PESALEM
89
/
jae_png
share
Share
Sênac mateŋ biŋ, taŋ Anôtô gêjac mata naŋ
1
O Apômtau, aê gabe jaŋga wê êpi nêm têmtac gêwiŋ teŋgeŋŋa endeŋ tôŋgeŋ.
Gabe jasôm nêm biŋ ŋaŋêŋ lasê êndêŋ gôlôac e naêsu kwanaŋgeŋ.
2
Aôm tec gôjac mata gebe têmtac gêwiŋ teŋgeŋŋa tau oc ênêc endeŋ tôŋgeŋ.
Aôm kôwaka nêm biŋ ŋaŋêŋ sa ŋapep kêtôm, taŋ kômasaŋ undambê naŋ.
3
Aôm kôsôm gebe “Aê kamoatiŋ poac gêdêŋ ŋac, taŋ kajaliŋ eŋ sa naŋ,
ma gajac mata gêdêŋ ŋoc sakiŋwaga Dawid gebe
4
‘Aê jakêŋ nêm gôliŋ kiŋŋa elom nêm wakuc ŋapaŋ
ma jawaka nêm lêpôŋ sa êtôm gôlôac to gôlôac samob.’”
5
O Apômtau, undambê sêlanem aômnêm gêŋtalô
ma lau dabuŋ, taŋ sêkac tauŋ sa naŋ, aweŋ gêôc aôm gebe aôm ŋac ŋaŋêŋ.
6
Gebe asa oc êtôm Apômtau aŋga tao lôlôcŋa
ma anôtôinêŋ latuŋi asa oc êtôm Apômtau.
7
Anôtô ŋaclai gêŋgôŋ lau dabuŋ sêkac tauŋ sa ŋalêlôm
ma samob, taŋ sêmoa eŋ laŋôanôŋa naŋ, têtêc eŋ ŋanô.
8
O Apômtau, lausiŋ undambêŋa nêŋ Anôtô, asa oc êtôm aôm.
O Apômtau, aôm ŋaclai sec ma nêm biŋ ŋaŋêŋ kêkwa aôm auc.
9
Aôm gôjam gôliŋ gwêc, taŋ kêgasim naŋ.
Ŋadembom embe êkuc-êkuc, aôm oc ôŋgôm ŋatip êsa.
10
Aôm gôjac gêŋsêga Rahab popoc jamuŋ-jamuŋgeŋ.
Lêmam ŋajaŋa geseŋ nêm ŋacjo êliŋ-êliŋ
11
Aôm kôtu undambê to nom ŋatau.
Aôm kôkêŋ nom samuc to gêŋ samob, taŋ gêjam nom tau auc naŋ.
12
Aôm kôkêŋ gamêŋ musaŋgu-m to mula-mŋa.
Lôc Tabor to Hermon ôliŋ kêpi kêtu aômnêm ŋaêŋa.
13
Lêmam dambê ŋactêkwa sec.
Lêmam ŋajaŋa to kôsuŋ nêm anôŋa sa.
14
Biŋgêdêŋ to biŋ ŋaŋêŋ kêtu nêm lêpôŋ ŋanombaŋ.
Têmtac gêwiŋ teŋgeŋŋa to biŋ ŋaŋêŋ gêc aôm laŋômnêmŋa.
15
O Apômtau, aê aoc gêôc lau, taŋ laŋômanô ŋawê kêpô êsêac
ma ôliŋ kêpi kêtu aômŋa naŋ.
16
Êsêac tapi-tapigeŋ kêtu nêm ŋa ŋapaŋ.
Ma sêjam lasê kêtu aômnêm biŋgêdêŋŋa.
17
Gebe aôm kôtu êsêac waeŋ to ŋaclai ŋamôkê.
Aômnêm moasiŋ kêwaka aêacma ŋaê sa e ŋapep.
18
Gebe Apômtau kêtu aêacnêŋ lautuc ŋatau
ma Israelnêŋ ŋac dabuŋ kêtu aêacnêŋ kiŋ nê ŋatau.
Anôtônê biŋ, taŋ gêjac mata gêdêŋ Dawid naŋ
19
Gêdêŋ gêmuŋgeŋ aôm gôwa nêm biŋ sa gêdêŋ nêm sakiŋwaga ŋaŋêŋ ŋa ŋakatu gebe
“Aê kakêŋ sunsuŋ kiŋŋa gêdêŋ ŋactêkwa teŋ kêkuc ênam lau sa. Aa kakêŋ lêpôŋ kiŋŋa gêdêŋ ŋac, taŋ kajaliŋ sa aŋga lau nêŋ naŋ.
20
Aê katap ŋoc sakiŋwaga Dawid sa,
gaeŋ oso eŋ ŋa ŋoc niptêkwi dabuŋ
21
gebe lemoc êpuc eŋ tôŋ endeŋ tôŋgeŋ
ma lemoc êkêŋ ŋaclai êndêŋ eŋ.
22
Nê ŋacjo ênsau êôc eŋ êtôm atom
ma secwaga teŋ êku eŋ tulu atom.
23
Aê gabe janseŋ ênê ŋacjo popoc sênêc eŋ laŋônêmŋa
ma janac êsêac, taŋ sêkêŋ kisa eŋ naŋ êndu.
24
Aêŋoc biŋ ŋaŋêŋ to têtac gêwiŋ teŋgeŋŋa êpuc eŋ tôŋ.
Aêŋoc ŋaê oc êsuŋ ênê wae sa.
25
Aê jakêŋ ênê gôliŋ ŋamadiŋ
aŋga gwêc ŋaluŋ e êndêŋ bu kapôêŋ Euprat.
