Aŋelo 7 jaŋe râqâc-jeŋickonec wiac mâreŋko hoŋkepie wahawec
1Eme ufuŋmaŋkonec dâŋ wiwira sâko wahame manapo. I aŋelo 7 šiŋuc jazawec: “Ŋoŋe rarâ râqâc 7 hoŋkepie Anuture kimbeŋzi mâreŋko huzejec.”2Eme aŋelo namba 1 eki rarâ râqâc-ticnaonec wiac hoŋkeme mâreŋko huwec. Hume ŋic qowi mimicnere šâŋe qâreŋ bajumbiŋ â hawari-ticne dieŋzi hecnembiŋ jaŋe wicšâhâc šâic sisiac-ticnehec mâretec fua-jarewec.3Eme aŋelo namba 2 eki râqâc-ticnaonec wiac hâwecko hoŋkeme huwec. Hume hâweczi soc tânipu tinac ewec. Eme irec hâwecko qowi hâmo-fârembiŋ.4Eme aŋelo namba 3 eki râqâc-ticnaonec wiac hoŋkeme opâo â riqicko hume soc efârewec.5Eme aŋelo opâ soŋaŋ râekicne eki šiŋuc mume manapo:“Tiŋne â tiri, jumeŋzi juekic,okac babazuge bâbâsifuc tâmiric.6Jaŋe mitiŋic â porofetefâcgejaŋere soc sipirickembiŋtesoc jaha gumec-jopatec nâŋgopieŋ.Eme i sâcke-jarekac.”7Eme alatazi dâŋ šiŋuc mume manapo:“Jâmbomac, Wofuŋ Anutu bapafâre,okac babazuge tiŋne â fâri fideteŋ.”8Eme aŋelo namba 4 eki râqâc-ticnaonec wiac hoŋkeme šoaŋko huwec. Ira hume šoaŋ šocne bâruŋke-jâmbâŋkerâ ŋic mâretec šacjopawec.9Eme ŋic jaŋe šoaŋ fâroroc-ticnezi boc rikec-jopame Anutu, micticnere wiac micne momori iŋuc fuawec, e šâŋe biŋe-ticne musâqorembiŋ. Erâ maŋjeŋic sifu mi bârisierâ Anutu mi sâsembiŋ.10Eme aŋelo namba 5 eki râqâc-ticnaonec wiac qowi mimicnere ŋicwofuŋ ŋeŋeo hoŋkeme wahawec. Wahame hae mâreŋ-ticne dapâc efârewec. Eme ŋic jaŋe šâic serereŋ manahuc nameŋ-jeŋic kitâcnembiŋ.11Eme šâic-jeŋicte â wicšâhâc-jeŋicte Anutu sambâŋ rune musoriŋkembiŋ. Ehuc maŋjeŋic mi bârisierâ juju bapa-jeŋic mi qikiŋnembiŋ.12Eme aŋelo namba 6 eki râqâc-ticnaonec wiac hoŋkeme Eufrata opâ sâkoo huwec. Hume opâ šickewec. I hata fuame šoaŋ wewefunaonec ŋicwofuŋ fisiniŋte iŋuc fuawec.13Eme no honehape oâre mickonec â qowi mimicnere mickonec â porofete burecne ere mickonec demoŋ repicne jahec â moc qaqec hawari tinac wefumbiŋ.14I jaŋe demoŋ fârine, mâsi wiac baniŋte tâpiri fojarekac. Jaŋe hâcne mâreŋ sâc irec ŋicwofuŋ qafeŋ-jopapie Anutu bapafâre ere dameŋ sâkoo râsi roroc erâ fisirâ qaqac eniŋmu.15“Manaŋgopieŋ, no šika qaqa jaŋe iŋucne ututuŋ fisipemu. Irec moc e biuctac jume mimi-ticne fuazacte maŋɋâri juhuc ŋaqi-ticne soŋaŋkezejec. Iŋuc eocmu ere manape šerine ekac.”16Eme demoŋ jaŋe mâreŋ moc šâŋene Judadâŋko Hamagedoŋ mukicne, ira ŋicwofuŋ hetumaŋ-jopa-fârembiŋ.17Eme aŋelo namba 7 eki râqâc-ticnaonec wiac sawao hoŋkeme huwec. Eme ufuŋko eri ŋeŋe ŋeweckonec dâŋ wiwira moc šiŋuc wahawec: “Efârekicne.”18Eme bâbâric â ɋuŋ parandaŋ â micfânâŋ fuawec â homeŋ kâcɋene sâko jâmbâŋ bawec, sâc iŋucne moc ŋic fuarâ juwarembiŋko mi bawec.19Eme hae sâko fâuckeme jahec â moc ewec. Erâ mâreŋ sâc ŋic jaŋere hae tâtie-fârewec, â Babe hae sâkore rufâc jaŋere Anutuzi iŋuc jaha manasurâ kimbeŋ-ticnere waiŋ opâ gumec-jopawec.20Erâ wâc nuc â tiki mâmâc sirowe-fârembiŋ.21Á sambâŋkonec hoe sanaŋ hewec, hândâŋne buse iŋucne, izi ŋic hecjopame Anutu musoriŋkembiŋ. Hoe i hâhâwicne jâmbâŋ, ima-ticnehec.