Nɨawari9hch_wb2
Teyuitɨwamete wa'ukiyari. «Nunutsi kemɨtiumɨ» kemanɨyɨne mɨpaɨ ketiukwikarieni. Rawiri nɨawarieya.
1Yawé, ne'iyarikɨ nepɨmatsitanɨawa,mariwemekɨ kepemɨtiyuriene naime netikuxatatɨ.2Nepɨnetemawieka 'ahetsie netiwiyatɨ,kwikari 'ahetsiemieme nekwikatɨ, 'aku 'Apemutewi.3Memɨnetsi'aye'unie mepukununuwa,mepekaxɨrɨwe meta mepɨtakukuwe 'ahɨxie.4'Ekɨ heitserie pemɨnetsi'upitɨakɨ, nehetsie pepunua,'ekɨ 'itsɨkame 'aixɨa pemɨtikuyuruwa, 'a'uwenitsie pepaka.5Kakaɨyari memɨkamate, pepɨwarutati, 'axamemɨte'u'iyari pepɨwaruka'unaxɨ,pepɨwarukumaweriyaxɨ yuheyemekɨ xewitɨ mɨkawara'eriwanikɨ.6'Uximatɨarika kaheu'akamekɨ memɨtatsi'aye'unie pepɨwarupitɨa,wakiekari pepuka'unaxɨ,xewitɨ pɨkawara'eriwari.7Yawé matsi yuheyemekɨ katini'aitametɨni,'aixɨa mɨtiyurienikɨ yu'uwenitsie kanakani.8Kwiepa memɨtama kaniwataxanetamɨkɨ kemɨtiheitseriekɨ,teɨteri katiniwata'aitɨamɨkɨ 'aixɨa 'anemekɨ.9Yawé, memɨnanaimarie waparewiwame kanihɨkɨtɨni,wahetsie nunuwame kanihɨkɨtɨni kepauka memɨte'uka'eniwa.10'Ahetsie yuri mepɨte'erie kemɨ'ane memɨmatsimate,'ekɨ, Yawé, pemɨkawaruku'e'eiriwakɨ kemɨ'ane memɨmatsikuwautɨwe.11Yawé kwikarikɨ xekenetemawieritɨaka, Tsiyuni hetsie ti'aitame,kemɨtiuyuri nuiwarite watsata xeketenekuxatani.12Wahetsie mɨkarahɨiwa wahetsie nunuwame kaniwara'eriwani,memɨ'uximatɨarie memehɨawe yapauka kaniwa'enieka.13Yawé, kenenenenimayaka,keneneuxeiya kememɨnete'uximatɨa memɨnetsiheka.Mɨki teukiyapa kenenatihani,14Kerutsareme kitenieyaritsie'akwikarikɨ nepɨmatsikuxatani, 'awikweitsitɨarikatsie nemɨnetemawiekɨ.15Kakaɨyari memɨkamateputsu memutiwewita mekaneukaxɨrieni,wa'ɨkate kaniutseixɨaniwiniyari yɨkɨmana memuti'awietakaitsie.16Yawé kanimatiwani 'aixɨa mɨtiuka'iyarikɨ,'axamɨtiuka'iyari yuwiniyaritsie kaniyukahɨpani.17Mɨki teukiyata mekaneukaxɨrɨweni 'axamemɨte'u'iyari,meta yunaitɨ Kakaɨyari mematɨtɨmaiya.18Perutsɨ kemɨ'ane mɨreuyehɨwa pɨkahatɨmaiyarieni yuheyemekɨ,tita mɨtitakwewie tixaɨtɨ mɨkarexeiya pepɨtiyetuirieni.19Yawé, yaketineuyuri.Tewi mɨrayu'iwanikɨ pepɨka'ipitɨaka,nuiwarite 'ahɨxie memɨti'unikɨ yaketineuyuri.20Yawé, marika keniwarupitɨa,kename tixaɨtɨ mekatehɨkɨ teɨteri mɨpaɨ meketehetimani.