1Ƴutta malaaka yino ŋ ci yasna-kanak ci ambee kaas ci yasna-kanak ci hayya, woosa so ne : « Haya ŋ teeɓ ɗa findi toonkohi yakki atte'ohsan, a yi kur-taahi yakki yipu ŋ sero ɓi masuɓ laayiɗ.2Buur ciŋ kehƴi faankohiɗ na ɗe te ɓooɓiŋ kehƴi na laarohe toonkiŋ ɗe. »3Ŋ ineem, Fuuɗsiŋ Kooh ammba so, jaarra malaakaani ɓayya so kehƴa hulanga. Ŋ hotta ɓitiɓ ɓoofiɗ ŋ ɗoopaat ruumind coy. Faanaŋ ɗoopta riifee na tiik ɓaseeh ŋ Kooh, a raakee haf yasna-kanak na wiic ndaŋkiyaah.4Ɓitɓa ɓekkee kulɓa ruumind eɗfiɗ na ruumind coy, a riiffa na tokkaah urus, na peme na per. A ammba kaas urus ŋ yaah, riifiɗ na in sepƴiɗ na usɓi rimkoh ŋ toonkiŋ ɗe.5Tiiki ɗasɗukiɗii fiisseen ŋ pukiŋ ɗe : « Babiloni yakki, yaayiŋ toonkoh ci, yaayiŋ tumohaaɗ ci sepƴiɗ ci ŋ adinaani. »6Ŋ hotta ne ɓitɓeem laariɗ ŋ ñif miŋ ɓo'-Kooh ci na wiŋ seedeeciŋ Yeesu. Wi ŋ hot ɗe, ŋ feyuusa lool.7Malaakaani woosa so ne : « Wa joyɗi ɗa fey. Ŋ hey ɗa teeɓe ini ɗasɗukiɗi kaɗ ŋ ɓitɓi na ɗoopti ɓay ɗe, yi raak haf ci yasna-kanak ci na wiic ci ndaŋkiyaah ci.8Ɗoopti fu hot, a nikeen waaye a nikisɗi. A pulohan nunga topaaɗiina, a kaɗ ɗumbsa. Ɓooɓi gen kehƴi ɓi tiik ciŋ ɓa fiisuuɗi ŋ teerndiŋ kipes ki ina Adina camboh poyi, ɓa hot ɗe ɗah, ɓa hey feyse sagu ini a nikee, a nikisɗi te a hey hayisse.9Ndii wa meeksoh ñaañ na raak inah-inah : Haf ci yasna-kanak ci ceɗ tangooci yasna-kanak ci ɓitɓi ɓoof nga ca. Ca nam nik buur yasna-kanak :10Yatuus ci keeniɗ, yasna-yino'ɗohi nikiɗ buur, yasna-kanakɗohi hayɗi paaɗ te a hay ɗah, a joy nik buur jamano ƴissuut.11Ini kaɗ ŋ ɗoopti nikee te a nikisɗi, a yi ŋ haf ce a yi yasna-kaahayiɗ ɓa, a kindohuuɗ ŋ yasna-kanak ci, te aa kee ɗumbsa.12Wiic ci ndaŋkiyaah ci fu hot, ɓa buur, ɓa rahasɗi nguur paaɗ, waaye ini ree wahtu, ɓa hey eɗse ne ɓa nik buur, ɓa hun na ɗoopti.13Ɓeɗ ɓaah ini ɓa liiɓ tum, weɗ ne ɓa eɗ ɗoopti hatiliŋ ɓa na kinguur kiŋ ɓa.14Ɓa hey hiñohe na Kuyiŋ Mbaali ƴini te yeem hey ɓa saahe, laam a yi Heɗiŋ heɗ ci, Buuriŋ buur ci. Ɓooɓi a ɓeeɗuk te a kooɗta ɓa, ɓa ndengɗukka ɓa rissa nik na ɗe, ɓooɓeem hey name saah na ɗe. »15Malaakaani woyissa so ne : « Masuɓ ci fu hot toonkohi ɓooffa nga ca, ca cuuɓ ci, mboolooci, kur ci na peɗeem ci.16Wiic ci ndaŋkiyaah ci fu hot na ɗoopti fu hot hey sange ɓitɓi toonkohi. Ɓa hey ɗe tume tas-ɓarang dung, ɓa ñam septiŋ ɗe, ɓa hey ɓarngiɗe kur-taahi, ɓa doha.17Laam Kooh tumeen ini a waaɗ ŋ keeñ ciŋ ɓa ne ɓa tuma, ŋ ineem ɓa hey hune ɓa ɓaah ini ɓa liiɓ tum, weɗ ne ɓa eɗ ɗoopti hatiliŋ kinguur kiŋ ɓa po ini Kooh woyee mit.18Te ɓitɓi fu hot, a kur-taahi yakki na nike buur, ŋ ɗafuk buur ciŋ Adina. »