Ivala'asina5nrz_nar

Ioane Puka Ilo'una KaMai I'alavu Davana Eikaia.

1Inoku lovia imia'auna 'abunai emia'au kauna imana idibanai 'eva puka ilo'una ka aveke avekenai ilelena mai i'alavu davata kalakoi ka ai i'alavu 'inita eabia aikaia.2Inoku anelu kula'ilana ka aikaia evaoi 'unu'unu ediaka, “Dai 'eva mai ena komolo i'alavu davata beva'alamata inoku puka ilo'una beluvua?”3Beia sia kau ka vutuvutuai 'o kanobatai 'o kanobata venunai puka ilo'una beluvua bedaia 'o laloanai bekaidodo.4Inoku lau akani si'asi'a 'olana sia kau ka dedavalia eva mai ena ekomolo puka ilo'una beluvua 'o laloanai bekaidodo.5Inoku 'aida'aidata kauna ka e'ou'u ediaka, “Sia bokakani! Ikala, Iuda iduvuna ena Laioni, Davida lamuna kauna, 'ou kauta ekaokaita kauna, ia betata'u puka ilo'una mai i'alavuna davata kalakoi ka beluvuta bedaia.”

Ioane Mamoe Nakuna Eikaia.

6Inoku Mamoe nakuna ka lovia imia'auna 'abuna bo'adanai elava aikaia, ikana itani 'ana'inai deaku bala boina, mauli davata vani mai 'aida'aidata kauta ua'i delavaia kaiukaiu. Ia bobolona 'eva kalakoika mai makana vaka kalakoika, kataua 'eva Dilava idumena kalakoika kanobata bounai laloanai esinita la'asi.7Mamoe nakuna eda'a inoku lovia imia'auna 'abunai emia'au kauna imana idibana ai puka ilo'una eabia.8Inoku ia puka ilo'una 'ani eabia koanai, mauli davata vani mai 'aida'aidata kauta luanavui vani 'eva Mamoe nakuna vailanai dekuidula. Ia ka ka 'eva mai eta kita vana hap maivaka kolo voduta laloatai 'eva mulamula bonata mediatai devavonuta deabi, kataua 'eva Dilava ena kabukabu kauta eta meamea.9Inoku masi makamakana ka deabia,“Lovia namana oni 'eva maiemukomolo puka ilo'una boabiamai i'alavuna davata boluvuta,'olana oni 'eva deaku bamu,inoku Dilava dainai 'evaiduvu boutai, lele boutai,kau boutai mai kanobata bounaikauta lalamu ai otavata.10Oni ota'u lovia vanuanaimai kabukabu kautai ovaaotaeta Dilava da'alana be'abi,inoku ia 'eva kanobatai belovia.”

Boutai Dilava Mai Mamoe NakunaDekukudivo Venita.

11Inoku akailao 'eva anelu doutamo vaika leleta aika, sinavu boutai sinavu 'ouka dekeinia, ia deta'u lovia imia'auna 'abunai mai mauli davata vani mai 'aida'aidata kauta delavata kaiu.12Inoku demasi 'unu'unu dediaka,“Mamoe nakuna 'ana'inaideaku bala mamoena 'evamai ena komolo, siavu, lavo,nuakomolo mai kula'ilamaivaka 'olaaku, nuavimai akuabalai beabita.”13Inoku mauli davata boutai vutuvutuai, kanobatai, kanobata venuna mai 'atu ai mai 'atu laloanai demimia davata boutai demasi leleta aika dediaka,“Lovia imia'auna 'abunaakanai emia'au Dilavanamai Mamoe nakuna kevataiakuabalai, 'olaaku, nuavi maisiavu bemia keini keini!”14Inoku mauli davata vani deluva dediaka, “Amen!” Inoku 'aida'aidata kauta dekuidula inoku dekukudivo venia.
expand_more
Search