1Wi malaakaani yatuusɗoh kuluɓ, ŋ hotta hor ŋ kehƴi, keenoh eel ci. Wa eɗuusa caaɓndiŋ nunga topaaɗiina.2Wa rangissa nunga topaaɗiina, ɗuuku puloheeɗa nga haa ɗuuku puur yakiɗ, nohi na jawuuni ñuussa tuɗ sagu ɗuukra.3Njeeleer ci puleeɗa ŋ ɗuukreem, ca yongeeɗa kehƴi ; ca eɗuusa hatil ndangal.4Ca sangohuusa tum miskiɗ paangiici na kidig ci na in nu na paare ɗah, waaye ca yurhiɗuusa ŋ ɓo' ci raakɗi ñaasiŋ Kooh ŋ puk ciŋ ɓa.5Ca onseeɗi ne ca ap ɓa, waaye ca onsee ne ca mbugal ɓa rek ini ree caɓin yatuus. Miskiɗi ca eɗohee hendee na wiŋ tap ndangal.6Ŋ mbeh ceem, ɓooɓi hey waake kakaan te ɓa hotanɗaa. Ɓa hey maɗe kakaan waaye kakaan ki nupan ɓa nup !7Njeeleer ceem ca mand na panis ci tokɗu ne ca kaɗ hiñoha ; haf ciŋ ca raakee in mand na mbahne-buur haɓɗohu in mand na urus, fikiiciŋ ca mand na fiki ɓo'.8Ca raakee find haa find ɓitiɓ, te sis ciŋ ca mannda na sis gaynde.9Daɗ ciŋ ca haa ca ɓekuk tiwiñ te ɗuuɗiŋ paɓ ciŋ ca mannda na ɗuuɗ wotiir panis laayiɗ ci faɗsuk hiñoh.10Ca raakee kose raakiɗ tapoha findi ceek, ini ca mbugalohee ɓooɓi caɓin yatuus pulohee ŋ koseeceem.11Malaakaanaŋ nunga topaaɗiina a yi buuriŋ ca ; a teeku Abadoon ŋ heber, a teekuusa Apoliyoon ngaŋ gerek, wa tokis yahrohoh.12Naamooni koc cootiɗ, ƴut ɗah naamo kanak ceɗi hay.
Kulɓa yasna-yino'ɗoh
13Wi malaakaani yasna-yino'ɗoh kuluɓ weɗ ŋ kerhoh hooso. Hoosooreem pulohee wiic [ci nikiis] ci nik ŋ koñ ciŋ seeƴkohaani ursi nik ŋ fiki Kooh.14Hoosoori woosa malaakaani yasna-yino'ɗoh, yi ɓay kulɓi ne : « Faɗsa malaakaaca nikiis ca ceenu ŋ sero Ewfaraat, kala yakka. »15Malaakaaca nikiis ca faɗsuusa, ceɗ kooɗkiɗassee ne ca ap haaƴ yino ŋ haaƴ ci kaahay ciŋ ɓooɓi gen kehƴi, ŋ kiis keem na caɓneem na mbeheem na wahtuuneem.16Hiñohoh ca rapee panis ca, ŋ woyseen findi ɓa hend, ɓa nikee milyong teemet-kanak (200.000.000).17Ŋ ini ŋ hot findi heeƴ, panis ceem na ɓi rapee ca ɓekkee teemb ŋ daɗi tiwiñ ruumind haa yongkaah, na bulo cim, na mbohha haa suufar. Haf ciŋ panis ci mand na haf gaynde, nguɓ ciŋ ca pulɗeeɗa yongkaah na ɗuuku na suufar.18Haaƴ yino ŋ haaƴ ci kaahay ciŋ ɓooɓi apuusa ŋ naamooci kaahay ci pulohee ŋ nguɓ ciŋ panis ci : yongkaaha, ɗuukra na suufara.19Hatiliŋ ca nikee ŋ nguɓ ciŋ ca na koseeciŋ ca : Koseeciŋ ca mandee na iiñ ; ca raakee haf, ca tumohee miskiɗ na haf ceem.20Waaye ɓo' ci ɓinooɓi, ɓi naamooceem apeeɗi, ineem taheeɗi po ɓa ɓoƴsohha tumohaaɗ. Ɓa rissa na nataal ci ɓa haɓɗoote, ɓa rissa ñaamuk jiiniici, na kooh ci ɓa haɓɗohee urus wala haalis, moos wala atoh wala ndooɗ, ci minɗi hot minɗi kerah, minɗi tiind.21Ɓa faɗɗi apoh, ɓa faɗɗi tamb kiŋ ɓa, na faankoh sangohuuɗ, na rok.