebda qaɛ. Amin!