Diospa marcashan runacunata ricapurü mana cunchupäcugtam
1Chaypita ricapurü chruscu angelcunatam, cay pachachru chruscun lädupapita walyay jarcararcayagta, mana cay pachamansi, ni gochramansi, ni ima jachramansi mana walyamunanpag.2Ricapurütan juc angeltas inti yargamunanpita aywayämugta. Payga apamunag cawayag Diospa unanchacunantam. Chaypitam chay chruscu angelcuna cay pachatas, jatun gochratas lutanta rurapäcunanpag nishataga, gayachracuypanuy cay nirun:3“Ama ima lutantas rurapäcuyragchu cay pachatas, ni gochratas, ni monticunatas Diosninchi servig runacunata urcunchru marcapäcamungancama”.4Chauraga mayarü “Israelpa chay lapan castancunapita, juc pachrac, chruscu chrunca chruscuyog waranga, nä unanchasha capäcungantam. Chaycuna capäcunag:5Judäpa castanpitam chrunca ishcayniyog warangaRubenpa castanpitam chrunca ishcayniyog warangaGadpa castanpitam chrunca ishcayniyog waranga6Aserpa castanpitam chrunca ishcayniyog warangaNeftalïpa castanpitam chrunca ishcayniyog warangaManasespa castanpitam chrunca ishcayniyog waranga7Simeonpa castanpitam chrunca ishcayniyog warangaLevïpa castanpitam chrunca ishcayniyog warangaIsacarpa castanpitam chrunca ishcayniyog waranga8Zabulonpa castanpitam chrunca ishcayniyog warangaJosëpa castanpitam chrunca ishcayniyog warangaBenjaminpa castanpitam chrunca ishcayniyog waranga unanchasha” nimugta.Caychru waquin runacunatas ricapurütan jana pachachrüga
9Chaypita rircärirga ricapurü alisca achca runatam lapan nacioncunapita. Paycuna capäcunag tucuy castacunam, tucuy rimayniyogcamam, lapan marcacunapitam. Paycuna chay trönuchru tayayag Diospa, jinaman Achrcashnuysi cayagpa naupanchrümi, yurag jacushacama, räman aptashacama shayarcayänag. Nätan manam pisi yupayta atipänagchu.10Paycunaga lapanmi gayachracuypanuy alawapäcunag caynuypa:“Wac trönuchru cayag Diosmi,jinaman wac Achrcashnuysi cayagmi salvamasha canchi” nir.11Chauraga shayararcayänag chay trönu muyurigninpaga lapan angelcunam. Chay angelcuna naupanpam muyurarcayänag ishcay chrunca chruscuyog mandacuna. Chay mandagcuna naupanpam muyurarcayänag chruscu angelnuysi cayagcuna. Paycunam gongorpacuyur lipucayärin umancunas pampaman tupangancama cay nir Diosta alawarcayar:12“Razonpa ali nisha,jinaman alisca alipag ricasha cachun Diosninchiga,yachrag canganpita, munayniyog canganpita, calpayog canganpita.Chaynuylar alawayäshun, ‘Gracias’ niyäshun imaypita imaycamas.Chaynuy cachun” nir.13Chaura chay mandag runacunapitam jucga tapuraman cay nir: “¿Pïcunatag carcayan cay yurag jacushacunaga? ¿Maypitatag aywararcayämun?”14Nimaptinga cay nirümi: “Munayniyog, gamga musyayanquim”. Chauraga nimanmi: “Paycunaga chay ima-aygatas alisca cunchurmi cayman aywararcayämun, jinaman chay Achrcashnuysi cayagman yupachicurmi mana juchaynag carcayan.15Chaymi paycunaga wac trönuchru tayayag Diospa naupanchrüsi,jinaman Diospa cacunan wayichrüsi, pagaspas junagpas servircayan.Nätan trönuchru tayayag Diosmi canga paycunawan, paycunata washananpag.16Chaura paycunataga manam ni micanapäcungasni yacunapäcungas,ni manatan juc acaysini intipa acayninsi rupangachu.17Chay trönuchru tayayag Diospa naupanchru Achrcashnuysi cayagmi ricanga uyshata michignuysi.Jinaman paymi uyshata yacuta upyananpag pucyuman pushapagnuysi cawachinga imaycamas.Chauraga nä manam pisi wagangachu” nimanmi.