1Kuwa kew en su edlipey kiw pinaaǥi te kegkanta,ne ed-ugyab kiw para te Nengazen he endilungè tew wey menluluwas tew.2Ed-uvey kiw ziyà te kandin duma is kebpeselamat,ne ed-ugyab kiw is egkanta te kedeliǥa tew kandin.3Su is Nengazen, mekeǥeǥehem sikandin he Megbevayà.Mekeǥeǥehem sikandin he hadì wey lavew sikandin te langun he zuma he menge ed-ezapen.4Kandin is kinezizeleman kayi te kelibutan wey is puntur te menge vuntud.5Kandin daan is daǥat wey is tanà su iyan sikandin mibaal kayi.6Kuwa kew en, edluhud kiw te ked-ezapa te Nengazen he midlimbag kenitew.7Su iyan sikandin Megbevayè tew,ne iyan kiw menge etew zin he mibentayan din wey mid-elimahan din iring te kebantey wey ked-elima te menge kerehidu.Emun egkezineg niw ǥuntaan is egkeǥiyen te Megbevayà,8ne kenè niw pekezesena is gehinawa niw iring te mibeelan te menge kepuun niw zengan hein diyà sikandan te Meriba,wey hein diyà sikandan te sibsivayan he Masa.9Migkaǥi is Megbevayà te,“Migezaman e zan dutun minsan pa neehè dan is tavang ku kandan.10Ne seled te 40 he tuig is kegkepeuki ku zutun he lapis te kevuwazan.Ne migkaǥi ku he mid-iniyuǥan a zutun he menge etew ne wazè dan sunuza is impenurù ku kandan.11Ne tenged te pauk ku, ne utew meheǥet is lalag ku he kenè dan ebpekeseled diyà te tanà he zutun ku pezem sikandan ibpehimeley.”