Evetu Genembo Isasambu Da Ijujari Kato Mo, God Numori.
1Arie Bajari, God ari ekoko embo ghamo baoro dae eraira, nimori. Nendae janje eko eraesa ava, ijugaso gaore!2Evetu genembo isasambu ainda ijujari kato nimori. Arie, ere fu!Evetu enembo totofo sakai sise, ivuga futo eraera, ainda mino ava, mutaso baore!3Arie Bajari, ari ekoko embo amo ghousa mavega ivuga ghae irareri?4Tafasara embo ghousa mavega totofo sakai sido yareri, ákotugo nenda tafasara eraera aindae sakai seraeri?5Arie Bajari, ne ninda natofo ava fati bebetegerera, ne ninda totofo ava kateyavara futo use mema erefutera.6Ne roriri a babate ava dorureoro amomonjegeraera, a kotugo oro mendeni esa fera,namondeda endada iritirera ava, de goregheraera.7Aminguse seraera, “Bajari namonde jo gae eraira.Namonde rea eraera ava, Israel embo da God jo kasama ae eraira.”8Aminge seraeva aindae resena, ne daghariri. Ne kasama nanjigo barevu?9God namondeda dengoro mane ututusira, ava nenda geka ningari jo inono iraeri?God namondeda diti ututusira, aikena gari fakarari? Givu!10Enda da natofo nanjogo irera, aindae ghoghora nune seraira.Avata jo ghoghora vanembo sae arira. Nenda aito fugari da mino barago mutari, itatama arera.Evetu genembo isasambu ainda ijuga kato numori. Ágido, kasama nunda tofori.11Evetu genembo rea koteraera amo, Bajari nu kasamari. Ne jo kote simbugae eraera, ava nu kasamari.12Arie Bajari, evetu genembo nine dengoro induduse, ninda agho dari ijugeraesa, aimi ivuga use irera!13Gitofu aimi nemokena dombu kosero refera ainda jokáda, ninda natofo dae goroto mutaso jangutururoro,ni gitofu da vagho simbugaso vosarera.14Ainda tuka mo, Bajari nunda natofo, jo doyae arira.Evetu genembo nunda tofo dae gategusira aikena, gukai jo mutae arira.15Sifo aminda, aito fugari sembae use koto edo ghusera, ava dodo geka bekáda bekáda sise koto udo yarera.Avavaga sirorarira amo, natofo eveva isambu ivugaghae amboda amboda udo yarera.16Gitofu osogo ari dae sedo fusera amo, na mave sonembari dae erorusi? Na mave sorise, gitofude osogo usi?17Bajari, na jo sorae aetira amota, na ambudo, totoi vosiya, ambari embode dabade fasaeteni.18Arie Bajari, “Na durariá” kotiseni. Avata ninda kavevera eraesa aimi na jigheso eroruseni.19Na mana mana use dubo buneraena amo, nandae kavenu nine seoso na saga faingheraira.20Ni itako jo, gavana mane ari eko ari da emboro rerebuse agho deraera ainde dabade, fetae aresa.21Gavana mane resena, evetu genembo eveva derari dae sise, manaka gayeraera, kotugo nenda ujuda use,evetu genembo dara jo ae usera ava, seoro deoro amburaera.22Avata Bajari, namoa soreraira, nanda God nane tumonde baingheraena aimi nandae sorega nune eraira.23Ari ekoko embo resena, nenda ari ekoko aindae sari ghamo barera.A kotugo nenda ari ekoko edo ghusera aindae nemoa basa eko beká ava jigharira.Namondeda Bajari God, aimi dari sirivo arera.