4Ne ndi Yohane nighajhandikila malongo chaba gha bhando bhibhannyeketii Kilichitu ghighabhii ku kilambo cha ku Asiya. Ninyope umbone na uteeke kubhoka kwa Chapanga. Jwenio ndi jwakibha na jwabhile na jwapakuhika na kubhoka kwa ihuke chaba ibhii nnonge jha kigoda chake cha unahota nkolongwa,5na kuhumii kwa Yecho Kilichitu, ndi jwahobholika, jwatumbwila kuyokechwa kubhoka kwa bhibhawile, jwenio ndi kilongoche jwa akanahota akakolongwa bha pannema. Na kubhoke kwa jwenio atupahile na atujhogwile kubhoka mu kipungo cha muhakaho kwa ndela jha miyahe jhake,6ngatubhekita twenga, tubhii mu unahota nkolongwa gwa akapiya matambiko, tutumikii Chapanga, Tate gwake. Kwa jwenio Kilichitu kubhehe na ukolo na makakala, machiko ghoha ghangapeta! Amina.7Nnola! Atenda kuhika mu mahunde! Kila mundo nammona, ata bhala bhibhanhochita, na bhando bhoha bha pannema nabhakokoleka kwa nhwalo gwake, yenio ndi chiipala kubhehe! Amina.8Bhambo Chapanga jhuna Makakala, jwabhile na jwakibha na jwapakuhika ilonge, “Nenga ndi Alufa na Omega,” yane jwakutumbula na jwakujhomolela kwa ilebhe yoha.
Maloto gha Yohane
9Ne ndi Yohane, nnongo gwino mu kulombona na Kilichitu, mmi pamonga na mangota mu kuhimbilila malagho ghighankolela bhoha bhibhabhii munahota gwake nkolongwa. Nenga punikibha namela kupelekwa mu kilendela chu ku Patimo ngita napungwa, nhwalo nikibha natangachila bhando lilobhe lya Chapanga na kwalobholela uchakaka gwa ilebhe ya Yecho Kilichitu.10Bhahe, lichiko limo lichiko lya kunnyinamii Chapanga, Uhuke gwa Chapanga ngahikita panane jha nenga, nganyohina lilobhe likolongwa kunyuma jhango, ngita lilobhe lya lipenenga,11lilobhe lyenio lilongila, “Jhandika mu kitabo ghimaghabhona na mighapeleka kwa malongo chaba gha bhando bhibhannyeketii Kilichitu, ghighabhii ku Epecho na ku Chimilina na ku Peligamo na ku Tiyatila na ku Chalide na ku Filadefiya na ku Laodikiya.”12Ngang'alambwika nimone jwalonge na nenga. Ping'alambwika nganiibhonita inala chaba itengenichwe kwa chaabo yakubheke mule,13panakate jha inala chaba ya chaabo yukubheke mule yela nganammona jhumo jwakibha ngita Mwana gwa Mundo, awalite likanjo litandamaho ade mu magholo ghake puka na luhunga lwa chaabo lulupengehine panganga.14Majhunjo gha umuto gwake ghakibha mahuu mbuu ngita litonje na ngita theluji, miho ghake ghalangila ngita lulime lwa mwotu,15magholo ghake ghang'anyima ngita chaba jhing'alita na kukewa hake pa litanule lya mwotu na lilobhe lyake likibha ngita lilobhe lya mache palipupuma.16Mulubhoko lwake lwalelo akibha na ndondwa chaba na mu nnomo gwake mupita upanga ghutema kone na kone. Kumiho kwake kung'ala ngita lyobha likale lya muhe.17Pinimonita, ngang'wila pamagholo ghake ngita ndehi kuwegha. Ngamekila lubhoko lwake lwalelo, ngalongila: “Nkoto kujhoghopa! Nenga ndi jwindumbwila na jwa kujhomolela.18Nenga ndi jwenio jwabhii ghome! Nikibha hwile, nambo ngohe ne mmii naghome machiko ghoha ghangapeta. Ngwete pungulo mu kuwe na ku kilambo chibhawile.19Ngohe jhandika ilebhe imiwene, ilebhe ihenga ngoheno na yela ipakuhika.20Chile jha ndondwa chaba imiwene mu lubhoko lwango lwalelo na chile jha inala itengenichwe kwa chaba ya chaabo, yukebheke mule, ndondwa yela chaba ndi akatumiche bhibhajhemelela malongo gha bhando bhibhannyeketii Kilichitu na inala itengenichwe chaba ya chaabo yukubheke mule ndi gheniya malongo chaba gha bhando bhibhannyeketii Kilichitu.”