Nɨawari68hch_wb2
Teyuitɨwamete wa'ukiyari. Rawiri nɨawarieya. Kwikari.
1Kakaɨyari 'akeneutakexi,memɨmetsi'aye'unie mekeheutaweiyariexɨani,meke'uyuta'una kemɨ'ane memi'uxie.2Yunaitɨ meke'ukumawere,kɨtsi 'ekatsie mɨtiupaparike hepaɨ,Kakaɨyari memɨka'ayexeiya Kakaɨyari hɨxie meke'ukumawere,xɨrɨka taipa kemɨtiutakwanike hepaɨ.3Matsi heitserie memexeiya mekeyutemamawieka pɨta,Kakaɨyari hɨxie meke'utikwikani yemekɨ.4Kakaɨyari xekenenɨawani, kemɨtiuka'iyari nɨawariyari,xekenehiwieka kemɨ'ane haiwitɨritsie 'akaitɨ mukuyeika,hɨxiena xekeneyutemamawieka.Yawé katinitewaka.5Nutuite wa'ukiyari, wiuraxi wahetsie nunuwameKakaɨyari kanihɨkɨtɨni yutuki mupatsieta 'ayekaitɨ.6Kakaɨyari kii puwaxatɨa kemɨ'ane memexɨriyameta pɨwaxɨna kemɨ'ane memehapanie,kemɨ'ane memɨtehayuye'unie makuwakitsie mepuyuhayewa.7Kakaɨyari 'aku, kepauka pemayetɨa 'ateɨterima wahɨxie,kepauka makumawetsie pemɨwarayewitɨtɨya,8kwie kaniutayuani,meta muyuawitsie waɨkawa wiyeri kanakaneni,Kakaɨyari hɨxie, Tsinahi mieme Kakaɨyari.Kakaɨyari hɨxie, 'ixaheritsixi wakakaɨyari.9Kakaɨyari 'aku, 'ekɨ waɨkawa wiyeri pepeyenɨ'a,'aixɨa pepiyuri kwie tahetsiemieme.10'Atɨɨriyama kwiepa mepɨtamarixɨ,Kakaɨyari 'aku, petiu'akanaki'erietɨ 'aixɨa pepɨtiuyuri tixaɨtɨ mɨkarexeiya hetsiemieme.11Tati'aitɨwame yuniuki kaniyetuani,yumɨiretɨ hikɨ 'ukari mepikuxata:12«Mekaniuyu'unarɨmeni te'aitamete meta wakuyaxima,kiita memɨteheku'eiri,'ukarawetsixi piinite mekateniyutapitɨwani:13kukuru 'anateya pɨrata mɨkawiriyarietɨka,'anɨteya huru mɨxawawatɨ pɨhɨkɨ.'Ekɨ pepeuku muxatsi watsata».14Kepauka Naimekɨmɨtɨrɨkaɨye te'aitamete kwiepamemɨtama mɨwarutawei,'ɨwi hepaɨ mepɨteyuxexeyakaikemɨtika'unike hepaɨ Tsarimuni hɨriyaritsie.15Watsani hɨriyari, hɨri mɨmamariwawe,Watsani hɨriyari, hɨri kwinimieme mutɨtɨ:16¿Titayari hɨri kwinimieme mɨtɨtɨ kwi mete'ixexeiya me'ɨtetsatɨ,mɨkɨ hɨri Kakaɨyari minake mana muyeikanikɨ,hakewa Yawé yuheyemekɨ meyeikani?17Kaxetate kuyaxa mieme Kakaɨyari tipiinieyaxeimiriyaritsixi mekaniyu'inɨatani,Tsinahi paitɨ yeyaka Ti'aitame wahamatɨa kaninuaniyutukita meutahanikɨ.18Yawé Kakaɨyari, kepauka 'ekɨ pemanutitɨa taheima,pepɨwarewitɨ memanutaxɨriya,waɨkawa 'imikieri pepɨrepi teɨteri memɨmeteyetuiri,metatsiere memayu'eririya tiwapiini,mana wahamatɨa pemeyutakiitɨanikɨ.19'Aixɨa ketikuxaxatsiwani Tati'aitɨwame, takakaɨyari meta tatsiwikweitsitɨwame,tukari manukayeika ta'ikakɨ pɨtatsiparewie.20Takakaɨyari, Kakaɨyari tiyuwikweitsitɨwame pɨhɨkɨ,Yawé Tati'aitɨwame pɨkatatsipitɨa temɨkwinikɨ.21Kakaɨyari kemɨ'ane memaye'unie mɨkɨ wamu'u pɨtipɨna,wakɨpate witsimɨ'anene 'axameteyurietɨ memu'uwa.22Ti'aitame mɨpaɨ kanaineni:«Watsani nekanixe'akunuitɨamɨkɨ,haramara meukatewatsie nepɨxehatiwitɨni,23memɨxe'aye'unie waxuriya xe'ɨkatetsieke'utiwiriere,mɨkɨta tsɨikɨri me'itsenameyuhetsie timieme memɨtehexeiyanikɨ».24Tukita mepuyuhekɨaxuruku me'utɨ memetsi'ayexeiyatɨ tati'aitɨwame.25Kwikamete mepanuyetei,wa'ɨtɨma teyuitɨwamete,wahamatɨa 'ukari memɨte'utikatse.26'Aixɨa xeketenehekɨatani Kakaɨyari xeɨripa,Yawé xekenenɨawani, 'Ixaheri nuiwarimama.27Kaniwaruwitɨximeni temaikɨ nuiwari Wenikamini,wa'utɨmata yumɨiretɨ te'aitamete Kura nuiwariyaritsie miemetemetatsiere te'aitamete Tsawuruni meta Nepɨtahari kiekatari.28Kakaɨyari 'aku, 'atɨrɨkariya kenanakanɨ'a,Kakaɨyari 'aku, keneuhekɨata 'atɨrɨkariya,tahetsiemieme 'aixɨa pemɨtiuyurikɨ.29'Atuki Kerutsareme muwekɨte'aitamete mepɨmetemini 'aixɨa mɨti'ane.30Keneutati'a mɨkɨ tupiriyatsata muwe mariwetɨ 'axati'anetɨ,mɨkɨ memayu'eririya tuurutsixinuiwarite watsata tsikerutsixi wahepaɨ memɨteyuxexeiya.Yaketineuyuri pɨrata tepɨayari mɨmetsiyetuirienikɨ 'utatsuatɨ,nuiwarite keniwarutaweiya 'axamemɨte'u'iyari.31'Ekipitu pɨwaranɨ'ani yuhetsɨa miemete,Kutsi Kakaɨyari hetsɨa punuani mɨkɨ ti'aitɨwame mayanikɨ.32Kwiepa te'aitamete 'aku, Kakaɨyari xekeneutakwikani,nɨawari ti'aitame hetsiemieme xekeneutikwikani,33kemɨ'ane haiwitɨritsie 'akaitɨ mukuyeika,muyuawi meripaitɨ mieme hetsie,niukieya mɨ'enieriekakɨ yamɨtiyuriene,niukieya mutatɨrarɨka.34Xekenemaika Kakaɨyari tɨrɨkariyaya,katini'aitani 'ixaheritsixi wahetsie,tɨrɨkariyaya meutitewatsie kanixuaweni.35Kakaɨyari 'aku, 'atukita pepɨmariwe,'ixaheritsixi wakakaɨyari tɨrɨkari pɨtiyupitɨwa, yuteɨterima tɨrɨkariya pɨwapitɨa.Kakaɨyari 'aixɨa ketikuxaxatsiwani.