Dsa₂ tsɨ₁jon₂ Israel i₂lɨ́n₅ léi₄
1Jme₁ma₂ca₂lë₃ jaun₂, ca₂jɨng₅₄ quén₂ ángeles, tióin₂ le₃quén₂ qui'₅₄ mɨ₂güɨ́g₃, a₂jné₅ le₃quén₂ dsí₂ quió'₅ gua'₅₄ 'uë₃, ia₁jaun₂ tsá₃ ma₃lé₂ 'ag₃ dsí₂ ta₁caun₂ ne₄ gua'₅₄ 'uë₃, on₃ guë'₂ ne₄ jmɨ₁ŋí'₄, on₃ guë'₂ ne₄ 'i₁caun₂ nɨ₁'ma₂.2Jaun₂ guë́₄ ca₂jɨng₅₄ jan₂ ángel sián'₂, já₅ të₂le₃ ja₁'ia₂'iog₂, já₅ 'éi₂ quian₅ sello quió'₅ Diú₄ jén'₃. Ángel 'éi₂ guë́₄ në́₃ ca₂tsɨ́'₃ le₃quén₂ ángeles i₂jme₁ma₂ŋɨ₂ bí₂ a₂jmo₃ dain₅₄ 'uë₃ quian'₅₄ guë'₂ jmɨ₁ŋí'₄, ca₂juá'₂ tiá₂ lɨn₃:3―'A₃ lë₁jmo₂ de'₂ dain₅₄ 'uë₃, on₃ guë'₂ jmɨ₁ŋí'₄, on₃ guë'₂ nɨ₁'ma₂ a₂cha₂ në́₃, ca₂lia'₂ ca₂tiong₅₄ jnia'₅₄ léi₄ quian'₅₄ sello ne₄ chi₁quí₃ dsa₂ i₂jme₂ti₃ ne₄ Diú₄ quián₂.4Jaun₂ ca₂nag₃ jniá₂ 'a₂ con'₂ tén₅ i₂ca₂lɨn₃ léi₄ 'éi₂; lë́₂ caun₂ 'ŋiá₂-láu₂ rë₂dsɨ́₂ të₂láu₃-quén₂ mei₅ (144,000), jmá'₃ dsa₂ tsɨ₁jon₂ dsa₂ juɨg₂ Israel.5Guia₃-tɨ́n₂ mei₅ dsa₂ i₂ca₂lë₃ lén₄ dsa₂ tsɨ₁jon₂ Judá;guia₃-tɨ́n₂ mei₅ dsa₂ tsɨ₁jon₂ Rubén;guia₃-tɨ́n₂ mei₅ dsa₂ tsɨ₁jon₂ Gad;6guia₃-tɨ́n₂ mei₅ dsa₂ tsɨ₁jon₂ Aser;guia₃-tɨ́n₂ mei₅ dsa₂ tsɨ₁jon₂ Neftalí;guia₃-tɨ́n₂ mei₅ dsa₂ tsɨ₁jon₂ Manasés;7guia₃-tɨ́n₂ mei₅ dsa₂ tsɨ₁jon₂ Simeón;guia₃-tɨ́n₂ mei₅ dsa₂ tsɨ₁jon₂ Leví;guia₃-tɨ́n₂ mei₅ dsa₂ tsɨ₁jon₂ Isacar;8guia₃-tɨ́n₂ mei₅ dsa₂ tsɨ₁jon₂ Zabulón;guia₃-tɨ́n₂ mei₅ dsa₂ tsɨ₁jon₂ José;guia₃-tɨ́n₂ mei₅ dsa₂ tsɨ₁jon₂ Benjamín në́₃.Dsa₂ i₂juɨn₅ lɨn₃ le₁qui'₂ 'mɨ'₂ tiog₂
