Sam91ntu_wbt

Doa Kx Mnc-xglele Yawe

Lrpalvc Kx Rlakitrq

1Mz nzmnc-xgle-krm Yawe kc tqmyalz-esz'ngrSa natubz mz nibrm.2X narpibzme mz Gct kc tqrninr kx, “Nim Gct rnge kc tqabrkitrx drtwrnge,Mz nzapu-krme bange lrpalvc kx rlakitrx.”3Murde sa na-arlapxle nim mz nzatrkangr kx yc kapq,X mz nzrpibqtingr.4Sa na-aclve-zpwxle nim,Na-apule kio kc tqwxbulvzole neideng.X sa na-angidatibzle natqdengMz nzapu-krbzle bam temz ngr lomrm kc tqyrputrngr nipna.

Bzkq Mwxlrq

5Bzkq mwxlrq mz nrlckxbq x nrlckxngrlx,Mz nzmwxlrti-krm drka', ncblo kxayo, x zyagox kxnabzngr.7Murde kxmule-esz' siu ngr leplz nzbz-aepztrpzng bam,Mzli kc Gct na-ayrplapx-ngrde kxdrka'-ngrng,X mcq mz mzpq nzbz-krdr,A' trtxpnzngr nzatrkati-krdr nim.9Murde mz nzrpi-krbzme mz Yawe kx nide me rlakitrq,X mz nzmnc-xgle-krm nide kc tqmyalz,10Trpnzngr doa x da kx na-atrkale nim,X trpnzngr kz zyagox kx navztrpq ma nyzm.

Yawe Aclve-zpwxle Nim

11Murde pipebz Yawe mz enjrl nedeng nztu-krbzlr mz nibrm,X nzaclve-zpwx-krdr nim drlvekeng vzkiq.12Naglqlr nim mz mqdr,Murde nanycm ma tqtcprtr mz rplz.13Mz nzrmcti-krm ningidoe kc bqnc, sa na-aovxioq nide.Kxmule-esz' nide drka' kxmatq, a' sa narnzlvzoq nide.

Yawe Ycmnebzle Bam

14Murde Yawe Gct rpile kx, “Sa na-arlapxx doa kx mrlztile ninge,X sa na-aclvex nide mz nzmnc-xgle-krde ninge.15Mz nzkqle-krde ninge, sa na-ayzlubo natqde.Kxmule-esz' da kx prtz, a' sa namnc-aepztrpo bade,X sa nakatxpxx nide mz nzkxpu-krdeng,X sa na-armyalzx nide.16X doa lc sa namcle nzarlapx-krnge nide,X nakabo bade nzlungr kxboi kx na-abrtz-ngrde.”
expand_more
Search