Evetako Embako Da Banungariri.
1Arie Bajari, na nimokena ojeni. Namo kaifa aso dae resena.Erama doyeoso, gitofuimi na de atai duboda fatiore!2Ni ari dambugo beká eraesa, ágido na sonembaso dae resena,a kotugo na darakena saghimbe bu! Nanda benunu ningido, na sonembaso jebugaone!3Saso na nimokena junge fetarena! Nine se, nimokena tere fetono, na gagara ase!Nanda ambo sosari vasa a kotugo bere mo, nimori.4Arie nanda God, namoa ari ekoko ari kakato aikena saghimbe bu darige!Evetu enembo sembae use, namokena mema mutari koteraera aikena,na saghimbe baso dae resena!5Arie Bajari, fakina isambu da tofo, nanda gigitari isasambu nimokenari.Na sasingako irise tuturo edo nanda tumondari nimokena fifituseni.6Nanda gaiga nimokena garuse irá gheraena.Na sirorusena, ai tano, nine kaifa e tavo eso irena.Na evovodae nindae sakai sise, irá gheraena.7Nanda sorega fumbari kato fakingo nimori.Ninda sonemba namokena gosuse, ni mavega ava natofo tomanako kasama useri.8Na sifo evia inono ava nindae sakai sise, ninda duro usasaghae aindae osa seraena.9Jo, na embako usena aindae, na imboe ae aresa!Erá, namokena fakina dadabariá sise, na doyeose!10Nanda gitofo na daoro ambono dae uju eraera.Aminguse, ne se ningido irise, namo daoro ambono dae, manaka gaeyeraera.11Ne eminge seraera, “God nundae guka futusira.Erevu, namonde sumbu nu sandi baore! Nunda sorega fumbari kato eni tefori.” seraera.12Arie God, erá soka iriose! Arie nanda God, oroko nembo foa na sonembase!13Evetu genembo mave namoa dedo gaedo ghari dae arera,ava dedo atai duboda fafatigedo sosighi aso dae uju erena.Evetu genembo mave namokena mema mutari dae kato erera amo, aso meka gosuroro,nenda binó sembae are dae uju erena.14Na sifo evia inono ava nanda gigitari nimokena fitido gharena.Na giti nindae sakai sedo ghusena, oroko mo, tuturo edo, teria beká sido yarena.15Ninda ari eveva gaveva mo, jo tegari da kaugo ututeraesa aindae, vironu sedo gharena.Sifo evia inono ava nine sonembeoso namane jebuga tamburaera ava,sedo gharena.16Bajari God, ninda fakina muturaesa ava budo, aimi fuama,na ninda kavevera tomanakogo aindae sakai sarena.17Na sasingu ireno ai tano, na nine ijugedo usesi.A ninda tano gae gitida gi dudukugharigo ututeraesa aindae, osa sise irá gheraena.18Arie God, oroko na embako eteno, beo furigha mongago etira evia, erá na doyeose!Nangae irise, na ninda ari babaigo ututeraesa,a kotugo ninda fakina tomanakogo ava sirurono,nanda sasingu imemesiri gamemisiri ningido ghaore!19Arie God, ari eveva gaveva utututeraesa amo, jo tegari da kaugo iraeri.Ninda fakinaimi ututusesa aminga ava, evetu genembo eniimi jo ari da kaugo iraeri.20Nine namokena dara a mema itatama aono dae futusesi.Avata nanda fakina sekago nine mutudo, na kaifa ururaso jo ambae irarena.21Nine sekago sonembaso na genembo binode ava arena.Ni nandae kavenu sekago saresa.22Arie nanda God, geka bekári, na nindae gita doruse sakai sarena.Arie, Israel embo da God kakarago, ni rea seraesa,isambu urureaso beká siroreraira aindae, nanda gita doruse yaru nimokena divarena.23Na nine sonembeteso jebugusena aindae, na nindae dubo jeuro use,gita doruse ivugai yaru sise fumbu arugarena.Dubo joka isambuimi nindae yaru sarena.24Evetu genembo namokena mema mutari dae kato usera ava,nine dedo atai duboda fafatigeteso, nenda bino sembae usira ágido,na sifo evia inono ninda ari dambugo ututeraesa aindae, vironu sedo gharena.