9Jme₁ca₂lë₃ jaun₂, ca₂jág₃ táng₃ jniá₂, jaun₂ ca₂jnia₃ juɨn₅ lɨn₃ dsa₂, ca₂lia'₂ 'i₁jan₂ tsá₃ 'ein₂ quɨ'₅₄ jmɨg₄ 'ɨ₃ quió'₅: dsa₂ chan₂ ca₂le₃jë́₃ juɨg₂, ca₂le₃jë́₃ tsɨ₁jon₂, ca₂le₃jë́₃ go₄ dsa₂, ca₂le₃jë́₃ jág₁ jmei₅ në́₃. Tióin₂ 'uɨg₅₄ ne₄ta₁ quian'₅₄ ne₄ Guein₂ Já'₂ Cha'₂, i₂le₁qui'₂ 'mɨ'₂ tiog₂, i₂le₁chan'₂ jma₃ca₂nei'₅₄ mog'₅₄ 'ma₂tsɨ́n₅.10Tioin'₅₄ co₂mɨ'₅₄ juá'₂:Juɨ₁lia'₂ a₂lión₂ dsa₂,já₅ quió'₅ Diú₄ quián₂ bá₄ jniog₄ i₂guá₅ ne₄ta₁;já₅ quió'₅ Guein₂ Já'₂ Cha'₂ në́₃.11Jme₁tión₂ ca₂le₃jɨ́n₃ ángeles le₃lág'₃ ne₄ta₁, le₃lág'₃ quió'₅ gui'₅₄ can'₅₄ quian'₅₄ guë'₂ já'₂ quén₂ 'éi₂. Jaun₂ qui₂ca₂tóin₂ 'uë₃ rë₂'éin₂ co₂ŋei'₅₄, ca₂jme₃juɨin'₂ Diú₄,12a₂juá'₂:¡A₂méi₃!Le₃quió'₅ Diú₄ quián₂ bá₄ ca₂tɨ́n₂ca₂le₃jë́₃ a₂jme₃go₃ dsa₂,ca₂le₃jë́₃ a₂léin₂ tág₅ co₂'né'₅,ca₂le₃jë́₃ a₂ŋɨ́'₂ dsɨ́₅,ca₂le₃jë́₃ ti₁'mag'₄,ca₂le₃jë́₃ a₂jme₃juag'₂ dsa₂,ca₂le₃jë́₃ a₂le₃goin₂,ca₂le₃jë́₃ juɨ₅bí₂,ca₂lia'₂ co₂tan₅₄. A₂méi₃.13Jaun₂ në́₃, jan₂ gui'₅₄ can'₅₄ 'éi₂ ca₂ŋag₃ jniá₂ ca₂juá'₂: ―¿'Ein₂ bá₄ i₂le₁qui'₂ tsɨn'₅₄ tiog₂ tión₂ në₅? ¿Já'₄ ja₂léin₂?14Jaun₂ ca₂ŋag₄ jniá₂: ―Ŋi'₅₄ bá₄ 'ne₂, gui'₅₄. Jaun₂ ca₂ŋag₃ táng₃ gui'₅₄ 'éi₂: ―I₂në₅ bá₄ 'éi₂ i₂ma₂ŋɨ₅ Jmɨ₁uɨg₅ Juë'₂; ma₂qui₂ca₂rang₃ tsɨn'₅₄, ma₂jmo₃ tiog₂ në́₃ të₂le₃ quian'₅₄ jmɨ₂ 'an₅₄ Guein₂ Já'₂ Cha'₂.15'Uɨg₅₄ jaun₂ në́₃,tióin₂ ne₄ta₁ në₅ quió'₅ Diú₄,jme₂ti₃ ne₅₄ lia'₂ 'uë₂-jmɨ₂ dsi₂néi₂ guá'₅ në₅ quió'₅;i₂guá₅ ne₄ ne₄ta₁ ó₃ në́₃, 'éi₂ bá₄ jmo₃ 'í₁në₂jag₄ a₂qui₃jlɨ́in₂ dsa₂ quian'₅₄ 'mɨ'₂ 'én'₁ quió'₅.16Tsá₃ ma₃qui₂i₁cón'₅ lé₂,on₃ guë'₂ ma₃qui₃le₃quein₂ dsɨ́₅, i₁'ɨ́n'₂ jmɨg₂,on₃ guë'₂ ma₃qui₃ŋág₂ guë́₄ uɨg₅jua'₅₄ a₂dséi₂ 'iog₂.17Ia₁ Guein₂ Já'₂ Cha'₂i₂guá₅ dsi₂jo₂ ne₄ta₁ në₅ bá₄jmo₃ 'í₁në₂jag₄ dsa₂ i₂jmo₅ 'í₁ já'₂ cha'₂ quián₅,jiog₃ juɨ₅ tu₁ jmɨg₂ ja₁'ia₂ jmɨg₂ jén'₃.Jaun₂ qui₃chí₃ Diú₄ jme₁ne₁₂ca₂le₃jë́₃ jmɨg₂ a₂le₁'ág₄.