Öꞌidöre raromoromo God rajahiruomaje jöhoje.
1Ëhiꞌamu naro gaꞌi gavodeje öꞌidöre vaꞌarue ojoho jiovo nugëꞌe jiamu. Jiovo nugëꞌe jiamu gagorovo hejode hëgöehu uvanovaje urimo jö majehijade ahuro röhu maho ma-darugoꞌo jöe majehiromo uevavamu: Avehuro rojomego ijonö mu diehi diehi jioꞌiröhoho na röjahijöjo.2Ëhi uevamu hejëꞌi God-are Aruꞌahohuro na avohevoromo simanoho huotoveho barëjamu gavëꞌi naro öꞌidöre muoho garomo gavodeje a börömehu hijaje röhoho öꞌidöre jiamu. Ëhi jioꞌego ae gemu ë hihijo.3Hiꞌego munë mabëhe gö gö kavuëꞌe ajivëꞌe jioꞌamoromo jinojinoꞌiraeꞌamajëhi hesi nu anoꞌoho ëhi jinojinoꞌiraehijo. Röhu nuogëro röhoho numohijo. Munëhu mabëhe rövajëhi nuogohuro numoromo ëhi rövohijo.4Ëröho maho ririre jioꞌi a duvahe ahoꞌobëhe 24 ruë numë gemu gemu röho mare raromo rovaꞌoruomohijo. Ajivëꞌe niögoho ioꞌamoruomëꞌe a masijehu didiꞌaruëhi jiëꞌe bosöe gold-ehu avohoꞌamaroho simanore didiꞌoruomëꞌe ëhi raromohijo.5Röhu ririre röhore baderivoꞌego varuru vajeriꞌe vaeꞌi hijavohijo. O ë röho ma hesi nuninö iro bunoꞌiraeꞌamadoho ahoꞌobëhe 7 kavuoꞌamohijo. Ëiro jabesi bëhoho God-are Aruꞌahe ahoꞌobëhe 7-hoje.6O röho ma hesi nuninöho jovo eꞌu deri vaꞌëne ajivo avohëꞌe börömo böröme jiohijo. O röhoho ririre jioꞌi God rajahijarue maje 4-ho ioni göre ioni göre dejonö nuninö ëhi riravo rovaꞌoruomohijo. Nu anoꞌe ruë numë ma-nunemu jioruehijo.7Ëmajoho göho lion vaꞌëne jioꞌi göho cow anoꞌe harihu vaꞌëne jioꞌi göho ma-a nu anoꞌo vaꞌëne jioꞌi göho buruhehu hetejego gavaruëhi hesi nu anoꞌoho ëhi jiohijo.8God rajahijarue maje 4-ho gemu gemu vivoje ahoꞌobëhe 6 6 jioꞌamohijo. Jabesi vivoju uhohuꞌo dönöhuꞌo sino hahoꞌoho ahoꞌo ma-nunemu jioꞌamohijo. Röhu majae vahie sisone bogo vuonugëꞌe ma-jöe iemu ioromo uvarueje:Bada God maemu maemu maemu jioꞌi daruge ahoꞌobëhe hesirohemu höjo.Mamiꞌe jiobe rovadoho jaruvo jiajoho röhu ijonö jioꞌiröhoho höjo.9God rajahijarue majohuro God ëhi ma-mabëhe rajahiromo jöho iarueje röho mare hiromo ioroꞌioremu hibe vaꞌaje a hesi ihoho dö maro jioröhego.10Ëmaje 4-ehu ëhi rajahiromo jö iëꞌiroho rue a duvahoho ahoꞌobëhe 24 jaburo röho mare hijaje a hesi nuninö ague aho raromoromo hesi örire rajahijarueje hu ioroꞌioremu hibe vaꞌaje jiëꞌego. Rajahiromo jabesi a masijehu simanore didiꞌarue bosöho God-hu hijaje nuninö rideho bahijarueje. Bahiromo uavarueje:11Nosi Bada God jero bövie biseꞌe bamane höjo.Jero nimoromo avohëꞌëro jioꞌamajëjo.Ëhuro ja mae javëꞌego iho böröme aje ahoꞌo daruge ahoꞌo jasi gemu höjo.