Sesuupuek ine pindik lo Yesus Kristus1hrw_wbt

1Sesuupuek ine pindik lo Yesus Kristus. Deo e tow e sunwar a tife Yesus tibom, una fanangsi re tongge na mus kia, ine sa eu fuut mung mung gii. I e sesuupuek ini tikin lo anggelo kia, se i e tuleni use kaltu na mus kia, Jon.2Ma yau Jon, ya sesuupuek ine mara mok ya pari. Igii e sunwar ke Deo ma petpeteng ten lo Yesus Kristus.3Warfakausi eu ta ilo se gii ka wese e fan warwar profet gii, ma warfakausi eu ta ilo seri a ri ka ongni ma ri ka bingfamti e sa ri sam seti ilo bala, anwarow biing e sau fatat.

Are ma Fabenge ke Jon

4Yau Jon, ya siisiit tif gam na baba fis na sios ailo prowins ina Eisia: Ya nining ini gam u kepe e warfakausi ma siaro singe se e sam ta tingwa, se e ta i geinggii, ma se e amu puek, ma singre baba fis na tangwa i famu ine sia king kia,5ma singe Yesus Kristus se e sesesuupuek riis ine fan mara warwar ke Deo, ma i e ta kaltu baba tikii una matet mil kosnge minet, ma i e ta king kere fan mara king gii lo nal. Tife se e bur kiar tikin ma kabuk faliunge kiar kosnge fan tubiil kiar tikin lo andaku,6ma i e sam touf kiar usi ini kiar u efefe tiim tura ilo bala kepmale kia ma kiar ka ta fam pris una faim singe Deo ma Tamow. Mara finaswen ma rawas e ta ke Deo tibom, bingne bingne. E tikin.
7Par! Iya ka puek ilo bala fan aumbalbalma mara matmatang kaltu riu tiin pari.Seri ming a ri ka taba riu pari.Ma tongge nano tinglo nal riu teng anwarow lo i.Yow, mok gii eu puek! E tikin.8Deo Taufi e war aregii, “Ya na Alfa ma ya na Omega, se e sam ta tingwa, se e ta i geinggii, se e amu puek, ma se e Rawas Tikin.”

Numbiil ke Jon

9Yau Jon, ya na tualikmi ma kiar tiim lo kiar ilo bala mafet ke Kristus ma ilo kepmale kia ma ilo bala sinang na ti rawas una kepe e mafet ususi e titinge lo Yesus. Ya ta ulo rerek ulo bit Patmos, anwarow ya sam sesngeni e sunwar ke Deo ma ya ka sesuupuek ine Yesus.10Lo biing ke Taufi, Tangwa Riis e fafonsi yau ma ya ka ongni e neng e angkiimkiim u nami yau, dungow e ngo are ampung,11ma ka war aregii, “Siit famti e mara mok o pari ilo ti buk ma o ku tuleni tifre baba fis na sios gii: Neng ina Efeses, neng ina Simerna, neng ina Pergamum, neng ina Taiyataira, neng ina Sardis, neng ina Filadelfia ma neng ina Laodisia.”12Ya ka matet ya ka didiu una par ini se e gongon sing yau. Biing ya didiu, ya pari e baba fis na sung kalut na titi singre fan lam, ri gow lo gol,13ma ulo falifu lo ri, ya pari e neng e ngo are Sikow e Kaltu. I e los lo kolos e tapak ma ka soksokman ine aneueu ri gow lo gol.14Ololow e murmur are ololon sipsip murmur ma e murmur tikin are tom pambalbal e murmur tikin, ma wan mata ka karkaref are iif.15Ung kekow e soksok are bras ri tunu ilo bala iif bakir. Ma angkiimkiim aiya e ngur are dungow e dan e suu.16Ulo galun limow miil, i e kepe e baba fis na angkeltot, ma bainat ine wan ngisow nano e faen tikin e suu tinglo ngusu. Ma mata e fufuf are pisii e pal ten tikin.17Biing ya pari, ya luutuf ulo fow e ungkekow areini ya sau met. Kala i ka tow e galun limow miil ulo yau ma ka war, “Mangena soke. Ya na Tofnge ma ya na Rorop.18Ma yau tibom e ta se e liuliu. Ya sau met. Safle par! Ya sam liu ma ya sam liuliu aregii bingne bingne. Ma ming, ya puse lo fang ki lo minet ma tinglo male kere fan minet.19“Iya, o samusu siitufu e fan sa o sau pari, fan sa eu fuut geinggii ma fan sa e amu puek.20Pindik lo baba fis na angkeltot a o ka pari ulo galun limang miil ma baba fis na sung kalut ri gow lo gol una titi singre fan lam, i gii: Baba fis na angkeltot e ta fan anggelotinglo baba fis na sios, ma baba fis na sung kalut ri gow lo gol una titi singre fan lam e ta baba fis na sios.
expand_more
Search