Read Sam 89

Sam89ntu_wbt

Angidati-mopwz Nzesz'tikr Drtwr Kx Yrlqbzme Mz Devet

Nabz ne Etan.

Nzaodu-zvzkr Gct

¹Yawe, sa nangr-zvz-ngrne nzaodu-krm,Kc tqyc tqyc.X sa nayapwxtipx-alox nzangidati-krm natqm,Kc tqyctx alo, da kc tqwai bongavz.³X sa nayrlq-zvzq natqm kc tqpibzme mz kxnzawz nem, Devet,Kc tqmcpxq, mz Nzesz'tikr Drtwrmu ncdr.⁴Rpibzme bade kx, “Ncblo kcng tzvzpxmqng mz neidu lrm, sa nanginipwzlr king,Murde nqvi lrm na-aclve alo.”

Nabz Ngr Nzrglqpxngr

⁵Yawe, lr Heven nzglqpxlr nzangidati-krm,Mz nzangrlvz-krdr da kxnzkctipx kcng tqaleq.Enjrl amrlx nzamrlue-zlwzlr nim,Murde trpnzngr lr Heven kx apule nim, kc tqmyaszlzle nidr amrlx.⁸Yawe Gct kc tqrninr, nim txpwz kx xplr-esz'ngr,Mz nzangidati-krm me pnz drtwrm.⁹Kxmule-esz' srkau xplr, a' sc tqlolvzq,X mz nzprtz-krm nrc kxoda, lclvzbzme murde nrwx navo.¹⁰X aovxio-zvzq enqmi rmqng mz nzxplr-esz'ngr-krm,Da kc tqwai nztabrti-krm Mepwz ngr prla kc bqnc.¹¹Kxrpalz, bongavz x drtc' nyzmqng,Murde nim kx rwzngr nrlc x dalrdeng amrlx.¹²X doa x da amrlx mz nrlc tulvzoNzaxvctr-lxblrng mz nzangrlvz-krdr drtqm,¹³Mz nzrpi-krdr kx, “Nim kc tqmatq-esz'ngr,X nzxplr-krm etu-esz'ngr.¹⁴Nou nzaclve-krm nrlc nidr seleng:Nztubqngr, nzrsakrlrngr, nzaodu-zvzngr, x nzangidatingr.”¹⁵Yawe, ngi da kxmrlz nzmalq-abrtzlvz-krgr nim,Murde xngibzkr nzulrm.¹⁶X ngi da kxmrlz nzbilvz-krgr drtqm,X nzglqlz-krgr nztubq-esz'ngr-krm mz zbq kang kqlu.¹⁷Murde axplrq nigr,X aovxiokr enqmi rgrng mz nzokatr-krm.¹⁸Yawe, nim Gct kc tqtr-esz'ngr x angio-txpwzkr nim.Murde mcpxbzme king rgr lc tqaclve-zpwxle nigr.

