Nɨawari77hch_wb2
Teyuitɨwamete wa'ukiyari. Kerutuni hetsiemieme. 'Atsahapi nɨawarieya.
1Kakaɨyari nepahɨawe ne'iwawirietɨ yemekɨ,Kakaɨyari nepahɨawe mɨnetsi'eniekɨ.2Kepauka nemu'uximatɨarie, ti'aitame neputiwawa,tɨkarikɨ neka'uxetɨ teikɨ nepememe,peru 'akuxi nepɨkanɨtɨariewe ne'iyaritsie.3Kakaɨyari nepa'eriwa, matsi neputatsuaka,hetsiena nepɨnekɨhɨawe, yemekɨ nepeɨmɨmɨkɨ.4Pepɨkanetsipitɨa nemɨkutsuni,kwinimieme nepɨti'uximatɨarie nepɨkaniuwe.5Nepɨraye'eriwa meripaitɨ timieme,meripaitɨ wiyaritsie kemɨtiuyɨ.6Nepa'eriwa kepauka ne'iyari muyutemawiekai.Hikɨ matsita 'ipaɨ nepɨtiyɨkɨhɨawe:7«¿Tarexɨrienitsɨkamɨ ti'aitame yuheyemekɨ?¿Tawaritsɨkamɨ ke'aixɨa mɨtiuka'iyari mɨpaɨ katiyɨni?8¿Kamɨtsɨ naitɨ tiuyɨ naki'eriyaya mɨkaxɨwekai,meta naimekɨ kemɨtarahɨawekai yuheyemekɨ?9¿Ratɨmai Kakaɨyari ke'aixɨa mɨtiuka'iyarikai,yuhaxɨakɨri katareunenimaya?»10Mɨpaɨ nepɨti'eriwa: «'Ikɨ yemekɨ pɨnetsihekukukuine:'Amutewi yɨtɨrɨkariyakɨ pɨkatatsiparewie».11Nepiku'eriwa pɨta Yawé kemɨtiuyuri,nepe'eriwa mariweme kemɨtiuyuri meripaitɨ.12Nepɨnekɨhɨaweni mariweme kemɨtiuyuri,nepikuxatani yutɨrɨkariyakɨ kemɨtiuyuri.13Kakaɨyari 'aku, naitɨ 'ahuye pɨpatsie kepemɨtiyurienekɨ,kakaɨyaritɨtɨta xewitɨ pumawe hepaɨna timariwetɨ.14'Ekɨ Kakaɨyari pepɨhɨkɨ mariweme pemɨtiyuriwe,'atɨrɨkariya pemɨhekɨata teɨteri wahetsie.15'Atɨrɨkariyakɨ 'ateɨterima pepuwarɨxɨnaxɨ,Kakuwu nuiwarimama meta Kutse.16Kakaɨyari 'aku, haa pɨmetsi'utimaka,haa mepɨmetsi'uxei hikɨ hamewari mepuwewi,mɨkɨ meta haramara 'ameukatewa putima.17Haiwitɨri wiyeri pukaxɨri,muyuawi tɨranarikɨ putayua,muyuawi merɨkariyakɨ putatsanixɨ.18Petayua 'ayuariya haikɨri 'amɨpatsie,'amerɨkariya kwie puhekɨariyaxɨ,kwie putayua yuariyakɨ.19Haramaratsie 'ahuye pepanuwewi,haa waɨkawa 'apametsie pepɨtɨa,peru 'aketate pɨka'uhekɨarixɨ.20Muitsexi 'Aruni wahekɨ,'ateɨterima pepɨwarewitɨ muxatsi wahepaɨ.