1Lɛjiŋ lɛlu, nse ŋɛŋ bɛnchindaa bɛ Nyɔ-ɔ bɛnɛɛ be lemi fɛ boo yi nshɛ yi naa yɛɛ, be baŋi mfiee yi buti li boo yilu kii yi ni yi kɛti li nshɛ-ɛ kɛ li dzɔɔ yi nyɔŋa-a, kɛ li biti-i.2Ntuu ŋɛŋ nchindaa wu Nyɔ wumu, buti lɛ kimbɛ ki jobɛ tɛɛti, nuuŋ bɛ fiee fi Nyɔ yi kɛmi ntsɛ fi feti ŋkiki li bɛniiŋ li lu lɛ bɔ. Se teeŋ bɛnchindaa bɛ Nyɔ-ɔ bɛ bɛnɛɛ baa bɛ jɛ yi tɛɛmi. Bɛchindaa bani nuuŋ ɛ be bɛ bɛ tɛ̀ nyɛ buŋga li bee, le be biifi nshɛ mɔɔ dzɔ́ɔ yi nyɔŋa.3Se teeŋ tee le, “Kiiŋ nɛ ni biifi nshɛ kɛ dzɔ́ɔ yi nyɔŋa kɛ biti, tɛ̀ mɛɛŋ ki fɛ kɛ ŋkiki li bɛniiŋ bɛ nimɛ-ɛ bɛ Nyɔ yisɛŋ kɛ.”4Nse ŋ'woo le bɛniiŋ bɛ bɛ tɛ̀ fɛ ŋkiki tɛ̀ nuuŋ bɛnchuki gwii bɛ kitsɔ mbaanyɛɛ ntsɔ bɛnɛɛ (144,000), ɛ be bo li bini bi Isɛlɛɛ bichu.5Bɛ tɛ̀ fɛ ŋkiki li bɛniiŋ bɛ li kini ki Juda-a, bɛnchuki yoofi ntsɔ bɛfɛ, li kini ki Lubɛ-ɛŋ, bɛnchuki yoofi ntsɔ bɛfɛ, li kini ki Ga-ad, bɛnchuki yoofi ntsɔ bɛfɛ,6li kini ki Asha-a, bɛnchuki yoofi ntsɔ bɛfɛ, li kini ki Naftali-i, bɛnchuki yoofi ntsɔ bɛfɛ, li kini ki Manasi-i, bɛnchuki yoofi ntsɔ bɛfɛ,7li kini ki Simiɔ-ɔŋ, bɛnchuki yoofi ntsɔ bɛfɛ, li kini ki Lebi-i, bɛnchuki yoofi ntsɔ bɛfɛ, li kini ki Isaka-a, bɛnchuki yoofi ntsɔ bɛfɛ tɛ,8li kini ki Sɛbulɔ-ɔŋ, bɛnchuki yoofi ntsɔ bɛfɛ, li kini ki Jɔsɛ-ɛ, bɛnchuki yoofi ntsɔ bɛfɛ, li kini ki Bɛnjamɛ-ɛŋ, bɛ fɛ bɛŋkiki bɛnchuki yoofi ntsɔ bɛfɛ.
Kintutu ki bɛniiŋ lɛ ni mamama
9Lɛjiŋ lɛlu, ndza ŋɛŋ kintutu ki bɛniiŋ lɛ ni mamama ki nuuŋ yɛ ki wi nuuŋ fa kɛ. Ɛ be bo li bitoŋ bichu-u, bɛ li bini bichu-u mɔɔ bɛniiŋ bɛchu bɛ jɛ́ chichi chichi-i, be lemi li kabara-a mɔɔ li Ŋwanɛ Nshɔɔŋ li limfwe, ɛ be liishɛ ndú yi ncherere be kɛmi biaatɛ lɛ bɔ.10Be tɛ̀ wuuyi lɛwe ŋge be tiiti le, “Kinsofu dzɛti nuuŋ fɛ Nyɔ yisɛŋ yi shee li kabara-a mɔɔ li Ŋwanɛ Nshɔɔŋ li.”11Bɛnchindaa bɛ Nyɔ-ɔ bɛchu leŋ be kɛnɛ kabara wulu mɔɔ bɛkaaŋ mɔɔ biee bi yoŋ bi binɛɛ biɛɛ, be tuu be weyi be tondi mɛnshi fɛkwiiŋ li kabara wɛ limfwe, be nyɛɛ n'yɔɔnchɛ wu nyɔŋa li Nyɔ-ɔ.12Be tɛ̀ feti lɛ, be tiiti le, “Fi nuuŋ lɛ! Kimbɔnɛ bɛ bunɔŋa mɔɔ bufii bu nɔŋa kɛmi nuuŋ Nyɔ yisɛŋ. Tɛ ni tɛ nyɛɛ kiyɔɔni li yi-i. Ɛ yi yi kɛmi ŋguŋu bɛ buŋga, yi tɛɛmi mfi kwi ma nsiŋ. Fi ni fi nuuŋ lɛ.”13Wi wu kaaŋ wumu li bɛkaaŋ baa, bii li mi-i laa, “Bani nuuŋ baŋ bɛ liishɛ ndú yi ncherere ni? Be bo fɛŋ?”14Ntuu li wuu le, “Te Kikoo, kii nɛɛ wɛ.” Se tee li mi-i le, “Bani nuuŋ bɛniiŋ bɛ bo li mfi wu ŋgɛ wu tɛɛmi-i. Be tsootsɛ baa ndú yibe bɛ ŋgɔŋ mɛ Ŋwanɛ Nshɔɔŋ lɛ, yi se tuu yi nɛŋgi,15be se nuuŋ li kabara wu Nyɔ-ɔ limfwe, be nindi li yi-i butuu mɔɔ fɛnshaaŋ li yih ye yi muntofi-i. Wi wu shee li kabara wulu gii ni nuuŋ bɛ be si kimba kibee.16Dzeeŋ mɛɛŋ yɛ yi ni yi wuu be kɛ, ndɔɔŋ mɛɛŋ yɛ le tuu ni wondini be kɛ. Wiiŋ mɛɛŋ yɛ wu ni wu sungi be kɛ, kiyubɛ mɛɛŋ yɛ ki ni ki mukini be kɛ.17Fi gii fi nuuŋ lɛ, kifɛ Ŋwanɛ Nshɔɔŋ wu nuuŋ fɛ kabara-a fɛnti gii naa ni kiichi be si kiŋkiichɛ nshɔ́ɔŋ, dzeti yi ki giiŋgi bɛ yi fɛ dzɔɔ yi nyɛɛ ntsɛ nuuŋ fe-e. Nyɔ gii yi wɔɔyɛ musu mɛnchu mɛ nuuŋ lɛ lii yi bee tɛ.”