Nzesz'tikr Drtwr Gct Ncdr Devet

¹⁹Mzli kc bqnc, mz nzyrlq-krm Devet nzngini-krde king, vzme mz profet nemqng,X rpibzme mz nzrmwiblengr kx,“Aprcbo zmatq mz kzdq ngrlrvea kx xplr,Mz nzarmyalz-krnge nide mz leplz txneng, murde nanginide king.²⁰Ncblo kxnzawz nenge lc tqmcpxx, Devet,X aelux nide mz tolo kxtr.²¹Sa namailzx nide mz mqnge.X sa na-axplrx nide mz zmatq rnge.²²Kxdrka'-ngrng kcng tzngi enqmi rdeng, trtxpnzngr nzyatr-krbzlr badeMz nzamyati-krbzlr drtqde.²³Murde sa natamyr-ngrbo nidrMz nznibqti-krbo kxnzpxtxpx-ngrdr nide.²⁴Sa na-aodu-zvzx nide x nanginide kztenge.X sa nabatrpo bade nzaovxio-krde mz drtqnge.²⁵Sa nakabo bade zmatq ngr nzaclve-krde Prla Meditrenia,Navz nakrlzbzle Lue Yufretis.²⁶Sa namcle kx ninge trtede,Kc tqngi Gct rde x butqbr nyzde kc tqrlakitrle.²⁷X sa na-apusr-ngrne nide mrlxnge krdau,Mz nzarmyalz-zlwz-krbo nide mz king amrlx mz nrlc.²⁸Drtwr kxesz'ti kc tqyrlqbo bade, trtxpnzngr nzyzpr-krde,Mz nzangidati-krnge nzaodu-zvz-krnge nide.²⁹X nzyrlq-krbo nzaclvekr nqvi lrde tqyc tqyc,Da kc tqwai nzyc-alokr bongavz.”³⁰X rpi-mopwz Gct kx, “A' nzmu doa nedeng naesablqtilr loukxtr scnge,Mz trnzlolvz-amqngi-krdru nzalvztr-krnge³¹X nzmu trnavz-nqblqlru me pnz drtwrngeMz nzpxtxpx-krdr natqnge,³²Sa na-ayrplapxxng mz alwx ngrdr,Mz nzaetq-krbo drtqdr mz nikeng nzvz-rbrtilr.³³A' trpnzngr nzatao-krnge da kc tqesalz-ngrbo mz Devet,A' sa na-aodu-zvzx nide.³⁴X trpnzngr nztekqtr-krnge natqnge,A' sa na-atutr-zvzx nzesz'tikr drtwr kc tqyrlqbo bade.³⁵Esalzpex mz drtqnge kxtrX amqngipex kx trtxpnzngr nzesabrti-krnge nide.³⁶X nzaclvekr nqvi lrde tqyc tqyc,Da kc tqwai nzti-alokr nepi x nzprtz-krm temz x nztao-krde.”

King Kc Tqvzpxm Mz Nqvi Lr Devet, Drtwrde Lctrpz Mz Gct

³⁸Yawe, rpiq da lc, a' mzli ka drtqm satrpem bange x rlaszpeq ninge,Mz nzngyati-moukr drtwrm ninge, king kc tqmcpxq.³⁹Nikipeq Nzesz'tikr Drtwr kx yrlqbzme mz melrmqgr Devet, kx natu-zvzbzme mz nibr nqvi lrde,Mz nzapusr-krbzme kraon ngr narnge brmrda.⁴⁰Awxlikitxopebzme drkq ngr mzteadau nyznge.X odati-atwrnr-ngrbzme lrpalvc nyzgrng amrlx.⁴¹Enqmi rgrng amrlx nzatrkati-zlwzlr nigr.X lr mrkzbleng kcng tzmnc-aepztrpqng bagr nzyrpalelvzlr ninge, king nem.⁴²Murde ngi-batrpzme nzxplrkr ncblo ngr vea nedrng.X mzli ka sc tzbilvzpelr.⁴³Amyatibzme nipna scngeng mz nzrpna-krnge,X rlr-ngrbzme nzaovxio-krdr nigr.⁴⁴Odatipeq tron nyznge,Mz nzkatxpx-krbzme zmatq ngr nzngini-krnge king.⁴⁵Amyatibzme drtqnge mz mz leplz.X ngi-batrpe' nzngini-ani-krnge lrtzlvz.

Nzkrka'ngr

⁴⁶Yawe, bzkq mnc-rlrume bagr.X bzkq apqtipeq nigr mz nzngya-zlwzkr drtwrm.⁴⁷A' na-aoti drtwrm nzmrbcnekr nzlu-krgr nigr leplzMz nzmnc-krgr mz nrlc.⁴⁸Trpnzngr leplz kx na-arlapx-lzbq,Murde nigr amrlx mnclzbzkr mz zmatq ngr nzbzngr.⁴⁹Kxetu, opxm kx trangidatipewq natqm kc tqpibzme mz Devet,Murde trxngipepwzkru nzaodu-zvz-krm kc bqnc.⁵⁰Bzkq mrbrtr mz drtwrm nzobqszokr leplz ninge, kxnzawz nem,Murde kxnzmnc-mrbr lcng sc tzbilvztipelr ninge.⁵¹Yawe, enqmi rmqng nznelvztilr ninge, king kc tqmcpxq,Mz nzxtrnga-krdr ninge.

Nabz Kx Yrkrpxngr Buk Kratq

⁵²Na-armyalzku Yawe, kc tqngi Kxetu rgu.Tqvzpe, tqvzpe. Eu. Na-armyalzku Yawe.

Sam 89 / ntu_wbt