1Ƴutta ŋ eɗuusa hapeel mand na ndooɗ ɓeesoha. Yi eɗ to wa woosa so ne : « Kaɗa fu ɓeesa Kahan Kooh na ini wila ŋ ɗooƴi na seeƴkohaana, fu kind ɓooɓa na ñaamke nga.2Waaye ini wila ŋ hari, kanaa ɓees, faɗaa laam e kosaaɗiici eɗuu wa : Ɓa hey daksohe kur kiŋ Kooh ini ree caɓin ndaŋkiyaah-nikiis na kanak (42).3Ŋ hey tuuƴe seedeeciŋ ngo kanak ci, ɓa ɓekuk kulɓa ruy te ɓa woo na ɓooɓi ŋ tiikiŋ ngo ini ree neeh junni na neeh teemet-kanak na neeh ndaŋkiyaah-yasna-yino (1260). »4Seedeecii, e ɓeɗ tas ciŋ oliiw ci kanak ci na laampaaci kanak ci te ɓa tufkiɗ ŋ fiki Heɗ kehƴi.5Ɓo' waaɗ ɓa tum miskiɗ ɗah, yongkaah hey pule ŋ nguɓ ciŋ ɓa, wa hoomiɗ ɓi sang ɓa ; ee di', ɓo' nu waaɗ ɓa tum miskiɗ ɗah, a kaanohan ɗaa.6Ɓa onuuɗ ne ɓa min rang eel ci po ali toɓ keenuu ŋ kehƴi ŋ jamanooni ɓa woyohan ŋ tiikiŋ Kooh. Ɓa namiɗ onu ne ɓa min ɓoƴis masuɓ ci ñif te ɓa namiɗ min ruhsiɗ ŋ kehƴi naamo nu nik, wahtu nu neɓoh ɓa ɗah.7Waaye ɓa ƴut seede ɗah, ɗoopti puloh nunga topaaɗiina hey hee hiñohe na ɓa, a saah ɓa, a ap ɓa.8Fiɗaaf ciŋ ɓa faɗsan ŋ mbeeddaanaŋ kur-taaha yakka na mandtiɗkohse Sodom wala Misra. Heɗ ɓa daaƴohu ŋ kurwaa ŋ kur-taaheem.9Ɓi ɓo' ɓaah ŋ cuuɓ ci jen na heet ci jen na peɗeem ci jen na kur ci jen hey marke fiɗaaf ciŋ ɓa, ini ree neeh kaahay na camban te ɓa hey sangohe ne ɓa ɓeku ŋ ruy-ruy.10Ɓooɓi gen kehƴi hey neɓse ŋ kakaan kiŋ woosuuɗ ci kanak ceem, ɓa hey mbuumbaaye po ɓa aaftiɗohe sagu miskiɗ ci ɓa ɓekee ɓa.11Waaye wi neeh ci kaahay ceem na cambani coot, iik kipes puloh ŋ Kooh hayya, aassa fiɗaaf ci ; weɗ ɓa kurkoh ɓa tufukka. Jaarra ɓooɓi markee ɓa tiitta po ɓa kot-kotɗeeɗa.12Hooso meeɓuuɗ kerhukka ŋ Asamaan wa woosa woosuuɗ ci kanak ci ne : « Rapaat ndii ! » Eel ɓayya ɓa, ɓa rappa Asamaan. Sangiɗ ciŋ ɓa hoteeɗa nga.13Ŋ ɗiska ɗiska, kehƴi yoondɗukka yoondɗuk keeh-keeh, haaƴ yino ŋ haaƴ ci ndaŋkiyaah ciŋ kur-taaha keennda. Ɓo' junni-yasna-kanak (7000) kaannda ŋ yoondɗukaŋ kehƴa. Ɓi rawɗi kaan nga jaahiɗta, ɓa yakɗeeɗa Koohiŋ Eel ci.14Naamooni kanakɗoh cootiɗ. Weɗɗi, wi kaahayɗohan wa ɗii hayeeɗa maañaaɗi !
Kulɓi yasna-kanakɗoh
15Wa kehƴa yoond po ƴutta, malaakaani yasna-kanakɗoh kuluɓpa, ɓi hooso meeɓuuɗ kerhukka ŋ Eel ci woyeeɗa ne :« Kotii, nguuriŋ Adina,wii ŋ yaah Heɗ ɓoona Kiristaaniŋ ɗete a nikan nik buur po faw. »16Yakak ca ndaŋkiyaah-kanak ca na nikiis ca (24) ɓoofee ŋ fiki Kooh ŋ ɓoofoha-buur ca ɓa eɗsee, yippa puk ciŋ ɓa ŋ kehƴi, ɓa ñaamkeeɗa Kooh,17ɓa woyeeɗa ne :« Ɓoo ɓii corkiɗ ɗaHeɗ ɓoo Kooh,Heɗ-hatil,yaf nikee te yaf nik,hatiliŋ ɗa yakiɗ !Ɓoo ɓii corkiɗ ɗaŋ kooɗi fu kooɗ hatiliŋ ɗa,fu tufkiɗta Nguuriŋ ɗa.18Cuuɓ ci ayrukeen,waaye ayrukiŋ ɗa weɗ hay.Jamanooni fu atte'ohan kaaniɗ ci reyiɗ,wi fu aafohanñaam ciŋ ɗa, woosuuɗ cina ɓo'-Kooh cina ɓi nup tiikiŋ ɗa,ƴin na yakak.Weɗ jamanooni fu naman yahrohɓi na yahrohe kehƴi. »19Ŋ ineem, Kahan Kooh wi nik ŋ Eel ci, rangsukka, Wahndeeniŋ ambtiɗohiŋ ɗe hotukka nga. A melñeeɗa, ɓi ɗuuɗ kerhasseeɗa, inding ci laɓeeɗa, kehƴi yoondɗukka, toɓ galacaac raakiɗ hatil keennda.