1An kuwene ku uka ɗa u kumbai kadin ki ku wurai, n wene ta̱ katsumate ka zuba ka roku ka cipa̱ a iyamba. Wa̱ ta̱ n ucira cika, aku katyashi ka ka laɗa ka ka wutusa̱ ara ne ka wakanai likimba.2U salai n kala̱ga̱tsu ka ucira:“Ilyuci i pige i Babila i wa̱sa̱ ɗe.Ama aꞌa̱ kpam pini wa,shegai ityoni i cingi kau‑kau i ashinda̱ iꞌya iꞌa̱ri pini.Gba̱ nnu ma ashinda̱ ma̱ ta̱ pini.3Gba̱ iyamba i so ta̱ ma̱ra̱ ma ne,adama a ɗa u lai uciga tsishankala.Ngono n likimba n yan ta̱ tsishankala n eyi,kpam gba̱ aza a tsilaga a tsa̱ra̱ ta̱ ikebe ushaniadama a ɗa u la ta̱ uciga ili i shinga i shinga.”4Aku n panai kala̱ga̱tsu ka roku a zuba ka danai:“Wuta̱i pini a ilyuci i nala yi, ama a va̱,kotsu i yain unyushi u cingi tyoku ɗa u yain wa,kotsu kpam i wushi mavura ma wa wusha wa.5Unyushi u ne u yan ta̱ kazana ka ka rawai a zuba,Kashila̱ kpam ka a̱sa̱nsa̱ n ili i cingi iꞌya u yansai wa.6Yankai Babila dem tyoku ɗa u yankai aza roku.I tsupuka yi ili i cingi iꞌya u yansai hal kure.I foɓusuko yi ma̱ra̱ ma ma rawai ucira kuretyoku ɗa u foɓusukoi aza roku.7U na̱ka̱ ta̱ kaci ka ne tsupige cikau tsa̱ra̱i kpam gba̱ ili iꞌya wa ciga.I na̱ka̱ yi upana u ikyamba n unamgbukatsuma̱ cika.U yanka ta̱ kaci ka ne ara̱ɗi, u danai,‘Mpa na n dusuki,mpa uka ɗa wa lya tsugono.Ma̱ri n vali ɗa wa kuwa̱ mu wa,adama a nala ma sa̱ka̱ yi wa.’8Adama a ɗa uka vi u yain ara̱ɗi nala,wa ɓa̱ra̱kpa̱ wa,Kashila̱ ka yan yi ta̱ mavura n maɓa̱la̱,n ukpa̱ u ama a ne, n kambulu.Akina a ka lya yi ta̱,kpaci Kashila̱, uza ɗa u yanka yi afada,wa̱ ta̱ n ucira cika.”9“Ngono n ɗa a yain tsishankala kpam a pecei utsa̱ri u ne, a ka wene ta̱ ka̱nga̱ ka uka̱na̱ u akina a ɗa a ka lya yi, aku a sa̱i a namgba katsuma̱ adama a nala yi.10A shamgbai a mɓa̱ri, kpaci a ka pana ta̱ uwonvo u upana u ikyamba u ɗa u tsa̱ra̱ yi kotsu u tsa̱ra̱ le dem wa. A danai,“ ‘Upana u ikyamba!Upana u ikyamba u ilyuci i pige i nala yi,ilyuci i pige i Babila,kpaci mavura ma vunu ma tuwa̱ ta̱a asuvu a ulapa u uwule u te!’11“Kpam aza a tsilaga a likimba a ka sa̱ ta̱ a namgba katsuma̱ adama a ne, kpaci gogo‑na ko uza wa̱ la wa tsila ili iꞌya a ka dengishe wa.12Ili iꞌya a ka dengishe vi iꞌya zinariya, n azurufa, n atali a ikebe,† n ityali. A ka tsa̱ra̱ kpam katsili ka aminya a ɗa a lai tsugbere tsulobo, n aminya a mini ma galura n san kpa̱ya̱ya̱ wa. A ka tsa̱ra̱ uza ɗa wa tsila nɗanga n ɗa ma̱ri n magula̱ni ma shinga, n ili iꞌya a yain n aꞌanga a karon, na̱ nɗanga ma ikebe wa. Nala dem n urim u shili, n urim, n katali ka ikebe cika ka kuma.13A ka tsa̱ra̱ uza ɗa wa tsila ili i magula̱ni i kusan,n ili i magula̱ni i urunukpa, n i kusugburu wa. Nala dem n mini ma cinwi, n manivi, n kira, n ilya. Hal n