Israel-dulemar mili-dulagugle-gakabake (144,000) wilubgan nasiklesmalad
1A-sorbali, baliwiturmar-walabake napneg-naid-sukun-sogabakegi gwichi an daksad.Gwensak, dad-nakwedsik gwichid,baiddi, dad-argwanedsik gwichid,baiddi, dad-nakwed-argan-nuedsik gwichid,baiddi, dad-nakwed-argan-sapiledsik gwichid.Deyobi, we-baliwiturmar, burwa-goled-sogabakegwad-bargani gwichimalad.Adi, we-burwamar melle napagi, demargi, degi, sapimargi, gormalagar.2Degine, baliwitur-baid dad-ibeler-nakwedsik-daniki an daksabalid, Bab-Dummad-Dula-Maid-e-wilub-nasikleged sedanikid. A-baliwitur, baliwiturmar-walabakegwadse binnasur goted. We-baliwitur-warbakegwadga, napneg-ichogega, demar-ichogega, gangued uklesgusad.3We-baliwitur-wargwenad baliwiturmar-walabakegwadga sogded: “Melle be napneg oichomargwer, melle be demar oichomargwer, melle be sapimar oichomargwer. Bina anmar Bab-Dummad-e-maiga-gudimalad-e-bebegi Bab-Dummad-wilub bela nasikgweloed. A-sorbali, geb be napneg oichomalo.”4Agi geb an egi-wilubgan-nasiklesmalad-mergued-bileged an itosad. Bela, mili-dulagugle-gakabake (144,000) gumalad. Wemar, Israel-dorgan sogambe-gakabogwad-bukwadgi (12) sulesmalad.5Judá-e-wagangi, miliambe-gakabo wilubgan nasiklesad (12,000).Rubén-e-wagangi, miliambe-gakabo wilubgan nasiklesad.Gad-e-wagangi, miliambe-gakabo wilubgan nasiklesad.6Aser-e-wagangi, miliambe-gakabo wilubgan nasiklesad.Neftalí-e-wagangi, miliambe-gakabo wilubgan nasiklesad.Manasés-e-wagangi, miliambe-gakabo wilubgan nasiklesad.7Simeón-e-wagangi, miliambe-gakabo wilubgan nasiklesad (12,000).Leví-e-wagangi, miliambe-gakabo wilubgan nasiklesad.Isacar-e-wagangi, miliambe-gakabo wilubgan nasiklesad.8Zabulón-e-wagangi, miliambe-gakabo wilubgan nasiklesad.José-e-wagangi, miliambe-gakabo wilubgan nasiklesad.Degi, Benjamín-e-wagangi, miliambe-gakabo wilubgan nasiklesmogad.Dulemar-bukidar mola-sibumar yoyoid
9A-sorbali, an dulemar-bukidar dakdebalid. Dog-merguedba geg ebisleged:Bela dulemar bukwadi, soga-iliba dulemar-yar-baid-baidginmalad bukwamalad,bela soga-iliba dulemar-ablis-galagwenmalad bukwamalad,bela soga-iliba dulemar-baid-baid-danar-danar-bukwamalad,degi, bela soga-iliba dulemar-gaya-akar-akar-sunmakmalad bukwamalad.Wemar,ologana-asabin, degine, Sibad-Wawaad-Mimmi-asabin bukwamalad.Bela mola-sibu-yoyoi bukwamalad.E-arganmargine, ogob-gagangiid-gagan gani bukmarbalid.10Wemar binnasur gorbukmalad, sogbukmalad:“Anmar-abonolegedi, anmar-Bab-Dummad-ologanagi-siidgi danikid,degi, Sibad-Wawaad-Mimmigi danikid.”11Baliwiturmar belagwapa ologan-ebilis, girmar-selegan-ebilis, degine, ibdula-walabakegwad-ebilis, gwichimalad. Amar Bab-Dummad-na-e-ologanagi-siid-asabin, dulluu napase imakdemalad, Bab-Dummadse gotemalad, e-nug ogannodmalad,12sogdemalad:“¡Napiragwad!Bab-Dummad degisadegu be-nug odummolesun,be yeerdakleged degisadegu gusun,be binsaed-nue-nikarbad degisadegu gusun,bega dog-nuedye sogledii gusun,be nug-nued-nikad degisadegu gusun,be-gargangued degisadegu gusun,be-gandikidid degisadegu gusun.Bab-Dummad, bela deyob degisadegu be gusun.¡Napira deyob guo!”13Geb degi, girmar-selegan-wargwen anse egichialid: “¿Be wisi wemar mola-sibu-yoyoimaladde, doamala? Wemarde, ¿bia danimala?”14An ega sogded: “Dummad, be wisid, wemar, doa gumala.” Geb anga sogdebalid:“Wemala, ise-nue-wilegagwar-gudigusmaladgi nosmalad-dulemalad.Wemar, na-e-mor Sibad-Wawaad-Mimmi-e-abegi enuksamaladid,agi sibudik na e-mor imaksamalad-dulemalad.15A-ular, wemar Bab-Dummad-e-ologana-asabin bukmalad.Mutikidba, ibginedba Bab-Dummad-maid-neggi ega ibmar-imaknaigu gumalad.Dule-ologanagi-siid, e-sunnad a-dulemar edarboed.16A-dulemar bar ukud itogosurmalad,bar uku-ukud itogosurbalid.Degine, bar dad-ibelerba gummakosurmalad,bar neg-diopisulid itogosurbalid.17Ar Sibad-Wawaad-Mimmi-ologan-abargi-siid,sibad-wawaad-edarbedamaladyob, amar-edarboed.Dianmar-burba-dulad-ukedse sedoed.Agine, Bab-Dummad bela amarga ibyanis elioed.”