Nɨawari50hch_wb2
'Atsahapi nɨawarieya.
1Yawé kananiukani, kakaɨyarixi mɨwakakaɨyari:teɨteri kaniwa'inieka tau manatineika metsutɨme tau makayuyuipiketsie paitɨ meye'atɨkaime.2Kakaɨyari kaniutimerɨkani Tsiyuni paitɨ,kiekari witsimɨ'ane meta 'aixɨa mɨ'anetsie.3Takakaɨyari 'ukanamieni, peru kayuwatɨ hexeiyatɨ 'upɨkahamie,tai kananuyekani hɨxiena naime tititaiyatɨ,waritana katiniutatɨrarɨkani.4Yawé muyuawi meta kwie kaniwa'inieka,memɨnenierekɨ yuteɨterima mɨwataxanetatsie:5«Memɨpatsie xekeniwarukuxeɨri,nehamatɨa tɨratu memuwewi mawarikɨ».6Muyuawi 'aixɨa mɨti'ane katinihekɨatani kayuhekɨakamekɨ:Kakaɨyari kani'itsɨkametɨni 'aixɨa tiuka'iyaritɨ.7«Xekeneu'enana, neteɨterima, nepɨtitaxata,'Ixaheri, nepɨmetsitahekɨata:Ne nepɨ'akakaɨyari, ne xeikɨa Kakaɨyari nepɨhɨkɨ.8Ne nepɨkamatsihate'a mawarika pemɨwewiekɨmeta mawari taiyariyari, mɨkɨ yapemɨnetiutimawiriwakɨ.9Ne nepɨkawareuyehɨwari tsikerutsixi 'akuraruta miemete,meta tsipuri 'ukitsi 'akie miemete,10yeutari mekateninepiinitɨni,metatsiere xeimiriyari hɨriyaritetsie tewaxi yeuta memu'uwa.11Memɨte'awɨwawe nepɨwamate,yunaitɨ yeuta memɨte'u'uwa nepiini mepɨtehɨkɨ.12Xɨka ne neheuhaakamɨkɨni, nepɨkametitaxatɨani,metsɨ kwie naitɨ katininepiinitɨni, meta tita mɨrexeiya.13¿Kamɨtsɨ ne tuurutsixi wawaiyari netikwa'a,yatɨni tsipuri 'ukitsi waxuriya neti'ie?14Kakaɨyari kenexatɨaka kepemɨti'awaɨriyakɨ,'Amutewi hetsɨa kepemɨti'ahɨritɨa ketinaye'atɨa.15Keneneutahɨawi kepauka 'uximatɨarika pemexeiya,ne nepɨmetsixɨna, 'ekɨta 'aixɨa pepɨnetitahɨawe».16Peru Kakaɨyari 'axatiyuruwame mɨpaɨ katinahɨaweni:«'Ekɨ heitserie pepɨkahexeiya ne'aitsika pemukuxatanikɨ,yatɨni netɨratu pemɨkuxatanikɨ.17Kenemɨti'aita, pepɨxani'erie,neniuki, pepehɨpa.18Xɨka tinawayame pe'uxeiya, pepitinɨnɨwe,hipame wa'ɨitama memɨwakumaɨwa wahamatɨa pepuyeika.19'Axamɨti'anekɨ, 'aneni pepɨtatua,'aneni puyuwaɨriya mɨtiu'irɨmanikɨ.20Pepɨ'iyamate 'a'iwa hetsiemieme pemɨtikuxatanikɨ,matsi pepi'uximatɨa yemekɨ 'a'iwa.21Mɨpaɨ pekatiniyurieneni, neta 'atsinepɨkahaine,¿xɨari mɨpaɨ pepɨtiku'eriwa kename ne 'ahepaɨ ne'ane?Peru hikɨ ne nekamenitatiemɨkɨ,'ahɨxie nemetsi'anutaxeiyatɨ nepɨmetsitaxaneta.22»Xeme Kakaɨyari xematɨmai,xekeneutimaixɨa kenemaine,xɨkate mɨpaɨ xeka'ɨyɨni, ne nekanixetitsanamɨkɨ,nixewitɨ tɨma pɨkaxetawikweitsitɨani.23Kemɨ'ane pamɨpariyutsi mɨnetsipitɨa, 'aixɨa mɨnerahɨawe,kemɨ'ane yuhuye 'ɨwiyatɨ mumie, newikweitsitɨarika nekanipitɨamɨkɨ».