Matsiɨkɨtɨ kemɨratɨa19hch_wb2

1Merikɨtsɨ manata muyuawitsie yuariya nekaniu'enieni yumɨireme teɨteri waniuki hepaɨ ti'eniɨriɨkɨme. Mɨpaɨ me'utiyuatɨ:«Kakaɨyari hepaɨtsita 'aixɨa xekeneutiyuaneni.Wikweitsitɨarikaya, witsikemɨtikuxaxatsiwa meta tɨrɨkariyaya takakaɨyari pɨhetsiemieme,2kemɨtiyuheitseritɨwa kaniyuritɨni meta 'aixɨa ketiniuka'iyarini.'Ukaratsi tuminikɨ muyumayɨinɨa mɨmatiwa kaniutaxaneta,kayukɨnama wamayɨanetɨ kwie 'axa'anekame payeitɨa.Kakaɨyari te'uximayatsiriwamete waxuriya metayeurikɨ».3Hikɨ hutarieka mɨpaɨ mekaniutiyuani:«Kakaɨyari hepaɨtsita 'aixɨa xekeneutiyuaneni.Mɨkɨ kɨtsiyari kananutineikani tsepanetɨ xeitsienituyari wiyari manuyekɨka».4Hikɨ 'ukirawetsixi xeitewiyari heimana nauka meta yunaukatɨ memayeneniere mekaniutihɨxima'uni meta nenewieri Kakaɨyari mekaniupitɨani 'uwenitsie maka, mɨpaɨta mete'ikɨhɨawetɨ:«Mɨpaɨ ketiuyɨni. Kakaɨyari hepaɨtsita 'aixɨa xekeneutiyuaneni».5Hikɨta 'uweni manuwe niuki kanayeneni mɨpaɨ 'utaitɨ:«'Aixɨa xekeneutiyuaneni takakaɨyari hepaɨtsita,yunaitɨ te'i'uximayatsiriwamete, tɨɨri meta 'ukirawetsixi,yunaitɨ xeheyemakatɨ xemeyexeiya».

Neɨkiya 'ixɨarariyari Muxa miwewie

6Hikɨta niukite waɨkawa nekaniu'enieni, haa 'amɨpa hepaɨ ti'eniɨriɨkɨme, tɨranari mɨtɨrɨkaɨye hepaɨ. Mɨpaɨ mekaniutiyuanekaitɨni:«Kakaɨyari hepaɨtsita 'aixɨa xekeneutiyuaneni.Ti'aitame 'ari kanitsutɨani ti'aitatɨ takakaɨyari,Naimekɨmɨtɨrɨkaɨye.7Tepɨtatemamawieka meta temawierika tepexeiyani,meta witsitikuxaxatsiwame tepayeitɨaka.'Ari tukari kanaye'ani Muxa mɨtineɨkekɨ.'Ɨyaya mayani puyukuha'aritɨa,8rinu 'ixurikiyari 'aixɨa mɨ'ane kaniyetuiriyarieni menakatɨkɨnikɨ, mɨ'itiya meta mutimerɨka».(Rinu 'ixurikiyari kani'inɨariyaritɨni, heitseriemekɨ me'u'uwatɨ memɨte'uximaya mepatsietɨ).
9Hikɨ niuki tuayame mɨpaɨ pɨnetiutahɨawixɨ: «'Aixɨa mekani'itɨarieka kemɨ'ane memuta'inierie, Muxa mɨtineɨketsie memɨtekwanikɨ». Mɨpaɨta kanetiniutahɨawe: «'Ikɨ Kakaɨyari niukieya kaniyuritɨni».10Hikɨ hetɨana nekaniutihɨximakeni nenewieri ne'ipitɨanike. Mɨkɨ matsi mɨpaɨ pɨnetiutahɨawixɨ: «Tixaɨ yumarima. 'Ahepaɨ ne nekatini'uximayatametɨni, 'a'iwama memɨyuhekɨata Ketsutsi hetsɨa memiemetetɨtɨ wahepaɨ nepɨti'uximayatame. Kakaɨyari xeikɨa nenewieri kenepitɨaka. Kemɨ'ane mɨyuhekɨata Ketsutsi hetsɨa miemetɨtɨ, mɨkɨ 'iyari kanexeiyani katinihekɨatani».

