Yɛsɑ̃ɑ̃7tbz_sim

Dɑfiti dɔ́mɛ̀ Kuyie nhò kòńnɛ́

1Fɛyɛ̀nfɛ̀ Dɑfiti dèntɛ̀ fɛ̀ Kuyie. Kuusi, Bɛnsɑmɛɛ wuɔ nkou kpɛ́í.
2N Yiɛ̀ nKuyie n sɔri fɔ̃́ɔ̃̀ borɛ̀,n dɛɛtɛ́nɛ̀ bɛ̀ɛ̀ n fɛ̃́ũnko,m pɑtɛ.3Bɛ̀ yɑ̀ɑ̀ bo n nɛ́tɛ́ dicìrícìrì kɔ̃mɛ,dicìrícìrì ɔ̃ɔ̃ pĩ́mmɛ̀ kɛ́nɛ́tɛ́ bɑ́ òmɔù bɑ́ɑ́ fietɛ.
4N Yiɛ̀ nKuyie, kɛ̀ m mɛ̀nkɛ dɔ̀ɔ̀ bɛ̀ n wɑ́tìrì tìkɛ̀ m mɛ̀nkɛ cɑ̀ɑ̀rɛ̀,5Kɛ̀ n fɔ̀ɔ́ mmɛyɛi n wèè n dɔ̀ɔ̀ mɛyɛi,kɛ̀ nh ɛí n dùɔ̀ntɔbɛ̀ kpɛrɛ dɛtetìrɛ̀,6n dùɔ̀ntɔbɛ̀ɛ nni mbɛtì kɛ́ n nintɛ,kɛ́ n yɛ̃ɛ̃rɛ, kɛ́ n kuɔ,kɛ́kũnnɛ́ n yètìrì mutɑ̃́ɑ̃́ mmiɛkɛ.
7N Yiɛ̀ nKuyie nyítɛ́ kɛ́cómmú,kɑ̀ɑ miɛkɛɛ bɛ̀ yɛ̀,bɑɑo n dùɔ̀ntɔbɛ̀ bɛ̀ɛ̀ miɛkɛ n cɔ́ú,n kónnɛ́ fɔ̃́ nwèè te tibeéntì.8Ibotí imɔuu tíí nhɑ borɛ̀,kɑ̀ɑ mbo kɛĩ́nkɛ̀ kɛ ì bɑkɛ́.9Kuyie nfɔ̃́ nwèè bekùnɛ̀ ibotí,n kónnɛ́ n nɑɑtí kpɛ́í,n yí cɑ̀ɑ̀rɛ̀ dɛ̀mɑrɛ̀.10Cónnɛ́ bɛnitiyɛibɛ cɑɑ̀rìmɛ̀,kɛ́kpénkùnnɛ bɛsɑ̀ɑ̀bɛ̀,fɔ̃́ nwèè yɛ̃́ bɛnìtìbɛ̀ yɛ̀mmɛ̀,nɛ̀ bɛ yɛntotí,ɑ tú Kuyie nku kɛ wenni.
11Kuyie nkuù tu n kó kudɔpìkù,kuù dɛɛrí bɛsɑ̀ɑ̀bɛ̀.12Kuyie nkuù bekùnɛ̀ timɔ́mmɔnti,kɛ nɛ́ yóù sɑ̃́ɑ̃̀.
13Kòo nitiyɛiwe í cèètɛ ò sɔ̃̀ṹ o siè ndi,kɛ deenko o tɑ̃mmù.14Ò mɑ̀ɑ́tí tìì kpɑ̀rìnɛntì yóó we nkuɔ,ò sɔ̃̀ṹ ìì pie nyóó we ntɑ̃.15Ò kuɔ̀ mmɛyɛi nkó tipɔutì nti,ò pùó mmɛsoùmmɛ̀ mmɛ,kɛ yóó pɛitɛ́ siyɑ́ɑ̀bìsí.16Ò keù difɔ̃̀tìrì ndi kɛ dì cũmpùnko,ò doti ò keú dìì fɔ̃̀tìrì miɛkɛ nkɛ.17Ò dɔ̀ɔ̀ mɛ̀ɛ̀ yɛi ndoti o yuu ĩ́nkɛ̀ nkɛ,ò yóù kùù yonku doti o tĩ́nnì ĩ́nkɛ̀ nkɛ.
18N yó nsɑ̃ntímu n Yiɛ̀ nKuyie,kù tumɛ̀ timɔ́mmɔnti yiɛ̀,n yó ndièmmu kɛ bie ntibómbonti,kɛ dɛ́úkùnko Kuyie nkùù bɑkɛ́ kɛĩ́nkɛ̀ nɛ̀ kɛtenkɛ̀ ku yètìrì.
expand_more
Search