1Fiisa inii wuu malaakaaniŋ Janguunaŋ Sardees, woyaa ɗe ne : “ Yi raak Fuuɗis ci yasna-kanak ciŋ Kooh na hor ci yasna-kanak ci woo inii : Ŋ inhiɗ ini fu na haɓɗe jen ; ŋ inhiɗ ne ɓooɓi amb ne fu yii pes te fu kaaniɗ.2Yunka, fu ndengiɗ ini tas nga ɗa wi na kaane ! Ŋ hotiɗ ne tumohaaɗ ciŋ ɗa mitɗi ŋ has ciŋ Koohiŋ ngo.3Kon naandsuka ini fu rahas te fu kerahhaa ; taambɗaa te fu ɓoƴsoh pesohaaɗ. Fu yunukɗi ɗah, ŋ hey haye nga ɗa bañit findi rokoh te fu inhanɗi wahtuuni wa nikohan.4Moona, ali ɓa laayɗi, raakiɗ ɓi ɓaah ŋ Janguuniŋ Sardees te ɓa soɓe'iɗɗi kulɓaaciŋ ɓa ; ɓa hey ɓekke kulɓa yaanow, ɓa hun na so laam ɓa yeyyoo'iɗa.5Yi saahan, a ɓekkohan kulɓa yaanow ɗaa ; ŋ moosanɗi tiikiŋ ɗe ŋ teerndiŋ kipes ki, te ŋ hey teyɗuke ŋ fiki Baabiŋ ngo na malaakaaciŋ ɗe ne : ‘Yii a yiŋ ngo.’6Yi raak nof kerhaat ini Fuuɗsi Hoolohngaani woo Janguuci. ”
Ini fiisu wuu Janguuniŋ Filadelfi
7Fiisa inii wuu malaakaaniŋ Janguunaŋ Filadelfi, woyaa ɗe ne : “ Yi hool te a nikka Keeh-keehi, yi amboh caaɓndiŋ Dawuuda, yi rangis ɗah ɓo' ranganɗi, te a rang ɗah ɓo' rangsanɗi, ɓoyeem woo inii :8Ŋ inhiɗ ini fu na haɓɗe jen. Marka, ŋ rangsiɗ ŋ fikiifu buntaani ali ɓo' minɗi rang. Fu raakɗi hatil laayiɗ waaye fu ambiɗ woo kiŋ ngo te fu taasukɗi tiikiŋ ngo.9Inii weɗ ŋ tuman ɓak ŋ ɓi ɓaah ŋ sinaagogiŋ Seytaani, leyoh ci na woye ne ɓa Yawuut te ɓa nikɗaa. Sikɗuka, ŋ hey ɓa hayɗukohe, ɓa ƴek ŋ kot ciŋ ɗa po ɓa inah ne ŋ waaɗiɗ ɗa.10Ŋ woyee ɗa ne muña fu sek, te fu tumiɗa ; mi nak, ŋ hey ɗa ɗipe ŋ jamanooni miskiɗi na hee ule Adina jen. Wa hayan ne wa markisuk ɓooɓi gen ŋ kehƴi.11Hayiŋ ngo usisɗi. Ŋoɗa ŋ ini fu raak po ali ɓo' minuu kooɗoh raayaaniŋ ɗa nga ɗa.12Yi saahan, ŋ hey ɗe tume kumbin ŋ kahniŋ Kooh, Koohiŋ ngo ; a pulissanɗi nga muk te ŋ hey fiise nga ɗe tiikiŋ Koohiŋ ngo na tiikiŋ kur kiŋ Koohiŋ ngo, Yerusalemi asi, wi ruhsoh Eel ci, ŋ Koohiŋ ngo ; ŋ nam fiis nga ɗe tiikiŋ ngo asi.13Yi raak nof kerhaat ini Fuuɗsi Hoolohngaani woo Janguuci. ”
Ini fiisu wuu Janguuniŋ Lawdise
14Fiisa inii wuu malaakaaniŋ Janguunaŋ Lawdise, woyaa ɗe ne : “ Yi na woyse "Amiin", Seedeeni woor te a woyee keeh, Yi in ci Kooh fer jen taamboh nga ɗe woo inii :15Ŋ inhiɗ ini fu na haɓɗe jen, fu soosɗi, fu dohɗi. Cey fu mineen soos wala fu doh ɗah !16Waaye ini fu iroh, fu dohɗi, fu soosɗi, tahiɗ po ŋ hey ɗa ɓote.17Laam fu yii tipuk ne fu heɗ raak-raak, an fu raakiɗ po fu etohisɗi in, waaye fu inahɗi ne, fu torhiɗ, fu miskohiɗ, fu ɓangtuuɗ, fu fuuliɗ, fu tas-ɓarang !18Weɗ tah po inii weɗ maa woyee ɗa : Roma nga so urus hoolɗuuɗ na yongkaah, fu raak ; fu rom kulɓa yaanow, fu raak ɓekkaah wa ɗasiɗ kaciikiŋ tas-ɓarngiŋ ɗa ; fu rom tuufkaah wuu has ciŋ ɗa, fu min hot.19Ɓi ŋ waaɗ jen, maa woytohee ɓa woytoh, ŋ kuƴsee ɓa. Sawra te fu ɓoƴsoh pesohaaɗ !20Markaat, ñam yii ŋ buntaani te mi yii laɓiɗ, ɓo' kerah hoosooriŋ ngo te a rangis ɗah, ŋ hey aase kahan ce ŋ ñam na ɗe, a ñam na so.21Yi saahan, ŋ hey ɗe eɗe a ɓoof na so ŋ ɓoofoha-buuri, ɓoofohaaniŋ ngo, findi wi ŋ saah, ŋ ɓoofiɗ na Baabiŋ ngo ŋ wiŋ ɗe.22Yi raak nof kerhaat ini Fuuɗsi Hoolohngaani woo Janguuci. ” »