Kemɨ'ane kawayu meutuxatsie makatei

11Manata muyuawi nekaniuxeiya reuyepiekame, meta kawayu heutuxatɨ mana kaniuwekaitɨni. Manakatei Yamɨtikamie meta Yurimaine katinitewakaitɨni. Heitseriemekɨ yatikamietɨ kaniwaranutaxɨrɨwani meta kuyaxa kaniwewieka.12Hɨxiteya tai mɨtaka hepaɨ pɨtiyuxexeiyakai, yumu'utsie waɨkawa kuruna panamanakai, meta kemɨtitewa kana'utɨakaitɨni, peru xewitɨ 'atsipɨkatimaikai kemɨtitewa, mɨkɨ xeikɨa yapɨtimaikai.13'Ixuriki xuriyamakame 'anakatɨtɨ. «Kakaɨyari Niukieya» katinitewaka.14Kuyaximama muyuawitsie miemete mekaneweiyakaitɨni, kawayutsixi memeutuxa wahetsie me'utetɨ meta rinu 'ixurikiyari, mutuxa meta mɨ'itiyatɨka me'anakatɨtɨkaitɨ.15Tetana 'ixipara meutixikakauni kaniwayeneikakaitɨni, kɨmana mɨwatiwitenikɨ nuiwarite. «Pɨtiwa'aitɨa tepɨa 'itsɨyari 'akwetɨ». Mɨkɨtɨtɨ kanihɨkɨtɨni kaxie takari mitiketsini kaxie pɨnameta, Kakaɨyari Naimekɨmɨtɨrɨkaɨye haxɨaya mayanikɨ.16Kamixayatsie meta teurieyatsie mɨpaɨ pɨre'ukai kemɨtitewa: Ti'aitame, te'aitamete tiwa'aitɨwame, meta Kutsiyari wakutsiyari.17Merikɨtsɨ xeime niuki tuayame nekaniuxeiya tau hetsie 'aweme, yunaime wikixi muyuawitsie memuwɨtɨkɨka kaniwahiwiekaitɨni mɨpaɨ tiwakuhɨawetɨ: «Xekenakɨni, xekeneuyukuxeɨri, Kakaɨyari 'ikwai waɨkawa pɨwewieni,18te'aitamete wawaiyari xekeneutikwa'i, kuyaxi wa'ukiyarima wawaiyari, memɨtɨrɨkawi wawaiyari, wakawayutsixi wawaiyari, mɨkɨ wahetsie memutekai wawaiyari, yunaitɨ memuyunɨ'a memɨte'uximayatamete tɨɨri 'ukirawetsixi yunaime wawaiyari».19Hikɨ yeutanaka nekaniuxeiya, meta kwiepa te'aitamete yukuyaxima mewaruwitɨtɨ, mekaniyukuxeɨrieni memitamienikɨ mɨkɨ kawayu hetsie manaka meta kuyaximama wahepaɨtsita.20Hikɨ yeutanaka meta tixaxatame mɨti'itawakai hamatɨana kaniuwiyarieni, kemɨ'ane 'inɨari mɨtiwewiwakai yeutanaka hɨxie, kɨmana mɨtiwa'irɨwiyakai mɨkɨ memitanaki'eri yeutanaka tseyuya mɨkɨ nenewieri memipitɨakai meta 'ɨkiyari memayexeiyakai. Mɨkɨ yuhutatɨ me'ayenenieretɨ harakuna mɨta'atsie 'atsupɨrekɨ mekaneukaxɨriyani.21Hipatɨ yunaitɨ mekaniukwi'iwa kawayutsie manaka tetana 'ixipara wayeneikakaku, meta yunaitɨ memɨte'awɨwawe mɨkɨ wawaiyarikɨ mekaniutihuxani.
expand_more
Search