Nɨawari84hch_wb2
Teyuitɨwamete wa'ukiyari. Yuariyaya xekeneuweiyani «Kaxie mɨpɨnarie» hepaɨ ketiukwikarieni. Kure niwemama wanɨawari.
1Yawé Naimekɨmɨtɨrɨkaɨye,'akiekarite witsipɨ'anene.2Nepeiyehɨwa ne'iyarikɨ Yawé takwana,'ariri mana neheuyeimɨtɨ nekanimɨximeni.Nekanikwikani Kakaɨyari tukari mɨtiyupitɨwane'iyarikɨ meta naime newaiyarikɨ.3Yawé Naimekɨmɨtɨrɨkaɨye, neti'aitɨwame meta nekakaɨyari pemɨhɨkɨ,wikitɨtɨ 'amawari taiyame 'aurie yukii putaxexeiya,metatsiere wiki 'itsitame muwa yu'itua putawewiwa,muwa mɨti'itsinienikɨ.4'Aixɨa ke'itɨarieka kemɨ'ane 'akiita mɨkiekame,yuheyemekɨtsɨ kameninɨawani.5'Aixɨa ke'itɨarieka kemɨ'ane 'ahetsɨa tɨrɨkariya mukaxexeiya,'ahuyeta xeikɨa mumienikɨ muyukɨhɨawe.6Kepauka 'ukaitsata muyeyanihaixatsata kanayeitɨwani,meta wiyeri ximeri miemekatiniutiwaweriyani mayeweritsie.7Metsɨ 'ateewa kɨkamete mekaniuhuni, matsi waɨkawa tɨrɨkariya mekanipitɨarieka,Tsiyuni mekaniye'axeni Kakaɨyari hɨxie, kakaɨyarixi muwakakaɨyari hetsɨa.8Yawé, Kakaɨyari Naimekɨmɨtɨrɨkaɨye, nenenewieri keneu'eni,keneneu'eni, Kakuwu Kakaɨyarieya.9Kakaɨyari 'aku, tepɨa tahetsie nunuwame,pemanayexei keneuxeiya 'aixɨa 'anemekɨ.10'Aixɨa pɨ'ane 'atakwa nemukanikɨ xeitukari,pɨkaheuyewetse xeimiriyari takwa nemeyeikani,pɨnetsinake Kakaɨyari kiiya kitenie nemɨ'ɨwiyani,'aixɨa pɨka'ane Kakaɨyari memɨka'ayexeiya wahetsɨa nemukani.11Yawé tau hepaɨ kani'aneni meta tepɨa tahetsie nunuwame,Kakaɨyari tahetsiemieme witsipɨtikuxata.Yawé kaniwareu'enieka heitseriemekɨ memu'uwawahetsie karahɨpatɨ.12Yawé Naimekɨmɨtɨrɨkaɨye,'aixɨa meke'itɨarieka 'ahetsie memɨtewiya.