Nɨawari66hch_wb2
Teyuitɨwamete wa'ukiyari. Kwikari. Nɨawari.
1Kakaɨyari xekenehiwieka yutemawierima,yunaitɨ teɨteri kwiepa xemɨtama.2Nɨawari hetsiena mieme xekeneutikwikani,Kakaɨyari witsikemɨ'ane kwikari xekenepitɨaka.3Kakaɨyari mɨpaɨ xeketeneutahɨawi:«Yemekɨ pɨmamariwawe 'a'uximayatsika.Pɨmariwe 'atɨrɨkariyamemɨmetsi'aye'unie 'ahɨxie memamatɨ mepuyuyetua.4Yunaitɨ kwiepa memɨtama 'ahɨxie mepukahɨxima'uwe,memetsitanɨawake,kwikari 'ahetsiemieme mepɨtikwika».5Xekenakɨni xeketeneuxeiya Kakaɨyari kemɨtiyurieni,tahetsiemieme mariweme kemɨtiuyuri,6Haramara 'akuwakime kanayeitɨani,teɨteri me'uhutɨ mana mekaniukɨne.Tepɨyutemamawieka hetsiena.7Yutɨrɨkariyakɨ pɨti'aita yuheyemekɨ,naitsarie nuiwarite puwaxeiya.'Axamemɨte'u'iyari hetsiena mepɨkate'uhɨpani.8Yunaitɨ teɨteri, 'aixɨa xeketenekɨhɨaweni takakaɨyari,kwikari hetsiena mieme 'eniɨriɨkɨme xekenayeitɨa.9Mɨkɨ tatukari kani'ɨwiyani,pɨtatsi'ɨwiya temɨkahekaxɨrɨwenikɨ.10Kakaɨyari 'aku, 'ekɨ pepɨtatsi'uta'inɨataxɨ,tepɨa pɨrata hepaɨ 'aixɨa pepɨtatsi'utiyuri.11Winiyaritsie pepɨtatsi'ukaxɨri,takwatsapaɨ 'ika raheteme pepɨtatsi'utitɨtɨa.12Kawayutsixi taheima mepuyekɨ, tamu'ute meputitaraxɨ,taipa tepuyekɨ meta hapa,matsi 'imatɨrieka 'aixɨa 'anemekɨ tepupitɨarie.13'Atukita nepeutahani mawari taiyariyari nepɨmatsipitɨanimeta kenemutayɨ nepɨraye'atɨani,14netenikɨ kenematiutahɨawixɨmeta kenemutayɨ netiuka'eniwatɨ.15Mawari taiyariyari nepɨmetsiwewirieni tewaxi memɨwaiyatɨkakɨ,muxatsi 'ukitsi wamawari kɨtsiyari wahamatɨa,tuurutsixi nepɨmetsitimawirieni meta tsipuri 'ukitsi.16Xeme xekenakɨni, Kakaɨyari xemɨmakaxe,xekeneu'enana, nepɨtixetaxatɨanimɨkɨ kemɨtiuyuri naime nehetsiemieme.17Netenikɨ nekanitahiwieni,nenenikɨ nekanitanɨawa.18Xɨka ne'iyaritsie 'axamɨti'ane neranukananike,Ti'aitame pɨkanetsi'enienikekai,19peru neuxei Kakaɨyari kaneniu'enieni,yakatiniuyurieni kenemɨtitahɨawixɨ netiuka'eniwatɨ.20'Aixɨa ke'itɨarieka Kakaɨyari,nenenewieri manu'enikɨyunaki'eriya mɨkanetsi'utikweririkɨ.