Yɛsɑ̃ɑ̃58tbz_sim

Kuyie mbomɛ̀ kutenkù kɛ bekù

1Bɛdèmbɛ̀ kóo kótì dìèmmɛ̀ Dɑfiti yɛ̀nfɛ̀ nɛ̀ mɛtɑmmɛ̀ mɛ̀ɛ̀ tu: Á bɑ́ɑ́ kuɔ.
2Bɛkpɑ̀ɑ̀tìbɛ̀ di bekù bɑkɛ weti weti nweɑ̀?Bɛ̀ bekùnɛ̀ miɛ̀ mmɛ bɛnìtìbɑ̀ɑ̀?3Di dɔɔri dɛ̀ɛ̀ í wenni kɛ yɛ̃́mu,díì píɛ mmɛyɛi ndihɛì.
4Oyɛiwe tú oyɛiwe nwe nɛ̀ o yɔ̃ pɔutì miɛkɛ,kɛ̀ siyɑ́ɑ̀bìsí yiɛ̀ nfeti nɛ̀ bɛ̀ ò pɛinímɛ̀.5Bɛ̀ mɔ̀kɛ mɛdɑutidɔ̀mmɛ̀ mmɛ,kɛ dɔɔri kɛ dò ndiwɑɑ̀hɔ̃̀nnì,6dìì í yo owɑɑ̀pĩ́ntì tɑmmɛ̀,kɛ í yo oteteu diɛwè nɑ́ɑǹtì.
7Kuyie, mbɔ́kɛ́ bɛ nìì,bɔ́kɛ́ yɛcìrícìrìnìì mbɛ̀ mɔ̀kɛ yɛ̀.8Kɛ̀ bɛ̀ɛ pɛ̃ɛ̃tóo mɛniɛ nhɔ̃ɔ̃ pɔ̃ntɛ́ mmɛ̀ɛ̀ botí,kɛ̀ bɛ̀ ntɑ̃ũ bɛ pie mbɑ́ ì bɑ́ɑ́ dɔ̀ɔ̀ dɛ̀mɑrɛ̀.9Bɛ̀ɛ nɑɑ́nnɛ̀ tidɑ̀tìkonkontì,tìì fũrì kɛ̀ ti ɑmmɛ̀ dèu,bɛ̀ ndò mbɛ̀ pɛitɛ́ wè ocírì kòò í yɑ̀ diyiè.10Bɛ po yó nkpɑɑ́ kɛ mu nyí yɛ̀ tifɑ̃ɑ̃̀tì,kɛ̀ tɛfɔ̀dɔ́ntɛ̀ɛ ì tùótɛ́mu,kɛ̀ dɛ̀ sɔ̃́ nyì sũ̀ tɛ̀ɛ ì tùótɛ́.
11Osɑ̀ù bo yɑ̀ Kuyie mpɛ̀itɛmɛ̀ kɛ̀ dɛ̀ɛ ò nɑrikɛ mɛdiɛ̀,kòo ɔ́ú o nɑɑ̀cɛ̀i bɛ yĩ̀ĩ̀ mmiɛkɛ.12Kɛ̀ bɛnìtìbɛ̀ɛ dɛ̀ yɑ̀ kɛ dɔ̀:Kuyie mmɛ̀nkɛ yietìmu osɑ̀ù,bɛ̀ bo yĩ́ Kuyie mmɛ̀nkɛ bomu kɛtenkɛ̀ kɛ bekù.
expand_more
Search