Babuloniaꞌe Higaro
1Eꞌe enogano, e tuḡure viga ꞌahoganiꞌa adureonoꞌo ovaoga horoniro. Aniꞌe inara boro meiro. Ani agaḡaꞌe vazavazahoga uꞌano raha niduꞌa aganiro.2Aniꞌa ago boro hina ꞌahige huau ḡoeriro, “Higaneha! Ne boro bagaḡa, Babuloniaꞌa higaneha! Aniꞌe Diabolo radone habaꞌa reiro, zu vine sauꞌa toraga niduꞌa neḡa reiro, ebu vazeꞌa heꞌeheꞌezeꞌeteꞌe niniḡa toraga niduꞌa neḡa reiro.3Mazaḡa habaꞌahabaꞌa azaḡa niduꞌa Babuloniaꞌa ziniroteꞌe vainiḡa vuḡa riḡa gagadu ani teite daroe futaro. Raha kiniḡa niduꞌa ani teite daroe futaro ebu rahao serosereꞌeteꞌe azaḡaꞌe maꞌorao reiro, mazaḡa Babuloniaꞌa hadi naeḡa boroboro ḡauḡa ufeta hoitiro.”4Ebu hena e adureonoꞌo ago ꞌahoganiꞌa ꞌahige raꞌeteꞌe igiro,“Eḡe vaze niduꞌa, Babulonia neḡanonoꞌo buanoꞌi.ꞌOugine zaeꞌa ani haḡai sauꞌa mene hegotiꞌuma,zu aniꞌa hiditeꞌe adugaḡa za mene hidiꞌuma.5Mazaḡa ani haḡai sauꞌaꞌe gudiru itadu adure haniniro.Badiꞌaꞌa ani haḡai sauꞌa zamareꞌohe.6Ne boro eꞌeꞌa zae sausauziroteꞌe idunaḡano zaeꞌa eꞌe naeḡa baronohanoꞌi.Ne boro eꞌeꞌa haḡairoteꞌe haḡaiḡa idunaḡano, eꞌe naeḡa ḡae aheu ufeta ragate baronohanoꞌi.Ne boro eꞌeꞌa aduga hideꞌeteꞌe bioḡa zae ziniro.Eꞌanoꞌo zaꞌe aduga ḡae aheu ufeta ragate hiditeꞌe bioḡa hanoꞌi.7Ne boro eꞌeꞌa niḡa mae ḡihiniro zu hadi naeḡa boroboro hoiteꞌenaꞌa matuꞌe radiro.Eꞌanoꞌo haḡaiḡa eꞌe idunaḡano gigiꞌa zu zama aroga hanoꞌi.Ne boro eꞌeꞌa zamao ꞌahige raꞌohe,'E kini roḡaeḡa radu vaze zuhiꞌaziꞌohe.E mene ḡozoba.Eꞌanoꞌo zamahe mene hune ariꞌuma.'8Eꞌanoꞌo mada tiba zamaḡano ne boro eꞌe aduga boro hidiꞌuma,rune hidiꞌuma, zamaḡa aradu niaꞌuma, zaga hidiꞌuma,ebu ire roga hina hufi haoniꞌuma.Mazaḡa ne boro eꞌe kotaneꞌeteꞌe Zuhiꞌaḡa Boro Badiꞌaḡaꞌe gigiꞌa hune.9Raha kiniḡa niduꞌaꞌe ne boro eꞌe teite daro futaro, zu naeḡa boroboro ḡauḡa hoiteꞌenaꞌa matuꞌe radiro. Ze ne boro eꞌe hufi haoneꞌeteꞌe ire rogaḡa ḡisiḡa horonadu niau kuaꞌuma.10Zeꞌe ne boro eꞌeꞌa hideꞌeteꞌe adugaḡa rihoneꞌenaꞌa, faḡano edanadu ꞌahige reꞌuma,'Aduga boro hideha,Ne boro ḡihiꞌaḡa, ne boro inaraḡa,Babulonia, aduga boro hideha!Mada tahiḡa fase zamaḡano Badiꞌaꞌa ḡa ruiꞌeha.'11Rahao serosereꞌeteꞌe azaḡaniꞌa ani uꞌano niau ḡoinahiꞌuma, mazaḡa zeḡe mazaonoꞌo ḡau ꞌahoga bare hoititeꞌe azaḡani ꞌahoga oꞌoꞌa.12Zeḡeꞌa seroniroteꞌe ḡauḡaꞌe golo, siliva, naeḡa boro hadiḡa, gudugudu naeḡa boro, dabua manoḡa tauḡi, dabua peporoḡa, dabua vazavazahoga, dabua kanaḡa, ire hohoḡa nunu, elefaniti ḡonoga hina haḡairoteꞌe ḡauḡa naeḡa boro nunu, naeḡa boro ireḡa nunu, kopa zu auri zu hadi manomano hina haḡairoteꞌe ḡauḡa nunu,13iniga zu naeḡa boro niḡa Sinamono,eḡa nunu, ꞌuvahu hohoḡa, murava hohoḡa, dehoro