Sakai Sari Da Yaruri.
1Arie Bajari, nimokena aiyakoe sari mo, evevago bekári.Arie God ika bekáda iresa, javono nimoa gatise yaru sarera, evevari.2Ninda kavevera eraesa aindae, gita dombu eni dombu eniimi doruse evovodae sifoghae osa sedo gharera,a kotugo ninda geka seteso irira isambu eraesa aindae osa sedo gharera, ábarago evevari.4Arie Bajari, ninda ari babaigo eraesa aimi eari, na dubo eveva beká eraena.Nine rea ututusesa aindae na ivugaghae yaru sise dubo jeuro edo gharera.5Arie Bajari, ninda aito fugari ava babaigo bekári. Ninda kotari mo, kafurugori.6Geka sari dae erena ava, genembo ghuna irae jo kasama ae arira.Genembo kotari tufako aimi mino jo bae arira, amo eviri:7Ari ekoko embo, vive totoi vitiraira aminga ava, ne digeraera.Aminga ava, evetu genembo kosasa teria futo eraera, aikena gugua dige faseraira.Avata sifo amboda Bajari sari ne ambu tefo arera.8Ainda tuka mo, Bajari, nimo God ikada bekári, evovodae iresa.9Namane kasama erera, nindae osogo ari kakato amomonjegarera, a kotugo ari ekoko embo da fakina ava nine daso bejarira.10Nine eteso, nanda fakina kau borumakava babaigo ainda fakinago avavago edo irira.Na esimbugeteso, ivugaghae irá gheraena.11Nanda gitofu da fakina deteso bejisira amo na gosuseni,a kotugo ari ekoko embo mema dae dimbia sorara ero nininguseni.12O irari dambugo irari embo ninda sari ava eraera amo,kau ika goroba totoigo vitiraera aminga ava, ne digarigo eraera.A kotugo nenda bajari kau ika beriberia babaigo Lebenon iritirera aminga ava, bajarera.13Nemo kau ika mane Bajari da kambo jokáda govetero iritirera, ainda kakaugori.God da tafaroro kambo aminda irise, eveva itatamuse irera.14Ana edo irera, avata beká jijighuse irera, a kotugo evovodae baduru use, igi yauya ghuse fakinago beká iritirera.15Aminda fuge gosuse kasama erera, Bajari numo dambugo bekári. Nanda gagara katokena,kosasa eni tefori.