SAM96kij_png

Yaubada matauna Giyoumatala

1Bitawosisi wosi pilavau baisa Guyau,Bitawosisi baisa Guyau komwaidodasi yakidasi mina watanawa.2Bitawosisi baisa Guyau, e bitayakawolaisi matauna.Yam yam bitakamitulaisi bulogala bwaina kidamwa bogwa eikatumovaidasi.3Bitakamitulaisi matauna saina toguyugwayu baisa boda ituwoli ituwoli,e la vavagi topilaveka baisa mina watanawa.
4Guyau matauna toveka, e ibodi kala yakaula saina kwaiveka,biboda kala taimamila odubasi komwaidosi yaubada.5Boda ituwoli ituwoli si yaubada tokoluwokuva wala,mitaga da Guyausi eibubuli labuma komwaidona.6Kala kalugologusa visigala saina guyugwayu sainela isisu baisa matauna.Peula deli vavagi kweminabwaita ikasewoki la Bwala Kwebumaboma.
7Komwaidodasi mina watanawa, bitayakawolaisi Guyau.Bitayakawolaisi kala katububula deli la peuligaga.8Bitayakawolaisi matauna Guyau Toguyugwayu.Deli da semakavaisi tasuvisi ola Bwala Kwebumaboma.9Avai tuta matauna Tobumaboma iyoumatila, takavaginasi baisa omatala.Kutatuvasi baisa omatala, komwaidomi mina watanawa.
10Talivalasi baisa komwaidona boda ituwoli ituwoli, “Guyau matauna goli Guyau.Eisaili valu watanawa okabala, gala availa gagabila biyagi.Matauna la yakala baisa mina watanawa deli karaiwaga duwosisia.”11Valu watanawa deli walakaiwa, bukumwasawasi.Bolita deli maunem, kaigami kaigaveka bukugovasi,12e bagula deli avaka avaka isusinasi bukumwasawasi.Kai olawodila bigovasi deli mwasawa13avai tuta Guyau bima biguyau baisa ovalu watanawa.Matauna biguyoi tomota odabala pwaipwaiametoya ola karaiwaga duwosisia deli la kibobuta.
expand_more
Search