Dilava Ena Da'alaabi Kauta Sinavu Boutai Sinavu Ka Vaninavui Vani (144,000) Ba'utai Loi Deabi.
1Kanaua mulinai anelu vani kanobata 'unipuata vani delavata avu aikata, kanobata ena lani vani deabita kao, sia lani ka kanoai 'o 'atuai be'unu 'o au ka bevivua.2Inoku anelu edeana ka vaka dae duasi ele'au easi aikaia, mauli Dilavana ena koa i'ulena davana eabia. E'ae lao 'unu'unu anelu vani kataua Dilava eta'u siavu evenita kanobata mai 'atu bevasi'avanata aneluta e'outa ediaka,3“Oi kanobata 'o 'atu 'o au sia oi bovasi'avanata beda'amo eta Dilava ena da'alaabi kauta ba'utai koa i'ulena davana lai bane'ea.”4Inoku koa i'uleta davata deabi kauta devakuta leleta aika 'eva da boutai sinavu ka sinavu vaninavui vani (144,000), ia boutai 'eva Isalaela iduvuna 'ouka lua etai deasi.5Iuda iduvuna kauta kataua koa i'uleta davata deabita kauta 'evada boutai 'ouka lua (12,000),Lubena iduvunai 'evada boutai 'ouka lua (12,000),Kado iduvunai 'evada boutai 'ouka lua (12,000),6Asele iduvunai 'evada boutai 'ouka lua (12,000),Napatali iduvunai 'evada boutai 'ouka lua (12,000),Manase iduvunai 'evada boutai 'ouka lua (12,000),7Simeona iduvunai 'evada boutai 'ouka lua (12,000),Levi iduvunai 'evada boutai 'ouka lua (12,000),Isakala iduvunai 'evada boutai 'ouka lua (12,000),8Sebuluna iduvunai 'evada boutai 'ouka lua (12,000),Iosepa iduvunai 'evada boutai 'ouka lua (12,000),mai Beniamina iduvunai 'evada boutai 'ouka lua (12,000).Kau Mato Namavaikana Tubu'ata Deva'ita Devadodo Dilava Dekukudivo Venia.
9Dava katania mulitai akailao 'eva kau mato namavaikana sia kau ka bemavakuta bemadaia, kanobata ka ka ai, iduvu ka ka ai, kau edeata edeata mai lele edeata edeata, lovia imia'auna 'abuna vailanai mai Mamoe nakuna vailanai delava aikata. Ia 'eva tubu'a deva'ita lakavaikata devadodo mai imatai 'eva vakolo uauata deabi.10Inoku devaoi 'unu'unu dediaka,“Vamauli 'eva eta Dilava,lovia imia'auna 'abunaiemia'au kauna,mai Mamoe nakunaetai e'asi.”11Anelu boutai 'eva lovia imia'auna 'abuna, 'aida'aidata kauta mai mauli davata vani delavata kaiu. Mai Lovia imia'auna 'abuna vailanai dekuidula vailata kua eda'aia inoku Dilava dekukudivo venia,12dediaka,“Amen!Akuabalai, nuavi, nuakomolo,vanama'ina luvata, 'olaaku,siavu mai kula'ila 'evaeta Dilava enai bemia keini keini.Amen.”13Inoku 'aida'aidata kauna ka elavuai'u ediaka, “Tubu'a laka'ita deva'ita devadodota kauta katania 'eva kau davata? Maivaka a'ia'i de'asi?”14Lau ena luva avamuea adiaka, “Loviamu e, oni oikabasi.” Inoku e'ou'u ediaka, “Kau katania 'eva anaana namavaikana laloanai dela'asi deasi kauta, ia eta tubu'a laka'ita 'eva Mamoe nakuna lalanai 'ani dedeinita inoku devadeva'ita.15Kanaua dainai,ia 'eva Dilava ena lovia imia'auna 'abuna vailanai delalava,inoku ena luma kabukabuna laloanai boni mai laniia da'alana de'abi.Inoku lovia imia'auna 'abunaakanai emia'au Dilavana 'eva enaaiole ai bevaaota akatai beva'auta.16Ia 'eva sia bevikolo kovo,sia vei bata beba kovo.Melala siavuna sia bekalata 'osia siavu davata ka bevalo'olo'ota.17'Olana Mamoe nakuna loviaimia'auna 'abuna bo'adanaiemimia 'eva ia beikata kao itanimamoe i'imata kauna boina,ia betata'u be'ana'ia vaitabedada'a mauli veinaebubudi kevanai,inoku Dilava betata'u ilulumakata boutai makataibeukuta ovo.”