hohoḡa, vaini vuḡa, olivi dehoroḡa, ꞌuvahu zu vuidi, boromakau zu mamoe, hosi zu hosi kiuḡa. Ze vaze zuni tuḡure azaḡano seroziro.14Ḡau ꞌuguḡa seroniroteꞌe azaḡaniꞌa ne boro eꞌe mazao ꞌahige reꞌuma, 'Ḡaeꞌa meihi rae urate huniroteꞌe ḡauḡa manoḡa niduꞌaꞌe dauḡeha. Ḡau ḡehaḡa niduꞌa zu naeḡa boroboro ḡauḡa niduꞌa ḡae mazaonoꞌo dauḡadu ꞌuguḡa mene bare horoniꞌuma!'15ꞌUguḡa ḡauḡa ne boro eꞌe azaḡa mazao seronadu maꞌorao reiroteꞌe serosero azaḡaꞌe ne boro eꞌeꞌa aduga boro hidirotaꞌaꞌe rihonadu faḡano edauꞌenaꞌa, niau ḡoinahiꞌuma. Ebu ze ꞌahige reꞌuma,16'Aduga boro hideha! Ne boro ḡihiꞌaḡa, aduga boro hideha!Aniꞌa dabua manoḡa tauḡi, dabua peporoḡa zu kanaḡa vidaudo,ebu golo, hadi naeḡa boro nunu zu gudugudu naeḡa boro hina rohorohido.17Rehano mada tahiḡa fase zamaḡano ḡau ḡehaḡa niduꞌa aꞌe ruiniro!'Ḡasi boro azaḡa, ḡasi boro zamaḡano tiriroteꞌe azaḡa, ḡasi boro gau azaḡa ebu davarao gaueꞌeteꞌe azaḡa niduꞌa faḡano edaꞌuma.18Zeꞌa ne boro eꞌe hofoga ḡisiḡa horonirotene, agoze boro hina ꞌahige huau ḡoeriꞌuma, 'Ne boro ꞌahiguḡa heuḡa neḡa ꞌahogaꞌe oꞌoꞌa hune!'19Ebu ze zeḡeꞌa bare kono vadinizeo feuniꞌuma,ebu niau ḡoinaheꞌenaꞌa, ꞌahige ḡihau huaꞌuma,'Aduga boro hideha! Ne boro ḡihiꞌaḡa, aduga boro hideha!Ḡasi boro hina davarao ḡau nunu seroniroteꞌe azaḡa niduꞌaꞌe maꞌorao reiro,mazaḡa ne boro eꞌeꞌa hadi boro hina zeḡe ḡau hoitido.Rehano mada tahiḡa fase zamaḡano ne boro eꞌe ruineha!20Adureo radiuꞌeteꞌe azaḡa, ne boro ꞌai ruiniro ꞌahine, matuꞌoꞌi,Badiꞌa mone azaḡa, apostolo azaḡa zu peroveta azaḡa, matuꞌoꞌi,mazaḡa ne boro eꞌeꞌa zae sausauziroteꞌe uꞌano, Badiꞌaꞌa zae veize ne boro eꞌe kotaniro.'”21Ebu hena tuḡure viga gigiꞌaḡa ꞌahoganiꞌa vuidi duine seꞌeneꞌeteꞌe hadiḡa boro bagaḡa heuḡa hadiḡa boro ꞌahoga mae ḡihinadu davarao feuniro, ebu ꞌahige rae reiro,“Hadi boro ꞌahi ḡihau feuniroteꞌe teige,ne boro ḡihiꞌaḡa, Babulonia mae feuniꞌuma,ebu ne boro eꞌe mene bare horoniꞌuma.22Gabi vaꞌeteꞌe azaḡa, bada maꞌeteꞌe azaḡa, suraꞌi hudiꞌeteꞌe azaḡa zu bigoro hudiꞌeteꞌe azaḡa agoꞌene boro eꞌe zamaḡano mene bare igiꞌuma.Ḡau nunu haḡaeꞌeteꞌe azaḡaꞌe ne boro eꞌe zamaḡanomene bare horoziꞌuma,vuidi duine seꞌeneꞌeteꞌe hadiḡa boro bagaḡa agoḡaꞌe ne boro eꞌe zamaḡanomene bare igiꞌuma.23Ihure agaḡaꞌe ne boro eꞌe zamaḡanomene bare agaraꞌuma,hahu iziga ohozeḡa zu roḡaeḡa agozeꞌe ne boro eꞌe zamaḡanomene bare igiꞌuma.Mazaḡa ne boro eꞌe mone serosereꞌeteꞌe azaḡa inaraꞌe raha ꞌadao ufeta boro hune reiro,ebu ne boro eꞌeꞌa murava haḡaiḡa hina habaꞌahabaꞌa azaḡa niduꞌa soꞌosoꞌoziro.24Ne boro eꞌe zamaḡano peroveta azaḡa zu Badiꞌa mone azaḡa ruze,ebu rahao zimiroteꞌe azaḡa niduꞌa ruzeꞌe horoniro.”