anaka, na̱ ncon, n adoki, na̱ nringongo ma adoki ma ucanka ucanga a ka tsa̱ra̱ katsili wa. Nala dem a ka tsa̱ra̱ katsili ka agbashi, n ama ɗa a ka̱na̱i a asu u kuvon wa.14“Aza a tsilaga yi a tonuko yi,“ ‘Gba̱ ili iꞌya va̱ri vu zuwukai aꞌeshi yi i kotso ɗe,kpam gba̱ ili iꞌya i lobonuso vu vi i puwa̱n ɗe,vu buwa kpam utsa̱ra̱ iꞌya wa!’15“Aza a tsilaga a ne, aza ɗa a yain utsa̱ri a asu u dengishike yi ili i nala yi, a ka shamgba ta̱ a mɓa̱ri, adama a ɗa a ka pana ta̱ uwonvo u upana u ikyamba u ɗa u tsa̱ra̱ yi kotsu u tsa̱ra̱ le dem wa. A ka sa̱ ta̱ a namgba katsuma̱.16A ka dana ta̱,“Upana u ikyamba!Upana u ikyamba u ilyuci i pige i nala yi!Wa̱ri u tsu uka ta̱ aminya a ikebea ɗa aꞌa̱ri n mini ma galura n san kpa̱ya̱ya̱.U uka ta̱ dem ikali i icanga i zinariya,n atali a ikebe† icun kau‑kau!17A asuvu a ulapa u uwule u te u ɗa a nangasai gba̱ utsa̱ri u ne!’“Atigi† a aꞌatsu a pige n ayain a manyan a le kaɓolo n aza a nwalu a mini yi, n aza a tsilaga tsu ili iꞌya a ka canga̱sa pini a aꞌatsu yi a ka shamgba ta̱ a mɓa̱ri.18A ka sa̱ ta̱ cika an a wenei ka̱nga̱ ka uka̱na̱ u akina ka ka̱ri yi ulya vi, ‘Kotsu aꞌa̱ri a yan ilyuci tyoku u ilyuci i ucira i na yi wa!’19“A ka polusuko ta̱ aꞌaci a le kabuta̱ tsa̱ra̱ a wenike unamgbukatsuma̱ u le. Kpam a ka dana ta̱:“ ‘Upana u ikyamba!Upana u ikyamba u ilyuci i pige i nala yi!Tsu yan ta̱ utsa̱ri adama a udukuyan u ne.Kpam gogo‑na a asuvu a ulapa u uwule u te gba̱ u puwa̱n ɗe.’20Eɗa̱ aza ɗa iꞌa̱ri a zuba yanyi ipeli,i yain kpam maza̱nga̱,kpaci Kashila̱ ka wacinsa ɗe Babila.Ama a Kashila̱ kaɓolo n asukin aza ɗa a tsu dansa akani a Kashila̱a ka yan ta̱ maza̱nga̱.Kpaci Kashila̱ ka kiɗa̱ga ɗe Babila uganaadama a ili i cingi iꞌya u yansa̱ka ɗa̱.”21Aku katsumate ka zuba ka ucira ka bidyai katali ka pige, yavu ka a tsu wurika kira, aku u vuta̱la̱i ka a kushiva̱, u salai:Katsumate ka zuba n katali ka pige“Babila, avu ilyuci i ucira,tyoku ɗa Kashila̱ ka wacinsa vu n ucira ɗa natyoku ɗa n vuta̱la̱i katali ka na ki!Avu ilyuci i na yi, ama a ka doku a ka wene vu kpam wa.22Ama a ka doku a ka pana a kemi kpam molo wa,ko ashipi, ko kpam ama a fulusa̱ avula̱ n igbali wa.Uza wa doku wa yan kpam manyan a asuvu a vunu wa.Uza wa doku wa pana mawura̱ ma kira kpam wa.23Uza wa doku wa wene katyashi ka ncikalu a asuvu a vunu kpam wa.Uza wa doku wa pana kpam kala̱ga̱tsu ka kalobo n makere a yain iyolo wa.Aza a tsilaga a vunu alya aꞌa̱ri a lakai ucira a asuvu a likimba naha.Tsuboci tsu vunu tsu yinsa̱ ta̱ ama a likimba gba̱.24Kashila̱ ka yanka ta̱ Babila mavurakpaci ilyuci yi i wuna ta̱ aza ɗa a dansai akani a Kashila̱,n aza ɗa aꞌa̱ri ama a Kashila̱.Mayun ɗa, Babila wuna ta̱ ama a likimba ukyawan.”