Nɨawari81hch_wb2
Teyuitɨwamete wa'ukiyari. Yuariyaya xekeneuweiyani «Kaxie mɨpɨnarie» hepaɨ mɨpaɨ ketiukwikarieni. 'Atsahapi nɨawarieya.
1Xeyutemamawietɨ Kakaɨyari xekenekwikani, mɨtatsitɨrɨkariya,Kakuwu Kakaɨyarieya xekenehiwieka xeyutemamawietɨ.2Nɨawari hetsiena mieme xekeneyuitɨaka.'Ari tepu 'etsimɨpe xekeneutahutsunani,xaweri meta kanari witsimutaine.3Muxa 'uki 'awaya xekeneutahɨtsi metseri manatiwenitsie,meta metsa mɨxikɨraɨyenitsie, ta'ixɨarari tukariyaritsie.4'Ikɨ 'aitsika kanihɨkɨtɨni 'ixaheritsixi wahetsiemieme,Kakuwu Kakaɨyarieya 'aitsikaya kanihɨkɨtɨni.5Tɨratu Kutse hamatɨa kaniuwewieni,kepauka memayekɨ 'Ekipitu kwieyaritsie.Niuki nemɨka'i'enie nekaniu'enieni:6«'Ika nekamaniunawairieni pemetɨkɨkai,kiriwa mahete 'ari pekaniunawaiyarieni.7Pe'uximatɨarietɨ pemɨnetsi'utahɨawixɨ, nekameniɨxɨna,nene'awietatɨ hai mɨmariwetsie nekameniuta'eiya,Meriwa hayaritsie nekameniuta'inɨata.8»Neteɨterima kenemɨtixe'ayehɨtɨwa xekeneneu'eni,xɨa'ui 'ixaheritsixi, xɨka xeikɨa xenetsi'u'enienike.9Teewatanaka kakaɨyaritɨme xeime pepɨkahayexeiyani,xeime kakaɨyaritɨme yɨkɨ 'aneme hɨxie pepɨkahekatunumaweni.10Ne nepɨhɨkɨ Yawé 'akakaɨyari,'Ekipitu nemɨmetsi'ayewitɨ.Kenakwaxaka, ne 'ateta nekatinitahɨniyamɨkɨ.11»Neuxei peru neteɨterima mepɨkanetsi'u'eni,'ixaheritsixi yamepɨkatekakɨ kenemainekai.12'Ayumieme nepɨwaruku'eiri wa'iyari mɨtsetse'ikaikɨ,kemɨtiwanake memɨyɨakaikɨ.13»Xɨka neteɨterima xeikɨa menetsi'u'enienike,xɨka 'ixaheritsixi nehuyeta me'uhunike,14yapauka ne memɨwaraye'unie nekaniwara'iwake,meta nekaninuanike memɨwaraye'unie wahetsɨa netɨrɨkariyakɨ.15Kemɨ'ane Yawé memɨxani'erie hɨxiena mepuyuyetuawawekai,meta yuheyemekɨ mekatenikwinitɨarienikekaitɨni.16'Ekɨta tɨriku 'aixɨa mɨ'anekɨ pekatinimikienikekaitɨni,meta xiete 'aitsie miemekɨ».