Lulanga lwa89shr_buk
Olwimbo n’omusengero kuli Nyamuzinda
1Obulyo bw’okuherha bwa Etani w’e Ezra.2Olukogo lwa Nyakasane, nâluyimba ensiku n’amango, oburhabêsha bwâge, niene n’akanwa kâni, nabumanyîsa abinjikulu n’abinjikulûza.3Wadesire bulya, erhi: «Olukogo lwâni luli luyimânike ensiku n’amango», nêci wayimânisire oburhabêsha bwâwe emalunga.4Waderha, erhi: Nanywânîne n’omwîshogwa wâni, nalahirîre mwambali wâni Daudi, nti:5«Nadêkereza iburha lyâwe lihabe ensiku n’amango, nti: Nâgwîka entebe yâwe ehabè omu maburhwa n’amâburhwa.»6Amalunga gadwîrhe gayimba ebisômerîne byâwe, n’oburhabêsha bwâwe budwîrhe bwayimbwa omu ndêko y’abatagatîfu.7K’omu bitù muli owakagererwakwo Nyakasane? Ndi oli aka Nyakasane omu karhî ka Bene-Nyamuzinda?8Omu ndêko y’abatagatîfu, Nyamuzinda arhajìbwa omw’irhwe,9Yâgirwa Nnâmahanga w’emirhwe, ndi oli akâwe? Oli muzibu Yâgirwa n’oburhabêsha bwâwe bukuzungulusire.10We hima obukali bw’enyanja, omulaba gukazûka we gurhûza.11We watumirhaga Rahabu wamugerakwo, wêne n’okuboko kwâwe washandâza abashombanyi bâwe.12Amalunga gabà gâwe, n’igulu kwo na kwo, wêne walemaga igulu n’ebiribâmwo.13We walemaga eby’ekulembe walema n’eby’ekulyo, entondo ya Tabora n’eya Hermoni kucîtakîra zacîtakîrira izîno lyâwe.14Okuboko kwâwe ye mugala-byoshi, enfune zâwe ye ciri-misî, n’okuboko kwâwe kulyo ye Kalengera.15Okushinganyanya n’okurhalyalyanya, co ciriba entebe yâwe edêkerîrekwo. oburhonyi n’oburhabêsha bo baganda bakushokolîre.16Luli lw’iragi olubaga luyishicîtakira, Yâgirwa nêci, obusù bwâwe bwône bubamolekera oku bashûrh’enjira.17Barhahwa barhacîtakira izîno lyâwe, n’okukuza obukulu bwâwe.18Bulyâla okulangaza kw’obuhashe bwâbo, wêne obalwîre, n’okunegena kw’ihembe lîrhu, erhi rhurhonyire emund’oli.19Bulyâla empenzi ya Nyakasane yo rhwalamamwo, n’Omutagatîfu w’Israheli arhuhîre omwâmi wîrhu.20Mîra-mîra wêne wabonekera abarhonyi bâwe wanababwîra erhi: «Ntwâli nayambisize ishungwè», erhi: «Omwîshogwa wâni omu lubaga namushomôrhwire»,21Erhi: «Nabwîne mwambali wâni Daudi, nanamushîzire amavurha gâni matagatîfu,22
nti okuboko kwâni kuyôrhe kumuyimangîre kunamuhè omurhima.»23Erhi ntà mushombanyi wamurhebe, na ntà mubisha wamurhabirekwo.24Abashombanyi bâge nabatuntuma anabona n’abanzi bâge boshi kushemba nabashemba.25Oburhabêsha n’oburhonyi bwâni bwamuyimangira, n’okw’izîno lyâni ihembe lyâge linegene.26Okuboko kwâge nakulambûlira oku nyanja, n’okulyo kwâge kwayìkira enyîshi.27Hano akola anyâkûza, erhi: «We Larha, we Nyamuzinda wâni, we kabuye kanciza.»28Nâni namujira nfula yâni, abâmi b’igulu boshi abalenga bulî,29Nâmujira abè murhonyi wâni ensiku n’amango, n’eciragâne câni câyôrha cisêzire.30iburha lyâge nâliyôlolosa lihabe ensiku n’amango, n’entebe yâge eyôrhe ehabà ak’ensiku z’oku nkuba.31Ciru abagala bakarhiba irhegeko lyâni, ciru bakabula bwashimba ebinwa byâni,32Amarhegeko gâni ciru bakâgavuna, bakânabula bwagalanga,33nêci nanahuma akarhi mpane obubî bwâbo, kunyulika nâkabanyulika,34ci oburhonyi bwâni ntâmunyagebwo, n’endagâno yâni ntayitwemwo.35Eciragâne câni ntacivunè, n’akanwa nadesire ntâkatwemwo.36Obwimâna bwâni bwo ndahîre, ntârhebè Daudi,37iburha lyâge lyâyôrha lihabà ensiku n’amango, n’entebe yâge yayôrha eri omu masù gâni ak’izûba,38ak’omwêzi gwo guyôrha guhabà, gwo guyôrha gubà «Muhamîrizi mutabesha w’emalunga.»39Lêro kwayishirigibà kujandâga ojandâga! olya washîgaga wêne wamulubîrage!40wagayire eciragâne ca mwambali wâwe, n’ishungwè lyâge walihemula n’ebidaka41
Ecôgo coshi wacihira okw’idaho, obûbake bwâge bwoshi wabulambika okw’idaho.42Abâgara bahagwîre barhama, àshubirage masheka g’abalungu!43Okuboko kw’abashombanyi bâge kwo walengezizagye, ababisha wabayunjuza mwishingo!44Engôrho yâge wayitumbirage, orhanacimuyimangire omu ntambala.45Obumoleke bwâge wabuzimizagye n’entebe yâge wayikweba okw’idaho!46Ensiku z’obusole bwâge wazinyihizagye, wamubonesa eza mêmè.47Yâgirwa mâshi, kuhika mangaci? Kumanya onakolaga wayôrha ocîfulisire? K’oburhè bwâwe bunakolaga bwayâka nka muliro?48Kengêra oku ensiku z’obuzîne bwâni ziri nyofi, kengêra oku abantu boshi wabalemire ba nsiku nyofi.49Ndi yeki olimwo omûka orhakafà, ndi yeki wacirhenze omu nfune za Nnakuzimu?50Yâgirwa mâshi, bulya burhonyi bwâwe bwa mîra ngahi bwajirage? Bulya burhonyi walaganyagya Daudi omu burhabesha bwâwe?51Kengêra Yâgirwa ebijâci badwîrhe bajacira bambali bâwe; obushombanyi bw’amashanja bwanjizire mungo!52Abashombanyi bâwe Yâgirwa, bijâci balimwo, banônogwire olya washîgaga wêne bàrhama!53Ayâgirwe Nyakasane Nnâmahanga, emyâka n’emyâka. Amen! Amen!