Ninge61gfk_tbl
A nianga tupas no tunotuno nong i kure ira ut na ninge: da ting ira mangana gita ing da inge iakan ra ninge. Devit ga pit ie.
1God, hadade no nugu tintaau.Taram no nugu sinasaring.2Mekai ra hauhawatine no ula hanuo iau tataau ugu.Iau tataau ing iau malmalungo hanahaan.Lamus iau taar tano ula habo nong i manga naliu tagu,3kanong iau la barbarahit taam kaia,ma augu no nugu subaan na munmun mah nong i kalkalala ta ira nugu ebar.4Iau te manga masingan bia ni kis hatika narako tano num palpalihma bia ni mun menapu tano barbarahit ta ira babaam.5Kanong warah, u te hadade ira nugu kunubus, God,ma u te hatinaan iau ma ira linge i haruat ma diet ing diet burte ugu.6Halawaas ira bunguno no nilon tano king.Haut bia ira uno bulumur diet na nes baak ie.7Iau sasaring bia no uno kinkinis na harkurai na kis hathatikai taar tano matmataan ta God.Tule no num harmarsai ma no num tutun na magingin wara balbalaure bat ie.8Io, iau ni nanget na inga pirharlat ukaia hono hinsaam,ma ni pet haruatne ira nugu kunubus tupas ugu ta ira kaba bungbung.