26
Eŋ oc awa ênac aê gebe ‘Aêŋoc tamoc aôm,
aôm kôtu ŋoc Anôtô to ŋoc moasiŋ ŋamôkê.’
27
Aê gabe jakêŋ eŋ êtu latuc ŋamêc.
Eŋ kêtu kiŋ nomŋa nêŋ ŋatau.
28
Aê oc jamoasiŋ eŋ endeŋ tôŋgeŋ
ma matoc êsap ŋoc poac tôŋ ŋajaŋa êtu eŋŋa.
29
Aê gabe jawaka ênê gôlôac nêŋ teŋ sa endeŋ tôŋgeŋ gebe êtu kiŋ
ma ênê lêpôŋ êkô ŋapaŋ êtôm undambê.
30
“Ênê latui embe sêwi ŋoc biŋ siŋ
ma nêŋ lêŋ eso aêŋoc biŋ, taŋ kajatu naŋ,
31
ma embe sêŋgôm aêŋoc biŋ êtu meloc
ma sêkêŋ taŋeŋ ŋoc biŋsu atom,
32
oc jai êsêac ŋa palip êtu sêkac tauŋ suŋa
ma oc janac êsêac êtu nêŋ kwalecŋa.
33
Mago gabe jaŋgamiŋ ŋoc moasiŋ êndêŋ Dawid atom
ma jansa ŋoc biŋ ŋaŋêŋ auc êndêŋ eŋ atomanô.
34
Aê gabe jaŋgôm ŋoc poac êtu biŋ lêlêŋa atom
ma janam biŋ, taŋ aocsuŋ kasôm lasê naŋ, ôkwi atom.
35
“Aê ŋac dabuŋ, tec katôc lemoc sa kêpi tauc katu dim tageŋ
gebe jansau Dawid teŋ atomanô.
36
Ênê gôlôac oc sêmoa endeŋ tôŋgeŋ.
Ênê lêpôŋ êtôm oc, taŋ kêkô aê laŋôcnêm naŋ.
37
Eŋ oc êmoa endeŋ tôŋgeŋ êtôm ajôŋ,
taŋ kêtôm gêwa-biŋ-tau-sawaga ŋaŋêŋ aŋga tao lôlôcŋa naŋ.”
Taŋi kêtu sêku kiŋ tuluŋa
38
Mago galoc aôm kôtiŋ to kômasuc ma têmtac ŋandaŋ
gêdêŋ nêm ŋac, taŋ goeŋ oso eŋ naŋ.
39
Aôm kôsap poac, taŋ kômoatiŋ gêdêŋ nêm sakiŋwaga naŋ tulu
ma gôgôm ênê sunsuŋ kêtu meloc ma kôpalip kêsêp lêsap gêja.
40
Aôm goseŋ ênê tuŋbôm samob êliŋ-êliŋ
ma kôsiŋ baliŋ ênê malac totuŋbôm e popoc jamuŋ-jamuŋgeŋ.
41
Lau samob, taŋ sêsa tonaŋ sêja-sêmêŋ naŋ, sêjaŋgo gêŋ aŋga ênê
nê lau mêŋbaŋ eŋ sêsu eŋ susu.
42
Aôm kôkêŋ lau, taŋ sêlêsu eŋ naŋ, sêku eŋ tulu.
Aôm kôkêŋ ênê ŋacjo samob e sêpi-sêpigeŋ kêtu eŋŋa.
43
Aôm kôkêŋ eŋ gêc tonê siŋ ŋamatageŋ gêja
ma gêdêŋ siŋ kêsa naŋ, kôpuc eŋ tôŋ atom.
44
Aôm gôgôm e ênê ŋawasi gêjaŋa samob
ma kôtiŋ ênê lêpôŋ piŋpaŋ jagêc nom.
45
Aôm kôgasuŋ ênê bêc ŋapalê matacŋa kêtu dambê
ma kôkêŋ maja to ŋawapac kêsalê eŋ auc.
Mec teŋ kêtu Anôtô êjaŋgo eŋ suŋa
46
O Apômtau, gobe ônam taôm auc samucgeŋ e êndêŋ ondocgeŋ acgom.
Aômnêm têmtac ŋandaŋ ŋajawaô êndaŋgac e êndêŋ ondocgeŋ acgom.
47
O Apômtau, taêm ênam aêac aŋgôŋ mateŋ jali ŋam
ma taêm ênam gebe kôkêŋ ŋamalac samob gebe oc sê su sebeŋ.
48
Ŋamalac teŋ gêmoa ondoc gebe ênam kauc gêmac ma êmoa endeŋ tôŋgeŋ.
Asa oc êjaŋgo tau nê katu su aŋga lamboam.
49
O Apômtau, aômnêm têmtac gêwiŋ, taŋ gôjac mata gêdêŋ andaŋgeŋ tauanô naŋ,
to biŋ, taŋ aôm ŋac biŋ ŋaŋêŋŋa gôjac mata kêpi Dawid naŋ, gêc ondoc.
50
O Apômtau, taêm ênam nêm sakiŋwaga nê gêŋwapac
gebe kajala gêc ŋoc ŋalêlôm amboac tonec gebe tenteŋlatu samob sêlic aê amboac gêŋ lêlêŋa teŋ.
51
O Apômtau, nêm ŋacjo têtaŋ pêlê
to sêsu nêm ŋac, taŋ goeŋ oso eŋ naŋ, susu kêtôm nê lêŋ samobgeŋ.
52
Lambin êndêŋ Anôtô enden tôŋgen
Biŋŋanô. Biŋŋanôgoc.
info
Powered by Seed Bible API
expand_more
Search
All books
Old Testament
New Testament
chevron_left
Previous Chapter
Books
search
Search
explore
Discover
chevron_right
Next Chapter