1Taragl yegl erekondungo ana okuwo na kaniga angelo 4 ye makan uglomugl ande umara ya beimara te nigl bre beiye andigl mogl, ana makan koglkoglo irmo 4 i eremogl makandle ya mundi nigl te endi mina ir mangekrambedi ake gidi meglkwa.2Ana na kaniga ande umara angelo ta ende egli ungwa. Ye eremogl God kor aimande moglkwa muno pandigl tongwa taragl ake mogl ana angelo 4 ye makan ya mundi nigl erekinde eraglmedi yombuglo tongwa ikra ye agle kande ditendre,3yegl dungwa, “Ene makan ya mundi nigl te endi prapra erekinde erekriyo ana nono God nigl-kongunmo yomba mamburo wagle muno si eglyei tomun ana okuwo ene taragl i prapra erekinde eraglkwa.”4Ana Israel yungu ombuno prapra mina yomba God munomo pandigl tongwa i namba digo na pirka 144,000.5Juda yungumo ombuno minayomba 12,000 God munomo pandigl tongwa,te Ruben yungumo ombuno mina 12,000,te Gat yungumo ombunomina 12,000,6te Aser yungumo ombuno mina 12,000,te Naptali yungumo ombuno mina 12,000,te Manase yungumo ombuno mina 12,000,7te Simeon yungumo ombuno mina 12,000,te Levai yungumo ombuno mina 12,000,te Isaka yungumo ombuno mina 12,000,8te Sebulun yungumo ombuno mina 12,000,te Josep yungumo ombuno mina 12,000,te Bensamin yungumo ombuno mina 12,000.
Yaglambu merkinde kaima gagl kruwo ende God dembiye site meglkwa
9Taragl i dundungo okuwo na kaniga yomba merkinde kaima meglkwa. Ana yomba suwarata kere kuno erambuka manga, i dumo makan koglkoglo yomba wingwa, yungu ombuno kanekane ya yomba nangino kanekane pangwa ya te ka kanekane dingwa undre ana sia king ya Sipsip Nangigle gumanomugl andigl meglkwa. Ye gagl kruwo olto ende pandigl ana endi palm yongagle yaundo pango ake meglkwa.10Ye ka kande di yegl dingwa:“Nono Godno ye sia kingmina amedi moglkwa ya teSipsip Nangigle ye nono ereimbriko nono wakai mounga.”11Ana sia king yomara i ya yomba mina ende okuna eingwa ya te taragl 4 kor-meglkwa ikra meglmara igle ana angelo prapra andigl mogl winambodi isuna endingwa. Ana ye prapra sia king yomara gumamugl goglkuno bondugl God dembiye karaugl ere tendre,12yegl dingwa:“I kaima! No Godno dembiyesindre ana kangiye kandedipene endinamga! Yenomanemo wakai kaimapangwa, ye diwakai yeitenamga, te ye kangiyedembiyesi mitna imboendinamga! Ye yombuglomokande kaima pangwa! Teyombuglo gigle dungwa iprapra ye mina pangwa! Iprapra God mina aimandeaimande panambuka! I kaima!”
Yomba epigl i giuglno erme dundungwa
13Ana yomba mina ende okuna eingwa yomba ikra suwarata krapogl narkwa, “Yomba gagl kruwo olto ende meglkwa i ye irane? Te ye dumo aglokra wime?”14Ana na ka yegl di ikine endiga, “Yagl kande, i ene pirkan etnga.” Ana ye yegl di narkwa, “Yomba i kunda ikine onguno mina ye pigle goglne wanmogl wingwa, te ye gatno suna Sipsip Nangigle bormaimo mina nigl keglko wu kruwo kaima ongwa.15Ipre,“God siamo king minagumamugl andigl mogltre anaermine ya enduwer God holiyungumo mina dembiyekaraugl ertre meglkwa. Yegleriko ana sia king mina amedimoglkwa ikra ye bogl akiyemeglmbi ana sutno wakai mogl tenambuka.16Ye aglketa kindan goglkrete nigl pre aglke ta goglkraglkwa. Ana ande sinan yeta de giu goglkraglkwa, tetaragl kanekane ta erannangino mina ninga dikrambuka.17Sraglpre, Sipsip Nangigle,God siamo king mina sunawom amedi mogl ana yomba iye sutno wakai mogltre anaauro ipi niglkor aimandeyange pamara suna igleenambuka. Te ye ongumutnomina kai nuglo prapra i Godkoko ende tenambuka.”