1Wa hiñoha reeh, ŋ hotta malaaka ruhsoheeɗa Eel ci, ambiɗ caaɓndiŋ nunga topaaɗiina ŋ yaah, na ceen duu'in.2A ammba iiñ-safaali, iiña ɗeɓgaan, a yi siɓniɗi wala Seytaani. A ceennda ɗe, ceeni kaɗan kiis junni (1000).3Malaakaani njaffa ɗe ŋ ɗooƴ nunga topaaɗiina, a taƴca buntaani na caaɓe, a reewwaa na mandargaani teeɓoh ne wa ranguuɗ ŋ tiikiŋ Kooh ne iiñ-safaali minissuu kosɗukoh cuuɓ ci lee po kiis ci junniici mit. Ŋ finho ineem a joyiɗ toksu ŋ jamano ƴissuut.4Ƴutta ŋ hotta ɓi ɓoofoha-buur, ɓi ɓoofee nga ca eɗuusa hatil atte'oha. Ŋ nammba hot ruuh ciŋ ɓooɓi haf ciŋ ɓa nguɗsee sagu seede Yeesu na kos woo kiŋ Kooh. Ɓooɓeem ñaamkeeɗi ɗoopta na nataaliŋ ɗe, te ɓa raakeeɗi mandargaaniŋ ɗe ŋ puk ciŋ ɓa wala ŋ yaah ciŋ ɓa. Ɓa pesissa, ɓa nikka buur na Kiristaani ini ree kiis junni (1000).5Weem weɗ hulti koc. Kaaniɗ ci ɓinooɓi jen pesisseeɗi po kiis ci junniici mitta.6Ɓa neɓɗiɗ, ɓa hooliɗ wuu Kooh, ɓooɓi ɓaah ŋ hulti koc ! Kakaan ki kanakɗoh miniɗɗi ɓa in ; ɓa hey nike seeƴkiɗoh wuu Kooh na Kiristaani, te ɓa hey nike buur, hun na Kiristaani ini ree kiis junni (1000).7Kiis ci junniici mit ɗah, Seytaani hey pulɗasse ŋ kasoonaŋ ɗe,8te a hey pule ne a kosɗukoh cuuɓ ci nik ŋ ɓak ci nikiis ciŋ kehƴi jen lee ciŋ ɗe, ca nikka Gog na Magog, ne a nangɗoh ɓa wuu hiñohi, ɓa hendan na pep ciŋ merhey miŋ yaah-cookmi laay.9Ŋ hotta ɓa pasarkohiɗ ŋ ɗisik nu nik ŋ kehƴi jen, ɓa ndeerra daliŋ ɓo'-Kooh ci na kur-taahi Kooh keeñkoh. Waaye yongkaah pulohha eel ci, wa hoomiɗta ɓa.10Ŋ ineem, Seytaani, yi ñaañohee ɓa, njafuusa ŋ ɗooƴ kalaŋ yongkaaha na suufara, ŋ ɗiskaŋ ɗoopta, na woosuuɗi leyohi. Ɓa hey degse miskiɗ nga wek na noh po faw.
Atteeni mirndoh
11Ƴutta ŋ hotta ɓoofoha-buur yakak yaanow na Yi ɓoof nga. Kehƴi na eel ci saandohha po ca ussa ɗe, ca saayya.12Ŋ hotta kaaniɗ ci, yakiɗ na ƴin, tufkiɗ ŋ fiki ɓoofoha-buuri. Ɓi teere rangsuusa, teere wiiriis nammba rangsu, teerndiŋ kipes ki. Kaaniɗ ci atte'ohuusa ŋ in ci ɓa tume, findi ca fiisohu ŋ teereeci.13Cookmi eɗohha kaaniɗ ci kaanoh nga. Kakaan na Jaanim eɗohha kaaniɗ ciŋ ca. Ɓa jen ɓa atte'ohuusa, yaa nu nga ŋ in ci a tume.14Ƴutta Kakaan na Jaanim njafuusa ŋ ɗooƴ kalaŋ yongkaaha. Kaliŋ yongkaaheem weɗ kakaan ki kanakɗoh.15Yaa nu tiikiŋ ɗe fiisseeɗi ŋ teerndiŋ kipes ki ɗah, a njafuusa ŋ kaliŋ yongkaahi.