APOCALIPSIS3shp_tbl

Sardis jemamea joi akaiboki kirika bomaa

1Ja Sardis jemamea joi akaibo jato ikinti en imaa joniki, nato kirika wishaxon bomawe: ‘Ja kanchis Diossen Shinanya, itan ja kanchis wishtinyara ikai neskati: Enra onanke mato jaskati jakanabo. Matora ninkakataibo iti shinanyabo iki, ikaxbira mato mawá keskabores ikanai iki.2Jaskara iken oxá besoai keskati itaanan, ja ati japaria jawékibo, itan ja mawátiresbo koshiakanwe. En oinnara nokon Dios bebon jakon jawéki ayamai mato iikanai.3Jaskara iken ja maton onanna esébo shinankanwe, itan jan yoiai keskati ikanwe; akonkin ja maton jakonmabo jenekanwe. Mato oxá besoama keskábo ikenra, maton shinannamatian yometso joái keskati ea joti iki.4Ikaxbi mato jain iká Sardis jemanra jawetiires Dios keenai keskati jakanabo ikax, jaton chopa tishiama keskábo ikanai. Jabora itibi joxo chopa saweyabo ebébi janoxikanai.5Jaweratobaonki atikoma jawékibo janharesai, jabora joxo chopa saweyabo ikanti iki. Jaton janera en jato soanantima iki, ja jati kirika meranoa. Jaskáyamaira nokon Papa bebonmeax, itan jawen ángelbo bebonmeax, natobo riki nokon jonibo iki ea iti iki.6¡Ninkataibaon ninkakanwe, ja Diossen Shinanman jawen joi akaibo yoiai!’ iki.

Filadelfia jemamea joi akaiboki kirika bomaa

7Ja Filadelfia jeman iká joi akaibo jato ikinti en imaa joniki nato kirika wishaxon bomawe: ‘Ja Jakon itan ja ikoni yoyo ikai riki, apo Davidkan llavea. Jan kepenketian tsonbi xepoti atipanyamaa, itan jan xepoketian tsonbi kepenti atipanyamaatonra mato yoiai:8Enra onanke mato jaskati jakanabo: Oinkanwe, enra mato bebon xepóti kepenke, jara tsonbi xepoti atipanyamake. Koshishamanbo ixonmabira en yoia joibo maton senenhaa iki. Nonra já onanyamake iki mato iamaa iki.9Enra ja *Satanássen jonibo ikaxbi jansoresi noara judíoshaman iki ikaibo, mato bebon jato chirankoomati iki; jaskáaxon jabaon onankanti kopí en mato noia.10Matonra ja senenhati esé jeneyamakin senenhaa iki; jaskara kopíra nato netemea jatíbi joniboki tanakaatibo joketian en mato koiranti iki.11Eara basima joribanoxiki eki koshii jenéyamakanwe, ja maton biti tsonbi bichintima kopí.12Ja atikoma jawékibo janharesabora, jan nokon Diossen xobo koshia nichínti keskábo en jato imati iki. Jainoaxa moa jawetianbi pikókantima iki. Jato meranra ja nokon Diossen jane en wishati iki. Jainxon nokon Diossen jema, ja naikanmeax joái bená Jerusalénman janeribi en wishati iki. Jainxonra jatokiribi ja nokon bená jane en wishati iki.13¡Ninkataibaon ninkákanwe, ja Diossen Shinanman joi akaibo yoiai!’ iki.

Laodicea jemamea joi akaiboki kirika wishaxon bomaa

14Ja Laodicea jeman joi akaibo jato ikinti en imaa joniki, nato kirika wishaxon bomawe: ‘Ja ibanon jaskara iki iká janeya, ja akonkin onanna, ja ikonires yoyo ikai, itan já meranxon jatíbi jawékibo Diossen jonianitonra, mato yoiai:15Enra mato jaskati jakanabo onanke. Matora matsimabobi iki, nin xanamabobi iki. Jakonhirara ikeanke, mato matsi iamax xana iká.16Ikaxbi mato matsimabo itan xanamabobi ikax, nexanshokores ikenra, kinanai keskáakin en mato jenenoxiki.17Mato ikai noara moa jatíbi jawékia iki, jatíbi jakonbires ikaxa, moa noa jawebi maxkáyamake ikibo. Ikaxbira maton onanyamaresai, moa rotokanabo ikax mato raromabo, onitsapishokobo, jawebiomabo, benchebo itan chopaomabo.18Jaskara ikenra en mato eseai, ja oro en chiikan charaxon penéaka eibakea marokanwe, mato ikonkon jatíbi jawékiabo ikanon. Jainxon joxo choparibi eibakea maroxon sawekanwe, mato moa jawebi rabintima kopí. Jainxon eibakearibi bero rao biax moa bechexeekanwe, maton jakonhakin oinnon.19Ja en noiabora, notsinhanan en jato eseai, koiranmeekanon ixon. Jaskara iken, koshiakin shinantaanan akonkin maton jakonmabo jenekanwe.20Ea riki xobo xepotiainxon, jato kenai keská. Jaweratobaonki nokon joi ninkáxon xepoti xepenai, jatianra jawen xobon jikixon en jabé jawékiati iki, jatian janribi ebé ati iki.21Jaweratobaonki atikoma jawékibo janharesai, jabora ebébi nokon yakátinin en yakákiinti iki. Ja atikoma jawékibo enharesax nokon Papa Dios betan jawen yakátinin ea yakáni keskáribiakin.22¡Ninkataibaon ninkákanwe, ja Diossen Shinanman joi akaibo yoiai!’ ” akin ea aká iki.
expand_more
Search