Revelation11aly_wbt
Angkakert atherr Akngey-wenh
1Ingwerentyel ayenh anthew arwerl arlpenty arraty ruler-apeny measure-emeleyew-arelh. Rap angkew, “Arwerl nhenh ina. Alha, aylpenha Akngey-wenh tyaty ilkwewarl. Arwerl measure-emeleyew-arelh akngerr-inger arrerna tyaty ikwer-angkwarr, ntwaw iterl-areyew, warl ilek-apenyarlap ran. Arlpenty apek, rtwety apek. Measure-emela irrkaty-angkwarr apwert yanh amperneyew-arelh. Ingwer-rneman rtnenherreyel warl ikwer-itwew, nakemel Akngey-warl aylelherreyel. Arey renh-rnem count-emelemel. Akngerr apek, irrpetyap apek.2Yard yanhan aketh-ampenyan mentyarl, measure-emeley-angenh. Akngeyelan yard yanh anthew ingwer-rnemew, renh iterl-arey-angenh-rnemew. Ra anthew tawen Jerusalem-then ikwer-rnem, rernem atakeyew. Rernemap lthwemel alhaynterl-aneyenh apmer ikwer-itwew alkent 42-ew-atety.3Rernemarl apmer ikwerel aremerrey-alhenty, atha angkakert atherr ikwer-rnemew thweneyenh, angka arraty atyenh ilaynteyew. Ratherrap ilerl-aneyenh alkent 42-ew-atety, arnkwa apmwel aylpemel amperrngerremel.” Alakenh-anyem ra angkew atyeng.4Angkakert Akngey-wenh weth-atherr ratherr intem-antey rtnem Akngey-itwew. Ran atyetyart aneyel ahern ingkerrenh-angkwarr. Ratherran arwerl olive atherr-apeny, ampwal arlpenty weth atherr lherrm-angketyarr-apeny.5Ingwer-rneman ilkelhey-angenh ikwer-atherr artewenty. Ingwerenty apek iterrem, renh-atherr atweyew-arrpantey, kel rwa lherrm arrakert ikwer-atherr-they tyerrelhem, ywerrelhelemel atwem. Ingwerentyel renh-atherr irrwernem, ratherrap renh-rnem ilwerl-athenemarl.6Akngeyelan renh-atherr rlterrkelew, kwaty-then rntwey-angenheleyew. Ratherrarl angka Akngey-wenh ilerl-apaynteyenheng-arey, kwatyanap rntwey-angenh, arrangkw arrpemarl. Akngeyel renh-atherr rlterrkelew arrpemarl, kwaty apmweleyew, kwatyan arrnganem irreyew. Ratherr ilkelhentyelan, apmwa ilek-ilek thweneyenh ahern-warl.7Alkent 42-ew-atety ratherr alherl-aneyenh, ilerl-apaynteyew angka Akngey-wenh. Ikwer-penhan arraylenty anyent tyerrelhey-aynteyenh irrka irrkaty intwer ikwer-they, renh-atherr antwerrkeyew. Rap renh-atherr atweyenh ipmew-antey.8Rap ipma atherr iwerlelpeyenh iwerr ampep-itwew tawen ilkwa Jerusalem-itwew. Apmer ikwer-itwewan Jesus atwemel, arwerl iylpeyl-atherr-warl tywenew. Akngerrel apmer renh itnewem Sodom, Egypt-then. [Rernem iterl-areyel, artwa apmwernem anenh apmer ikwer-atherr-itwew awank-akerr.]9Ya, ipma ratherr ayntaynteyenh arlta irrpetyew-atety ingwepenh-ingwerel-anem. Akngerr-anem apetyeyenh apmer arrpanenh-they, angka ingwerek-ingwer angkemel – irrpwerl-then, arlter-then, arrkay-then. Rernemap ipma renh-atherrenh atwew-areyenh, ingwer-rnem-then artwereleyenh, akwernewerr.10Rernemarl renh-atherr