1Kafnge én, nun teengu di langit satu too bong gamtikeng nun gumtatekan, dunan satu libun msut, na lakuan i duh, na i bulen di dungan i blian, na di tah ulun nun kyangen, dunan sfalò lwe blatik.2Maltien kenen na fan sut i tingaan, na mkit kenen du lyon i katdukan.3Na nun fa satu too gamtikeng msut di langit nun gumtatekan, dunan i too bong naga fulè, dnagit dragon. Na fitu i ulun na sfalò i sungketan, na di kat ulun nun kyangenan.4Na fagu di ikongan dyolan satu alel mdà di tlu di kdee blatik na ftatekan ditù di tanà. Na tadag kenen di muna i libun fan sut i tingaan, du fye knaanan i tingà di ksutan.5Na di ksut i tingà i libun ani, lagi. Na landè kibò i naga kmaan i tingà lagi falami sut du nun samkot dun, na neben salu di gusudeng Dwata di langit. Na nun duh kadang magot kenen i kdee dad banwe di tah tanà, na landè gamfisan kenen.6Na i libun ani mila kenen di banwe gulandè to, du nun gumnean tafatlagad Dwata kenen. Na déén gumifat Dwata kenen mlibu lwe latu nam falò duh i klon.7Na di bang én, nun bong kasfati di langit. Mikaél, i ulu di dad kasaligan Dwata, na i dademe kasaligan mdanà di kenen, sanfatila i bong naga fulè dnagit dragon na malas i naga na i dad kasaliganan.8Kabay fisan i naga na i dad kasaliganan, na fnang dale mnè fa di langit.9Taman batla i bong naga na i dad kasaliganan mdà di langit ditù di tanà. Na i bong naga ani, dunan i ulad mdà di muna fa dnagit busaw, na Satanas én gal mgaw i dad to di klamang banwe.10Kafnge én, lêmangu linge i bong talù mdà di langit, manan,“Ani i kagdohò i kafalwà Dwata i dad to,na tafite Dwata i bong glalan magot i kdee,na tambù i kagotan,na tanun glal i To Mgalékan, dunan Krayst Dyisas.Du i dmalam dad flanekito di kafaglutmduh na butang di muna Dwata,tabat mdà di langit.11Na dad flanekito di kafaglut tagfisanla Satanasfagu di litè i Tingà Bilibili,na mdà di ktulenla i Tnalù Dwata.Na là mabtas di dale i nawala,bay gatlagad ale mati.12Taman flehew gamu dad mnè di langit,bay too magakdo gamu dad mnè di tanà na di mahin,du tadéén gukel Satanas,na too sè kaflabean,du gadean fukal nan i duh.”13Na kagatwan i bong naga ani, tagbat kenen ditù di tanà, na dlun i libun i sut tingaan lagi.14Kabay i libun, banlé Dwata kenen lwe fafak gambet fafak i bong kablak, du fye gayeng kenen mdà di bong naga ditù di gufnè kenen di banwe gulandè to i gumifat Dwata kenen di lam i tlu fali tngà, du fye là gnumah kenen i bong naga.15Na i bong naga ani, dfun bong yéél gambet i bong dunuk mdà di baan, du kayean ku manul i libun.16Kabay i tanà tmabeng i libun, du nsafan i bong yéél mdà di bà i bong naga.17Na ani baling gatnù i kaflabè i naga di libun. Taman mdà kenen du sanfatin i kdee bel i libun ani, dunan i kdee dad to mimen i flalò Dwata di dale, na tmulen i kaglut gablà di ku Dyisas.18Na i bong naga dnagit dragon, tadag kenen di falak di kilil i mahin, du nun fatanan.