arerl-aneyenhel, rernemap inkwerelhemel angkerrerl-aneyenh alakenh, “Mwerr wenh! Weth-atherr ipmanem! Ratherran pwarrk anthenh anewantherr, aleyan arrangkw-anemarl!” Rernemap akarr-akarrerreyenh, amern kwenty arlkweyew, ilek-ilek-then antherremel inkwerelhemel.11Rernem alakenh irreyenh arlta irrpetyew-atety ingwepenh-ingwerel-anem, ratherrarl ipmantey aynterl-anerl-aneyenh. Ikwer-penh Akngeyel ikwer-atherr rwarr anthew, ratherrap itetherrenhey-alpew-anem anamerl-antey, rtnenhey-alpew-anem. Akngerrel arew, rernemap apateyelpew atererremel.12Ratherr awew, ingwerenty atayel angkew ikwer-atherr irrwerl-they, “Apetyenh-atherr nhenh-warl!” Renh-atherr arlkarerreyel-rnemelan intwarew, ratherrarl irrwerl alpew kwenpay-angkwarr.13Ahernan artewenty innga arrewew-anem, iltep-iltewelhew ingweram-angkwarr. Warl ingwerentyaman aytnew ngkweltyerremel. Akngerr ilwernerrew, 7,000 innga. Ingwerenty iteth-anteyarl anew, atererrew innga, rernemap Akngey nakew.14Alakenh-anyem apmwa ingwer-anem aynteyenh. Alerl-antey apmwa anyent ingweran aynteyenh.Antyerl ingwerel-anem terampet namp 7 angkelh-angkelheleyel
15Antyerl ingwerel-anem terampet ikwerenh angkelh-angkelhelew. Ingwer-rneman atayel angkerrenh irrwerl alakenh:“Akngeyel Jesus Christ rlwanew.Rlengkan ratherr atyetyart ilkwanem anem ahern ingkerrew.Akngey ran atyetyart aneyenh arawerrng rlterrk-akert intem-antey!”16Ampwa alkenh weth-rnem 24 rernem anenh-antey Akngey-itwew arrwekel-ampenyel chair ikwerenh-rnem-wenh-itwew. Rernemap kwenerrew-anem, atnertel-ayeth ayntemel, nakemel Akngey alakenh:17“Akngeyay, Atyetyart Ilkwa Ingkerrenhew! Anantherr ngenh nakem!Nga arrwekeleny anenh, iteth-antey aneyel.Aleyan nga atyetyart ilkwa aneyel arawerrng rlterrk-akert apmer arrpanenhew!18Ingwer-rnem ngkweng awelhey-angenh-rnem rernem ahelerrenh ngkweng.Ngan ikwer-rnem ahelerrem-anem aley.Rlengkan arlta ntwa rlwanewarl, ipmernem itetheleyew,renh-rnem ayerneyew-anem anyentel-anyentel.Rlengkan ntwa ilek-ilek mwerr-angker anthem angkakert ngkwenh-rnemew,angka ngkwenharl ilenh awank-akerr.Rlengkan ntwa ilek-ilek mwerr-angker anthem ngkwenh-rnemew, akely-akelyew ilkwetyilkwew,rernemarl ngkweng mwanty-antey awelhenh.Aleyan nga awakelhem ingwer-rnemew, ngkwenh-rnemarl atwenhew ahern nhenh-itwew.Ntwap inngarl renh-rnem irrarlkemel atweyenh.”Alakenh-anyem ampwa alkenh weth-rnem 24 angkew.19Ikwer-penhan ingwerentyel arriwan altywerelew Akngey-wenh tyaty ilkwitwew irrwerl. Arriw-angkwarr athap arew box impen Akngey-wenh. [Apwert ilperr-ilperr atherr angka Akngey-wenh angka rlterrk-rnem-akert 10 ayntenharl box ikwer-itwew.] Atharl arew box impen, awely-awelyan arrkemel angkew, ahernan arrewew, aperrkwer aytnew irrwerl-they.